Փաստ ինֆո

ՀՀ արդարադատության փոխնախարար Սուրեն Գրիգորյանը ԲԴԽ նիստում չի կարողացել հիմնավորել՝ կալանավորման միջնորդության վերաբերյալ որոշում կայացնելիս դատարանն ինչպես կարող է գնահատել հիմնավոր կասկածը՝ առանց որոշակի ապացույցների, փաստերի անդրադառնալու։

Խնդիրն այն է, որ Վերաքննիչ քրեական դատարանի դատավոր Սերգեյ Մարաբյանի նկատմամբ կարգապահական վարույթ է հարուցվել՝ Արարատ Միրզոյանին ծեծի ենթարկելու գործով մեղադրյալի նկատմամբ ընտրված խափանման միջոց կալանավորումը փոփոխելու մասին որոշումը կայացնելուց հետո։ Ս.Մարաբյանը մեղադրյալի կալանավորումը վերացրել էր՝ հաշվի առնելով դատարանին ներկայացված նրա այլուրեքությունը։

ԲԴԽ դատավոր անդամներից Մեսրոպ Մակյանը նախարարության ներկայացուցչից պահանջեց, որ վերջինս պրակտիկ ցույց տա, թե, օրինակ, այլուրեքության դեպքում ինչպես դատավորը կարող է անդրադառնալ և վերլուծել հիմնավոր կասկածի վերաբերյալ փաստարկները՝ առանց որոշակի ապացույցների անդրադառնալու. «Ձևը պրակտիկ, խնդրում եմ, ցույց տվեք»։

Սուրեն Գրիգորյանը հայտարարեց, թե չի ցանկանում նշել, թե առհասարակ այլուրեքության ֆենոմենին դատարանն ինչպես պետք է անդրադառնա կամ չանդրադառնա։ Գրիգորյանի՝ խուսափողական պատասխանից հետո Մակյանն ընդհատեց՝ կրկնելով հարցը. «Հիմա կոնկրետ որոշմամբ եմ հարցնում։ Ինչպե՞ս կարող է դատավորը պատճառաբանել և կոնկրետ դեպքում վարույթ հարուցող մարմնին ներկայացնել կամ նրա տեսադաշտում հայտնված որոշումը լիներ պատճառաբանված, եթե նա մեկ-երկու կամ երեք ապացույց վերլուծության չենթարկեր»։

Փորձելով պատասխանել հարցին՝ Գրիգորյանը հիշատակեց Վճռաբեկ դատարանի դատողությունները, որը վերաբերում էր ապացույցներից մեկն ավելի արժանահավատ դիտելուն, սակայն, այս վարույթի շրջանակներում այլուրեքության հարցը քննարկելու անհրաժեշտություն չի տեսնում։ Ըստ Գրիգորյանի՝ այլուրեքության դեպք չկա, լավագույն դեպքում անձի հեռախոսն է գտնվել այլ վայրում։

Մակյանի հարցին՝ կա ապացույց, որ անձը գտնվել է դեպքի վայրում, Գրիգորյանը նշեց, թե առնվազն այն ապացույցների շրջանակը, որոնք ներկայացվել են, այլուրեքությունը հաստատելու բավարար փաստեր չեն եղել։

ԲԴԽ դատավոր-անդամ Ստեփան Միքայելյանն էլ արձանագրեց՝ ներկայացված միջնորդության մեջ ծաղկաքաղ է արվել Վճռաբեկ դատարանի դատողությունները, հիմնավորումները, ներկայացվել են՝ բացառապես Վճռաբեկ դատարանի փաստարկները, մինչդեռ, դա ինքնին հիմք չի կարող հանդիսանալ՝ կարգապահական վարույթի հարուցման համար։ Միքայելյանը հետաքրքրվեց՝ Վճռաբեկ դատարանի որոշումից զատ նախարարությունն ինչում է տեսնում շեմի խախտումը, ինչին ի պատասխան Գրիգորյանը նշեց, որ դատական ակտը բեկանելը չէ, որ հանդիսացել է կարգապահական վարույթի հիմք, բայց երբ օրենսդիրն ասում է, որ դա ինքնին չի կարող հանդիսանալ, դեռևս չի նշանակում, որ վարույթի շրջանակներով չեն կարող վկայակոչվել այդ հատվածները։ ԲԴԽ անդամ Դավիթ Խաչատուրյանն էլ պարզաբանեց՝ բացի Վճռաբեկ դատարանի դատական ակտից ՀՀ արդարադատության նախարարությունն ինքն ինչ փաստարկներ, նոր հիմքեր է ներկայացրել, ինչին ի պատասխան Գրիգորյանն արձագանքեց, թե Վճռաբեկը դատողություններ չի կատարել Մարաբյանի կողմից վարքագծային կանոնների խախտման, էթիկայի և անաչառության վերաբերյալ, որը տեղ է գտել միջնորդության մեջ, մինչդեռ դատավոր Մարաբյանի ներկայացուցիչ Միքայել Շխիմյանը «Փաստինֆո»-ի հետ զրույցում նշեց, որ միջնորդության մեջ որևէ խոսք անգամ չի գնում դատավոր Մարաբյանի վարքագծային կանոնների խախտման, էթիկայի և անաչառության մասին։

Մինչ դատական նիստը կհետաձգվեր, դատավոր Մարաբյանը ևս մեկ անգամ միջնորդություն ներկայացրեց՝ ՍԴ դիմելու մասին։ Միջնորդության հիմքում դրվել է նախարարության կողմից դատավորների նկատմամբ կարգապահական վարույթներ հարուցելու լիազորության սահմանադրականության հարցը։

Ինչ վերաբերում է դիտարկմանը, թե սույն գործով վաղեմության ժամկետներ կան, պետք է որոշում կայացվի, Մարաբյանն ընդգծեց, որ ինքը որևէ խախտում չի կատարել և պատրաստ է մինչև վերջ գնալ, համաձայն չէ, որ վարույթը կարճվի՝ վաղեմության ժամկետներն անցնելու հիմքով, քանի որ դա կարող է բացասաբար անդրադառնալ. Այն նույնացվում է քրեական դատավարության ոչ արդարացնող հիմքի հետ։

«Այստեղ իմ նկատմամբ իրականացվում է պրոցես, որովհետև ես համարձակ որոշում եմ կայացրել»,- նշեց Մարաբյանը։

ԲԴԽ նիստը հետաձգվեց մինչև հոկտեմբերի 21-ը՝ ժամը 14։00-ն։

Հեղինակ՝ Իզաբել Սահակյան

Աղբյուր` Փաստինֆո