Փաստ ինֆո

ԲԴԽ-ում կայացել է Վերաքննիչ քրեական դատարանի դատավոր Սերգեյ Մարաբյանին կարգապահական պատասխանատվության ենթարկելու մասին միջնորդության գործով նիստը։

«Փաստինֆո»-ի հաղորդմամբ՝ Նիստի մեկնարկին Խորհրդի անդամները, կողմերը, ինչպես նաև՝ նիստերի դահլիճում գտնվող դատավորները, փաստաբանները մեկ րոպե լռությամբ հարգել են Արցախյան երրորդ պատերազմում նահատակված հայորդիների հիշատակը։

Ինչպես արդեն տեղեկացրել ենք՝ դատավոր Սերգեյ Մարաբյանի նկատմամբ վարույթ է հարուցվել Արարատ Միրզոյանին ծեծի ենթարկելու գործով մեղադրյալ Ժիրիկ Սիրեկանյանի նկատմամբ ընտրված խափանման միջոց կալանավորումը փոխելու վերաբերյալ որոշման համար։ Ընդ որում՝ դատարանի որոշման հիմքում դրվել է մեղադրյալի այլուրեքությունը՝ դեպքի վայրում չգտնվելու հանգամանքը փաստող տվյալները։

Միջնորդությունը ներկայացրեց ՀՀ արդարադատության նախարարության Վերահսկողական ծառայության պետ Դավիթ Գասպարյանը՝ նշելով, թե դատարանը շրջանցել է մինչդատական վարույթի նկատմամբ վերահսկողության սահմանները։ Մասնավորապես, ըստ Գասպարյանի, դատարանը մեղադրյալին մեղսագրվող հանցանքները կատարած լինելու հիմնավոր կասկածի առկայությունը գնահատելիս, դրա հիմքում դրված փաստական տվյալները վերլուծելիս սահմանել է ապացուցման ավելի բարձր չափանիշ՝ հիմնավոր կասկածից վեր, քան՝ բխում է տվյալ վարույթի խնդիրներից։ Այլ խոսքով՝ ըստ արդարադատության նախարարության՝ դատարանը, կայացնելով որոշումը, դուրս է եկել դատական վերահսկողության սահմաններից։ Ինչ վերաբերում է ներկայացված փաստական տվյալներին՝ հեռախոսազանգերին, ալեհավաքների վերծանումների արժանահավատության վերաբերյալ գնահատականներին, Գասպարյանը նշեց, որ մինչդատական վարույթում չի կարող այնպիսի գնահատականներ տալ ներկայացված փաստական տվյալներին, որոնք դուրս են այդ փուլի շրջանակներից և կազմում են գործի՝ ըստ էության քննության առարկա։

Դատավոր Սերգեյ Մարաբյանը, հարցեր ուղղելուց առաջ, նախ բարձրացրեց կարգապահական պատասխանատվության ենթարկելու մասին միջնորդություն ներկայացնող մարմնի՝ պատշաճ սուբյեկտ լինելու հարցը։ Մասնավորապես, Սերգեյ Մարաբյանը նշեց, որ հուլիսի 26-ին երկու պաշտոնական փաստաթուղթ է ստորագրվել, մեկը՝ ՀՀ արդարադատության նախարարի պաշտոնակատար Ռուստամ Բադասյանի կողմից, մյուսը՝ Քրիստինե Գրիգորյանի կողմից։

«Ուզում եմ հասկանալ՝ պարոն Բադասյա՞նն է կատարել ՀՀ արդարադատության նախարարի պարտականությունները, թե՞ Քրիստինե Գրիգորյանը»,- նշեց դատավոր Սերգեյ Մարաբյանը։

Մարաբյանը Խորհրդին ներկայացրեց երկու փաստաթղթերն էլ, որոնցից մեկը վերաբերում է իր վերաբերյալ վարույթին, մյուսը՝ Երևանի ընդհանուր իրավասության դատարանի դատավոր Զարուհի Նախշքարյանի նկատմամբ հարուցված վարույթին։

Բացի այդ՝ Սերգեյ Մարաբյանը նշեց, որ կարգապահական պատասխանատվության ենթարկելու վերաբերյալ ԲԴԽ ներկայացված միջնորդությունում նշված է, թե դատավորը բացատրություն չի ներկայացրել, ինչը դատավորի դիտարկմամբ, չի համապատասխանում իրականությանը։ Դատավորը ներկայացրեց նախարարությանը տրամադրված գրությունը՝ ելքի համարով՝ հայտնելով, որ ԲԴԽ ներկայացված նյութերում իր բացատրությունը առկա չէ, ուստի՝ անհրաժեշտ է նաև պարզել՝ ստացել են արդյոք իր կողմից ուղարկված գրությունը, թե՝ ոչ։

ԲԴԽ-ն որոշում կայացրեց նիստը հետաձգելու մասին։ Հաջորդ նիստը նշանակվել է սեպտեմբերի 30-ին՝ ժամը 17։00-ին։

Հեղինակ՝ Իզաբել Սահակյան

Աղբյուր` Փաստինֆո