Փաստ ինֆո

Թեև ՀՔԾ-ն դեռևս ամիսներ առաջ հայտարարել էր «Ձորա ՀԷԿ»-ի գործի անջատված մասով նախաքննության ավարտի մասին, սակայն, պարզվում է, դատախազությունը չէր հաստատել մեղադրական եզրակացությունը և գործն ուղարկել ՀՔԾ՝ լրացուցիչ նախաքննության։ ՀՀ գլխավոր դատախազությունից «Փաստինֆո»-ի հետ զրույցում հաստատեցին տեղեկությունը՝ նշելով, որ նախաքննությունը դեռևս շարունակվում է։

Հատկանշական է, որ ՀՔԾ-ն այս 5 ամիսների ընթացքում դեռևս չի հայտարարել նախաքննության ավարտ և նոր մեղադրական եզրակացություն կազմել, սակայն Սեյրան Օհանյանի իրավունքներն ու պատգամավորական գործունեությունը շարունակում են սահմանափակվել։

Սեյրան Օհանյանի պաշտպան Կարեն Մեժլումյանը տեղեկացրել էր, որ մոտ 10 ամիս առաջ քննիչ Չիլինգարյանը պարոն Օհանյանին առաջարկել է քրեական հետապնդումը դադարեցնել՝ վաղեմության ժամկետն անցած լինելու հիմքով, ինչը ընդունելի չէր համարել Օհանյանը՝ պնդելով, որ անմեղ է և պետք է արդարացվի: Ստացվում է, թեև քրեական գործը ենթակա է կարճման՝ վաղեմության ժամկետներն անցած լինելու հիմքով, շարունակում է քննել գործը սահմանափակել անձի իրավունքները։ Մասնավորապես, փաստաբանն ավելի վաղ տեղեկացրել էր, որ քննիչը թույլ չէր տվել Սեյրան Օհանյանին մեկնել Սանկտ Պետերբուրգ՝ մասնակցելու ՀԱՊԿ ԽՎ մշտական հանձնաժողովների նիստին։

Հիշեցնենք, որ ՀՔԾ-ն մայիսին էր հայտարարել «Ձորա ՀԷԿ»-ի գործով նախաքննության ավարտի մասին։ Ըստ ՀՔԾ-ի՝ 2010 թվականի ընթացքում ՀՀ պաշտպանության նախարարության կողմից մշակված ՀՀ կառավարության գաղտնի որոշման նախագծով, առանց օրենքի մի շարք պահանջների պահպանման, առաջարկվել է թույլատրել ՀՀ ՊՆ-ին՝ որպես «Ձորա ՀԷԿ» ՓԲԸ պետական սեփականություն հանդիսացող բաժնետոմսերի փաթեթի կառավարման լիազորություններն իրականացնող մարմնի, հավանություն տալ 3,600,000,000 ՀՀ դրամ գումարով ընկերության գույքի օտարմանը «Ձորագետ Հիդրո» ՍՊ ընկերությանը: Արդյունքում` պարտադիր գնահատման ենթակա՝ 4,646,400,000 ՀՀ դրամ շուկայական արժեքով ողջ գույքը, առանց պատշաճ գնահատման միջոցով շուկայական արժեքի որոշման, «Ձորագետ Հիդրո» ՍՊ ընկերությանն է իրացվել իրական արժեքից 1,046,400,000 ՀՀ դրամ պակաս գումարով:

«Քրեական գործով պարզվել է նաև, որ «Ձորա ՀԷԿ» ՓԲ ընկերության գույքի օտարումից հետո` ՀՀ հանրային ծառայությունները կարգավորող հանձնաժողովի նախագահի պաշտոնը զբաղեցրած Ռոբերտ Նազարյանի, նրա տեղակալ Նիկոլայ Գրիգորյանի և հանձնաժողովի անդամներ Շիրազ Կիրակոսյանի ու Մուշեղ Կոշեցյանի գործողությունների հետևանքով, «Ձորագետ Հիդրո» ՍՊ ընկերության հիդրոէլեկտրակայանից արտադրված և առաքված էլեկտրաէներգիայի վաճառքի համար 2012-2019 թվականների ընթացքում սահմանվելիք սակագների փոխարեն նույն ժամանակահատվածների համար անհիմն սահմանվել են կրկնակին գերազանցող սակագներ, որի հետևանքով «Ձորագետ Հիդրո» ՍՊ ընկերության կողմից ՀՀ-ում էլեկտրաէներգիա սպառող ֆիզիկական և իրավաբանական անձանցից հավելյալ ստացվել է առանձնապես խոշոր չափերի՝ 7,052,065,099 ՀՀ դրամ գումար»,- նշված էր ՀՔԾ տարածած հաղորդագրությունում, ինչը ընդունելի չի եղել անգամ դատախազության համար ու չէր հաստատել մեղադրական եզրակացությունը։

Աղբյուր` Փաստինֆո