Փաստ ինֆո

Արարատի մարզում սպանություն է տեղի ունեցել։ Մահակով հարվածել են նրա գլխին, ապա դանակով՝ կրծքավանդակին։ ՀՀ ոստիկանության Հասարակայնության հետ կապերի և լրատվության վարչությունից «Փաստինֆո»-ի հետ զրույցում հայտնեցին, որ հոկտեմբերի 16-ին, ժամը 00.45-ին, բժշկական կենտրոնից ոստիկանության Արտաշատի բաժին հաղորդում է ստացվել, որ դանակահարված վիճակում իրենց մոտ է ընդունվել մի երիտասարդ, ով գիտակցության չգալով՝ մահացել է:

«Օպերատիվ խումբը մեկնել է հիվանդանոց, որտեղ պարզվել է, որ 30-ամյա տղամարդը հիվանդանոց էր տեղափոխվել «կրծքավանդակի ձախ կեսի, առաջային մակերեսի կտրած-ծակած վերքեր, ձախ բազկի կողմնային մակերեսի կտրած վերքեր, գլխի գագաթնային շրջանի պատռված արնահոսող վերք» ախտորոշմամբ»,- հայտնեցին ոստիկանությունից: Փաստի առթիվ հարուցվել է քրեական գործ՝ սպանության հատկանիշներով:

Ձեռնարկած օպերատիվ-հետախուզական միջոցառումների արդյունքում հոկտեմբերի 16-ին, ժամը 01.30-ին, Դալար գյուղից, սպանություն կատարելու կասկածանքով, ոստիկանության Արտաշատի բաժին բերման է ենթարկվել Դալար գյուղի 2001 թ. ծնված մի բնակիչ, ապա ներկայացվել նախաքննական մարմնին։ Նախաքննական մարմնում երիտասարդը խոստովանել է, որ Դալար գյուղում 30-ամյա համագյուղացու հետ վիճաբանել էին, որի ընթացքում ինքը մահակով հարվածել էր նրա գլխին, այնուհետև դանակով՝ կրծքավանդակին:

«Երիտասարդը ձերբակալվել է: Հանցագործության գործիք մահակը հայտնաբերվել է, ձեռնարկվում են միջոցառումներ՝ դանակը հայտնաբերելու ուղղությամբ: Նշանակվել է դատաբժշկական փորձաքննություն: Հանգամանքները պարզվում են: Կատարվում է նախաքննություն»,- հայտնեցին ոստիկանությունից:

Աղբյուր` Փաստինֆո