Փաստ ինֆո

ՀՀ երկրորդ նախագահ Ռոբերտ Քոչարյանի և նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի պաշտպանները դատավոր Աննա Դանիբեկյանից պահանջում են՝ դատավարությունն իրականացնել ՀՀ քրեական դատավարության օրենսգրքով սահմանված կարգի համաձայն։

«Փաստինֆո»-ի հաղորդմամբ՝ դատական նիստին Արմեն Գևորգյանը ցանկություն է հայտնել հայտարարությամբ հանդես գալու՝ կապված դատարանի կողմից իրեն՝ ՀՀ սահմանը հատելը թույլ չտալու մասին որոշման հետ, սակայն դատարանը թույլ չտվեց Գևորգյանին ներկայացնել ո՛չ հայտարարությունը, ո՛չ էլ առարկությունը ներկայացնել։

Գևորգյանի պաշտպան Լուսինե Սահակյանը նշեց, որ իր պաշտպանյալն ունի և հայտարարություն անելու, և առարկություններ ներկայացնելու իրավունք և դա որևէ մեկն իրենից չի խլել։ Սահակյանի խոսքով՝ իր մոտ տպավորություն է, որ դատարանն ուղղակի ուզում է Արմեն Գևորգյանին զրկել պաշտպան ունենալու հնարավորությունից։

«Ես 25 տարի փաստաբան եմ, բազմաթիվ դատավարությունների մասնակցել եմ, չի եղել դատարան, որն արգելում է պաշտպանին կամ պաշտպանյալին, որ նա իրացնի իր իրավունքները, այդ թվում, հայտարարություններ կամ առարկություններ ներկայացնել։ Եթե ձեզ թվում է, որ այստեղ պետք է հայտնվի ինչ-որ մի պաշտպան, ով պետք է տեսնի, թե ինչպես են իր պաշտպանյալի իրավունքները խախտվում եւ ուղղակի նստի, ապա պետք է փաստեմ, որ սովոր չեմ դրան, ես ձեզ ուղղակի խնդրում եմ, որ հարգեք Քրեական դատավարության օրենսգիրքն ու արդարադատություն իրականացնեք»,- նշեց Սահակյանը՝ հավելելով, որ իր մոտ տպավորություն է, որ դատարանն ամեն ինչ անում է, որ դատավարության ընթացքը չշարունակվի։

Նախագահող դատավոր Աննա Դանիբեկյանը հայտարարեց, որ դատարանը թույլ չի տալիս հայտարարություն անել, փաստաբանն էլ պնդեց՝ չի նստելու ու թույլ չի տալու, որ իր իրավունքները խախտվեն, ինչից հետո Դանիբեկյանը կարգադրիչներին հրահանգեց փաստաբանի ձեռքից վերցնել խոսափողը։ Մեղադրող դատախազ Գևորգ Բաղդասարյանն էլ միջնորդեց՝ դատական սանկցիա կիրառել փաստաբանի նկատմամբ, ինչից հետո դատարանը նախազգուշացրեց՝ դատական սանկցիա կիրառելու իրավասության մասին։ Փաստաբան Հայկ Ալումյանն էլ ընդգծեց՝ պահանջում է դատարանից, որ դատարանը դատավարությունն իրականացնի ՀՀ քրեական դատավարության օրենսգրքով նախատեսված կարգի համաձայն և պաշտպանական կողմի իրավունքները չխախտել։

«Ինչպես մենք աշխատում ենք չխախտել Ձեր իրավունքները, հարգալից լինել Ձեր և Ձեր իրավասությունների նկատմամբ, պահանջում եմ, որ դատարանը հարգալից վերաբերվի պաշտպանական կողմի իրավունքների նկատմամբ»,- նշեց Ալումյանը։

Նկատի ունենալով, որ փաստաբան Լուսինե Սահակյանը պետք է ծանոթանա գործի նյութերին, դատարանը որոշեց հետաձգել դատական նիստը՝ մեկ շաբաթով՝ նշելով, թե դա ողջամիտ ժամկետ է գործի նյութերին ծանոթանալու համար։ Հաջորդ դատական նիստը նշանակվել է հոկտեմբերի 5-ին՝ ժամը 13.00-ին։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո