Փաստ ինֆո

ՌԴ նախագահի հայտարարությունը,ամենայն հավանությամբ, վերաբերում է դելիմիտացիայի և դեմարկացիայի գործընթաց սկսելու անհրաժեշտությանը: Այս մասին «Փաստինֆո»-ի հետ զրույցում ասաց փորձագետ Հայկ Նահապետյանը:

Հիշեցնենք, որ ՌԴ նախագահի խոսնակի հաղորդմամբ՝ երեկ Սոչիում կայացած Պուտին-Էրդողան հանդիպման ընթացքում Պուտինն ընդգծել է Ղարաբաղի հարցում փոխզիջումային որոշումների անհրաժեշտության մասին:

«Հիմա գործընթացը մի հանգրվանի է հասել, որտեղ նոյեմբերի 9-ի և հունվարի 11-ի համապատասխան հայտարարություններով, առաջնահերթության իրավունքով՝ դեմարկացիայի և դելիմիտացիայի գործընթացը պետք է կատարվի, թեև այդտեղ առաջնահերթության ևս մեկ կետ կար՝ գերիների վերադարձի հետ կապված, որի կատարմանը, ցավոք սրտի, հայկական կողմը հետամուտ չի լինում: Բայց կարծում եմ, որ խաղաղության հաստատման գործնական առաջին քայլը դեմարկացիայի և դելիմիտացիայի գործընթացի սկիզբն է, որի վիժեցման մեջ հայկական կողմը մեղադրում է ադրբեջանական կողմից, ադրբեջանական կողմն էլ՝ հայկական կողմին; Կարծում եմ փոխզիջումային ասելով՝ սա նկատի ունեն»,-ասաց Հայկ Նահապետյանը:

Ռուսական լրատվամիջոցների փոխանցմամբ՝ հանդիպման ժամանակ ՌԴ նախագահը հայտարարել է նաև, թե Թուրքիայի ազդեցությունը Ղարաբաղում նպաստում է տարածաշրջանում խաղաղությանը: Այս հայտարարությունը մեծ քննարկումների առիթ տվեց՝ հատկապես հաշվի առնելով այն հանգամանքը, որ 44-օրյա պատերազմի ողջ ընթացքում Թուրքիան տարբեր եղանակներով՝ թե՛ անթույլատրելի զենք-զինամթերքի մատակարարմամբ, թե՛ տարածաշրջան սիրիացի ահաբեկիչներ տեղափոխելով՝ օգնել է Ադրբեջանին պատերազմական տարբեր հանցագործություններ կատարելու հարցում:

Հայկ Նահապետյանի հավաստմամբ՝ ՌԴ նախագահի արտահայտած գնահատականը ձևափոխվել է ռուսական լրատվամիջոցների կողմից.

«ՌԴ նախագահի գնահատականը, որ Թուրքիայի ազդեցությունը Ղարաբաղում նպաստում է տարածաշրջանում խաղաղությանը, հանրային դաշտում ներկայացվել է ոչ ճիշտ:Պուտինը նման հայտարարություն չի արել Խոսքն ընդամենը Ակնայում գտնվող ռուս-թուրքական կենտրոնի մասին է եղել, որը վերահսկում է հրադադարի ռեժիմը՝ Հայաստանի և Ադրբեջանի միջև: Ընդամենը գնահատական է տրվել, որ այդ կենտրոնը նպաստում է հրադադարի ռեժիմի պահպանմանը: Ես հարցազրույցի ձայնագրությունն ամբողջությամբ դիտել եմ, նման միտք չի հնչել, թե թուրքական կողմի ազդեցությունը Ղարաբաղում նպաստում է տարածաշրջանում խաղաղությանը»,-ասաց Նահապետյանը և հավելեց, որ դրա պատճառն այն է, որ ռուսական լրատվամիջոցներ կան, որոնք ֆինանսավորվում են Արևմուտքից կամ Թուրքիայից:

Փորձագետը միևնույն ժամանակ նկատեց, որ հանդիպման ընթացքում Արցախի վերաբերյալ որևէ էական որոշում չի կայացվել, կամ գուցե դրա մասին հրապարակային չի հայտարարվել.

«Երկու պետություններն էլ ունեն դերակատարում Արցախի հետ կապված, դա ակնհայտ է, սակայն հանդիպման ընթացքում որևէ էական կամ որոշիչ խոսակցություն Արցախի վերաբերյալ հրապարակային չի եղել, գուցե բանակցությունների ընթացքում եղել է, բայց դրա մասին հրապարակային չի ասվել:

Այդ հանդիպմանը ավելի շատ քննարկվել է Սիրիայի Իդլիբի շրջանում թուրքական զինված ուժերի և դրանց վերահսկողության տակ գտնվող թուրքական կոչվող իսլամական արմատականների կողմից ակտիվ գործողությունները, որոնք խախտել էին ռուս-թուրքական պայմանավորվածությունը

Աղբյուր` Փաստինֆո