Փաստ ինֆո

Երեխաների աչքի առաջ իրենց հորը ստորացրել, ծեծել և հայհոյել են, այդ երեխաները վաղը՝ որպես հասարակության բջիջ, ինչպես են ինտեգրվելու և առողջ հոգեբանություն ունենալու, ինչ հոգեբաններ պետք է աշխատեն, որ երեխաների հիշողությունից այդ տեսարանները դուրս բերեն։ Այս մասին «Փաստինֆո»-ի հետ զրույցում ասաց Վազգեն Ռաֆայելյանի ներկայացուցիչ, փաստաբան Հասմիկ Մարտիրոսյանը։ 

Ինչպես արդեն տեղեկացրել ենք՝ նախօրեին ոստիկանության ծառայողները բիրտ ուժ կիրառելով բերման են ենթարկել տղամարդուն՝ երեխաների աչքերի առաջ։ Ընդ որում, տղամարդը բերման է ենթարկվել ապօրինի շինություն կառուցելու համար։ Այսինքն՝ նա ոչ թե հանցագործ է, այլ առերեւույթ թույլ է տվել վարչական զանցանք։ Տարածված տեսանյութում երևում է, թե ինչպես են երեխաները լալիս, վախենում, նրանցից մեկը ցնցումներով տեղափոխվել է ԲԿ։ Բարձրացված աղմուկի արդյունքում՝ դատախազությունը հայտարարեց, թե տեսանյութն ուղարկվել է ՀՔԾ՝ ՀՀ քրեական դատավարության օրենսգրքի 180-րդ և 181-րդ հոդվածներով սահմանված կարգով նյութեր նախապատրաստելու, ոստիկանների գործողությունների իրավաչափությունը և համաչափությունը պարզելու, իրավական գնահատականներ տալու նպատակով, իսկ ՀՀ ոստիկանության Ներքին անվտանգության վարչությունում ծառայողական քննություն է նշանակվել։

Փաստաբան Հասմիկ Մարտիրոսյանը մեզ հետ զրույցում ոստիկանների գործողությունները գնահատեց ոչ համաչափ, բռնի, իրենց լիազորությունների սահմանն անցած, քանի որ 70 ոստիկան չի կարող դուրս գալ մեկ մարդու դեմ։ Ընդ որում՝ խոսքը չի գնում ծանր հանցանքի մեջ մեղադրվող անձի մասին, այլ՝ ընդամենը վարչական իրավախախտման՝ համայնքի հողի վրա ինքնակամ շինություն կառուցելու համար, որի իրավունքը, ըստ փաստաբանի, ուներ, քանի որ օրենքը թույլ է տալիս համայնքի հողի վրա կառուցել ինքնակամ շինություն, ապա դիմել օրինականացման, եթե չի խախտվում երրորդ անձանց իրավունքները և ներառված չէ Հողային օրենսգրքի 60-րդ հոդվածում։

«Եթե չեն ցանկանում, որ քաղաքացիները կառուցեն ինքնակամ շինություն, ապա թող վերացնեն Կառավարության 912Ն որոշումը: Օրենքը թույլ է տալիս, քաղաքացին էլ կառուցել է: Դա նույն բանն է, որ ավտոմեքենան կայանեն չթույլատրված վարում, բայց ավտոմեքենան տարհանելու փոխարեն բերեն կոտրեն»,- նշեց Մարտիրոսյանը՝ հավելելով, որ քանդումը չի ենթադրում գույքի դիտավորյալ ոչնչացում, դա ևս օրենքով կարգավորված է, քանդման աշխատանքները պետք է իրականացնի լիցենզավորված կազմակերպության կողմից, որը չի վնասի կամ չի ոչնչացնի գույքը, մինչդեռ, այս դեպքում անձը կրել է գույքային վնաս է կրել: Ընդ որում՝ փաստաբանն առաջարկել էր երեք ժամ տրամադրել իրենց՝ գույքագրելու, գույքը դուրս բերելու համար, սակայն ամբողջն ավիրել են:

«Երեխաների աչքերի առջև հորը ավազների միջով քարշ տալով, ձեռնաշղթաներ հագցնելով, հայհոյանքներ տարել դրել են ոստիկանական մեքենա, տարել ոստիկանություն»,- նշեց փաստաբանը:

Ինչ վերաբերում է վարույթներին, փաստաբանը հայտնեց, որ դատարանում երեք հայցադիմում է դատարանում քննվում և այն վարչական ակտը, որի հիման վրա փորձում էին քանդման աշխատանքներ իրականացնել, բողոքարկվել է վերադասության կարգով և վերջիններս չպետք է գործողություններ իրականացնեին, եթե շարժվեին օրենքով:

«Բայց իրենք որդեգրել են հետևյալ քաղաքականությունը՝ կգնանք, օրենքի խախտմամբ մեր գործողությունները կանենք, թող քաղաքացին գնա դատական ատյաններով պտտվի մի քանի տարի, ուզածը՝ մի քանի միլիոն է լինելու, կտանք իրեն: Սա է իրենց որդեգրած քաղաքականությունը, իրենք չեն շարժվում օրենքով, ամբողջը հակաօրինական վարքագիծ է; Վարչական մարմին չի նշանակում, որ վարչական մարմինն իրավունք ունի վարչական ակտն առանց կնիք, անստորագիր, անհասցե մոտենալ ոստիկաններով և ավիրել գույքը: Այդ մասին պետք է առնվազն ծանուցված լինեինք»,- նշեց նա՝ հավելելով, որ չկա որևէ օրինական ուժի մեջ մտած դատական ակտ, իսկ ինչ վերաբերում է հայցի ապահովման միջոցին, փաստաբանը տեղեկացրեց, որ նախկինում Երևան համայնքին դիմել էր՝ խնդրելով ձեռնպահ մնալ քանդման գործողություններից և համապատասխան հայցադիմումի շրջանակներում վարչական դատարանում միջնորդել է հայցի ապահովման միջոց կիրառել, սակայն դատարանը մերժել է՝ արձանագրելով, որ չկա վարչական ակտ՝ քանդման մասին:

Նախապատրաստվող նյութերի շրջանակներում բացատրություն տալու համար Ռաֆայելյանը դեռևս չի հրավիրվել ՀՔԾ, սակայն փաստաբանը վստահեցնում է, որ հրավիրվելու դեպքում բացատրություն կտան, նյութեր կներկայացնեն, հետևողական կլինեն, որ բոլոր մեղավորները պատժվեն:

«Դարի հանցագործությունը չէր, իրենք չէին վնասազերծում ինչ-որ տեռորիստի, ինչ-որ ռեցեդեվիստի, այլ խեղճ ու կրակ մի քաղաքացու՝ ձեռքերն ամբողջությամբ հողի ու մրի մեջ թաղված, երեք երեխաների ներկայությամբ։ Մեկ ժամ փորձում էինք բացատրել, որ սենյակներից մեկում բնակվում են երեխաները, իրենք են տնկել ծաղիկները, երեխաների իրերն են, միևնույն է, վայրագությունը վայրագություն է: Հրամանն էր՝ քաշեք գցեք դուրս: Հետո արդեն տեսաք: Երեխային խլեցին հոր ձեռքից, քանի որ հայրը գրկել էր երեխային, հորը գցեցին գետնին: Գոռում են՝ քիթը մտցրեք հողի մեջ, ձեռքերը ծալեք: Հայհոյում էին»,- պատմեց փաստաբանը;

Ինչ վերաբերում է ստացված վնասվածքներին, ապա Ռաֆայելյանի դեմքին, ձեռքերին կան քերծվածքներ:

Հեղինակ՝ Իզաբել Սահակյան

Աղբյուր` Փաստինֆո