Փաստ ինֆո

Գորիսի համայնքապետ Առուշ Առուշանյանն ազատ չի արձակվի։ Վերաքննիչ քրեական դատարանը՝ դատավոր Մհեր Արղամանյանի նախագահությամբ, ինչպես եւ սպասվում էր, մերժեց Առուշանյանի կալանավորումն անփոփոխ թողնելու և նրան գրավի դիմաց ազատ արձակելու միջնորդությունը մերժելու մասին առաջին ատյանի դատարանի որոշման դեմ բողոքը ։

«Փաստինֆո»-ի թղթակցի հաղորդմամբ՝ դատական նիստին չի մասնակցել անգամ դատախազը՝ գրավոր տեղեկացնելով, որ զբաղված է ու դեմ չէ, որ իր բացակայությամբ քննվի պաշտպանական կողմի բողոքը։

Նշենք, որ այսօր կայացած դատական նիստին պաշտպան Էրիկ Ալեքսանյանը պահանջել էր  բեկանել առաջին ատյանի դատարանի որոշումը և Առուշանյանի նկատմամբ կիրառել գրավ՝ նվազագույն շեմ սահմանելով 20 մլն դրամը։ Համաձայն դատարան ներկայացված բողոքի՝ կալանավորման միակ հիմքը խոչընդոտման հավանականությունն է, որն էականորեն նվազել է՝ գործը դատարան ուղարկելուց հետո։ Բացի այդ՝ Առուշանյանի դեմ վկաներից որևէ մեկը չի տվել մեղադրական բնույթի ցուցմունք։  Միակ ցուցմունք տված անձը Լուսինե Ավետյանն է, որը նախաքննության ընթացքում ցուցմունք է տվել չորս անգամ և բոլոր ցուցմունքները չէ, որ մեղադրական բնույթի են։ Ընդ որում, Առուշանյանի կողմից հնարավոր խոչընդոտման հավանականությունը դատարանը պայմանավորել էր  նրա զբաղեցրած պաշտոնով, ուստի ստացվում է, որ անձի զբաղեցրած պաշտոնը մեկնաբանվում է ի վնաս նրա, ինչը, ըստ փաստաբանի՝ անթույլատրելի է։

Պաշտպանը զուգահեռներ տարավ դատավոր Մհեր Արղամանյանի հետ՝ նշելով, թե, եթե վերջինս մի օր պաշտոնը թողնի և Աստված չանի, հեռու Արղամանյանից, քրեական հետապնդում իրականացվի և իր՝ նախկինում զբաղեցրած պաշտոնը մեկնաբանվի ի վնաս վերջինիս, դրան ինչպե՞ս կվերաբերվի, բնականաբար՝ նեղացած, որովհետև 20-30 տարի ծառայել է պետությանը։

Ինչ վերաբերում է Լուսինե Ավետյանի նկատմամբ հնարավոր ազդեցությանը, Ալեքսանյանը նշեց, որ Լուսինե Ավետյանն ինքը չէր ցանկանա, որ Առուշանյանը լիներ կալանավորված, քանի որ ինքը ևս Առուշանյանից միայն  լավն է տեսել։ Փաստաբանը պատմեց, որ Առուշ Առուշանյանի հետ հանդիպման ժամանակ Առուշանյանը նշել է, որ իր և յուրաքանչյուր հայի համար ամենաբարձր արժեքը պետք է լինի հողն ու հայրենիքը։

«Արդյո՞ք նման տեսակը կարող է գնալ այս կամ այն կնոջը հորդորել, խնդրել, առավել ևս՝ սպառնալ, որ  դատարանում այս կամ այն ցուցմունքը տա։ Չէ, իսկապես կարծո՞ւմ եք, որ նման տեսակը կարող է իջնել այդ մակարդակին, կնոջը համոզել, որ իր համար գա ցուցմունք տա՞ »,- նշեց Ալեքսանյանը։

Հիշեցնենք, որ արտահերթ խորհրդարանական ընտրությունների ավարտից հետո հարուցվել էր քրեական գործ՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ, ընդ որում, ըստ ՀՔԾ-ի, որպես ընտրակաշառք է ներկայացվել դրամական աջակցությունը։

Քրեական գործի շրջանակներում նախ՝ հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։

Ընդ որում՝ մամուլում շրջանառվող տեղեկությունների համաձայն՝ Լուսինե Ավետյանը գործարքի է գնացել իրավապահ մարմինների հետ՝ ցուցմունք տալով Գորիսի համայնքապետ Առուշ Առուշանյանի դեմ, ինչի դիմաց ազատ է արձակվել։ Ավելին՝ Առուշանյանի դեմ ցուցմունք տալուց հետո Ավետյանի ազգականներից մեկն աշխատանքի է անցել դատախազությունում։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։

Առուշ Առուշանյանի նկատմամբ որպես խափանման միջոց է ընտրվել կալանավորումը։ Քրեական գործով նախաքննությունն ավարտվել է, գործն այժմ գտնվում է Սյունիքի մարզի ընդհանուր իրավասության դատարանի դատավոր Գնել Գասպարյանի վարույթում։

Հեղինակ՝ Իզաբել Սահակյան

Աղբյուր` Փաստինֆո