Փաստ ինֆո

Գորիսում և Գյումրիում ՏԻՄ ընտրություններում ՔՊ-ի պարտությունը կարող է 2 բացատրություն ունենալ. Կա՛մ մարդիկ են հիասթափվել իշխանություններից, կա՛մ արտահերթ խորհրդարանական ընտրությունների ժամանակ վարչական ռեսուրս է կիրառվել։

«Փաստինֆո»-ի հետ զրույցի ժամանակ քաղտեխնոլոգ Կարեն Քոչարյանը նշեց, որ ՏԻՄ ընտրություններին ևս ՀՀ երեք նախագահների թիմերը մասնակցել են, հետևաբար չենք կարող ասել, որ եթե արտահերթ խորհրդարանական ընտրություններին նրանք չմասնակցեին, ապա պատկերն այլ կլիներ։

«Սա երկու բացատրություն կարող է ունենալ։ Կա՛մ 4 ամսվա ընթացքում հասցրել են հիասթափվել ՔՊ-ից, կա՛մ այն ժամանակ օգտագործվել են վարչական ռեսուրսներ, այդ թվում բանակը։ Պետք է հասկանալ, թե որ տարբերակն է եղել»,-նշեց քաղտեխնոլոգը։

Հանրային գործիչ Թևան Պողոսյանն էլ «Փաստինֆո»-ի հետ զրույցում նկատեց՝ հունիսի 20-ին գորիսեցին և գյումրեցին քաղաքապետ չէին ընտրում։

«Եթե գորիսեցիները 2-ի դեպքում էլ քաղաքական ընտրության են գնացել և պետք է հավասարազոր մոտեցում ցույց տային, ապա 4 ամսվա ընթացքում գորիսեցիների մոտ փոփոխություն է տեղի ունեցել։ Գորիսեցին այսօր իր ընտրությունն է կատարել և պետք է ողջունել, հարգել այն ու ամեն ինչ անել, որ օր առաջ քաղաքապետն իր աշխատասենյակում լինի, ձևավորի իր թիմը և նախընտրական խոստումներն իրականացնի»,-նշեց Թևան Պողոսյանը։

Վերջինս ընդգծեց՝ հնարավորության դեպքում պետք է իմանալ, թե ինչքան մարդ է ՏԻՄ ընտրություններին մասնակցել և արտահերթ խորհրդարանական ընտրությունների համեմատ որքանո՞վ է ընտրողների թիվն ավել եղել, որ այլ պատկեր ունենք։

«Երբ ժամանակին ՍԴ-ն ուներ այդ հնարավորությունը՝ պարզել բոլոր դեպքերը, բանակի մասնակցության հարցը, հատկապես, երբ իրենց ներկայացվել էին փաստեր, չարեց այդ ամենը։ Հիմա էլ է վարչական ռեսուրս կիրառվել, պարզապես գորիսեցին արհամարհել է վարչական ռեսուրսի խնդիրը։ Կարծում եմ՝ ընտրողն ավելի դաս քաղած է եղել»,-ասաց մեր զրուցակիցը։

Աղբյուր` Փաստինֆո