Փաստ ինֆո

Ալիևը տեսնում է, որ ունենք ծնկաչոք վիճակում գտնվող իշխանություն, որը խաղաղություն է մուրում, հետևաբար այդ խաղաղություն մուրալն էլ ունի իր վճարման գինը, մասնավորապես՝ միջանցքի պահանջ: «Փաստինֆո»-ի հետ զրույցում ասաց Ադրբեջանի հարցերով փորձագետ Գառնիկ Դավթյանը՝ անդրադառնալով Ադրբեջանի նախագահի հայտարարություններին:

Նշենք, որ 44-օրյա պատերազմից մեկ տարի անց Ադրբեջանի նախագահն այսօր Հայաստանին նոր պատերազմով է սպառնացել և հայտարարել, թե իբր «իրենց համբերության բաժակը լցվում է», քանի որ Հայաստանը չի տալիս իր համաձայնությունը Զանգեզուրի միջանցքը բացելու մասով.

«Մենք դեռ համբերատար ենք՝ չնայած մեր համբերությունը նույնպես սահմաններ ունի: Ղարաբաղյան երկրորդ պատերազմը ցույց տվեց, թե ինչ է տեղի ունենում, երբ մեր համբերության բաժակը լցվում: Հետևաբար, մենք Հայաստանին հնարավորություն ենք տալիս կատարել նոյեմբերի 10-ի հայտարարության բոլոր պայմանները և գործել պատասխանատվությամբ»,- ասել է Ալիևը:

Փորձագետի խոսքով՝ Ալիևի այս հայտարարություններն ունեն հատուկ նպատակ՝ Հաստանի հասարակության շրջանում խուճապ առաջացնել և ստիպել, որպեսզի հասարակությունը համակերպվի իշխանության կողմից շատ այլ տարածքների զիջելուն:

Գառնիկ Դավթյանը շեշտեց նաև, որ Ալիևի սպառնալից հայտարարությունները նաև հայկական իշխանությունների միակողմանի խաղաղասիրական կոչերի հետևանք են.

«Խաղաղության թեզի ջատագովները, որոնք պնդում են, թե ադրբեջանցիների հետ պետք է խաղաղություն հաստատել, իմ կարծիքով, նրանք համարվում են ազգի թշնամի:

Այն հռետորաբանությունը, որն ադրբեջանցիներից է գալիս, այն ցուցադրական ծեծը, որը կազմակերպվել էր Սև լճի տարածքում հայ զինվորների նկատմամբ, նրանց ստորացնելը, դրանք տեսանկարահանելը և տարածելը, բոլոր այս գործողությունները վկայում են նրա մասին, որ թուրքի հետ հնարավոր չէ խաղաղություն, հատկապես՝ այս փուլում: Այս խաղաղության թեզի արդյունքում էլ գալիս է Ալիևի պահանջատիրական հայտարարությունները»,-ասաց զրուցակիցը և հավելեց՝ Ալիևը տեսնում է, որ ունենք «ծնկաչոք» վիճակում գտնվող իշխանություն, որը խաղաղություն է մուրում, հետևաբար այդ խաղաղություն մուրալն էլ ունի իր վճարման գինը, մասնավորապես՝ միջանցքի պահանջը:

Դիտարկմանը, որ 1994թ-ի Արցախյան պատերազմից հետո, երբ Հայաստանն էր հանդիսանում հաղթող կողմ, Ադրբեջանը խաղաղություն չէր խնդրում Հայաստանից, իսկ հիմա հայկական կողմի իշխանությունները մշտապես միակողմանի խաղաղության կոչեր են անում, փորձագետն ասաց.

«Ժամանակին մեր թերացումն է եղել, որ ավելի պահանջատիրական չենք եղել Ադրբեջանի մասով, հանդես ենք եկել ավելի շատ հաղթող պետության և գթասրտության դիրքերից, փորձել ենք հասկանալ թշնամու կոտրված վիճակը և շատ հարցերում ճնշում չենք գործադրել: Ալիևը լավ է գիտակցում, որ այս ողջ պատերազմը ծրագրած պարտություն էր Հայաստանի մասով, Փաշինյանից հետո ով էլ գա իշխանության, շատ փակագծեր են բացվելու և ժողովրդի մեջ այլևս պանիկա և պարտվող ոգի չի լինելու, դրա համար նա նպատակ ունի նման հայտարարություններով, հիշեցնելով նաև Ղարաբաղյան առաջին շարժումը, այն խմբերին, որոնք պայքարում են Հայաստանի համար ճնշել և թույլ չտալ, որ որևէ ուժ ձևավորվի ընդդեմ Ադրբեջանի»,-ասաց Գառնիկ Դավթյանը և ընդգծեց, որ խաղաղության միակողմանի կոչերը ավելի են ագրեսիվացնում հակառակորդի քայլերը և Ադրբեջանն ավելի է մեծացնում իր պահանջները:

Աղբյուր` Փաստինֆո