Փաստ ինֆո

Մարտունու շրջանի Մաճկալաշեն համայնքի մոտ գտնվող Ամարասի վանքի վրա կրկին տեղադրվել է Արցախի դրոշը:«Փաստինֆո»-ի հետ զրույցում ասաց Արցախի ԱԺ պատգամավոր Մետաքսե Հակոբյանը՝ հավելելով, որ տեղյակ չէ՝ ով է դրոշը տեղադրել.

«Դրոշը հանելն աբսուրդ էր: Մենք ի սկզբանե ասել ենք, որ վանքի վրա դրոշ պետք չէր դնել, բայց եթե դրել էին, պետք է չհանեին, քանի որ դա պարտության նշան է: Պատկերացրեք՝ մենք հիմա ինչ կարգավիճակում ենք գտնվում, որ մեր հաղթանակներն արդեն որոշում են դրոշ դնել-չդնելով»,-ասաց Մետաքսե Հակոբյանը:

Պատգամավորը նշեց, որ դրոշը կրկին տեղադրվել է բարձրացրած մեծ աղմուկի արդյունքում.

«Եթե այսօր թուրքը պահանջում է մեր դրոշն իջեցնել, վաղը գալու է, ասի՝ այս տարածքն իմն է, եթե փոքր բաները զիջում ես, մեծը հաստատ զիջելու ես: Կարողացանք հասնել նրան, որ իրենք ուղղակի հետ բերեցին դրոշը: Դիմել էինք նաև Արցախի Անվտանգության խորհրդին, ըստ երևույթին, նրանց միջամտությամբ էլ վերականգնվել է դրոշը»,-ասաց Հակոբյանը:

Մետաքսե Հակոբյանը նաև ընդգծեց, որ դրոշ հանելը չի եղել ռուս խաղաղապահները պահանջը, ինչպես նշել էր Մաճկալաշեն համայնքի ղեկավարը.

«Իշխանական կողմը ներկայացնում էր, թե դրոշ հանելը ռուսական կողմի պահանջն է եղել, ինչն աբսուրդ է: Ռուսական կողմը երբևէ նման պահանջ կամ հրահանգ չի ներկայացրել, ուղղակի Ադրբեջանի հիստերիայից հետո ռուսական կողմը տարբերակ էր առաջարկել, որ Արցախի դրոշը հանեն և Հայաստանի դրոշը դնեն, որպեսզի ադրբեջանցիները ձայները կտրեն: Մենք այդ օրը գնացինք Մաճկալաշեն, վեճի բռնվեցինք համայնքապետի հետ, որն ասում էր՝ ռուսները հրամայել են, պետք է արվի, ինչից էլ բնակիչները շատ բարկացել էին: Մենք բնակիչներին ասեցինք ճշմարտությունը, որ նման բան չկա, ռուսական կողմը երբևէ ոչ մի բան չի հրահանգում: Այս տեսակ հայտարարություներ անելով՝ Հայաստանի իշխանությունը նույն օրակարգն է տանում, ինչ՝ Ադրբեջանը, նսեմացնում է ռուս խաղաղապահների արած աշխատանքը»,-ասաց Արցախի պատգամավորը:

Ավելի վաղ հայտնել էինք, որ ադրբեջանցիները GPS-ով առաջացել են դեպի Ամարաս վանքի մոտ, հեռացրել վանքի վրա դրված Արցախի դրոշը:

Աղբյուր` Փաստինֆո