Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանը ժպիտով է վերաբերում իր նկատմամբ իրականացվող այս ամենին, քանի որ բոլորս հասկանում ենք, որ այստեղ գործ չունենք որեւէ իրավական գործընթացի հետ։ Այս մասին «Փաստինֆո»-ի հետ զրույցում ասաց Աղվան Հովսեփյանի պաշտպան Էրիկ Ալեքսանյանը։ Նրա արձանագրմամբ՝ Աղվան Հովսեփյանի նկատմամբ, փաստացի, քրեական հետապնդում հարուցվեց այն բանից հետո, երբ շատ տարբեր անձանց կողմից հիշատակվում էր վերջինիս անունը՝ պնդումներ կատարելով այն մասին, թե ինչու Աղվան Հովսեփյանի նկատմամբ չկա որևէ քրեական հետապնդում։

«Այսպես ասած, ոչ անակնկալի տեսքով, միայն նման բազմաթիվ պնդումներից և հայտարարություններից հետո, ստանում ենք այսպիսի շինծու և իրավաբանության հետ աղերս չունեցող մեղադրանքներ»,- նշեց Ալեքսանյանը՝ հավելելով, որ մեղադրանքների անհիմն լինելու մասին բոլոր հիմնավորումները կներկայացվեն առաջիկայում։

Ինչպես արդեն տեղեկացրել ենք՝ Աղվան Հովսեփյանը ձերբակալվել է սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը դատավոր Մնացական Մարտիրոսյանի կողմից բավարարվել է։ Ընդ որում՝ մոտ 45 տարի իրավապահ կառույցներում ամենաբարձր ղեկավար պաշտոններ զբաղեցրած Աղվան Հովսեփյանին նախաքննական մարմինը չի կարողացել իր ծառայական գործունեության հետ կապված որևէ ապօրինություն մեղսագրել։ Նրան մեղադրանք է առաջադրվել ապօրինի ձեռնարկատիրական գործունեություն ծավալելու, ենթադրյալ փողերի լվացման հատկանիշներով։ Ընդ որում, կալանավորման որոշումը կայացնելիս անգամ դատարանն արձանագրել է, որ բացակայում է քննությունից թաքնվելու հավանականությունը, ու որպես կալանավորման հիմք մատնանշել նրա նախկինում զբաղեցրած բարձր պաշտոնները, թե,իբր, կարող է ազդել քննության վրա՝ առանց որեւէ փաստացի օրինակ մատնանշելու։

Փաստաբան Էրիկ Ալեքսանյանը «Փաստինֆո»-ի հետ զրույցում հայտնեց, որ Աղվան Հովսեփյանի՝ անազատության մեջ գտնվելը որևէ կերպ չի բխում Սահմանադրության 27-րդ հոդվածից, որովհետև կալանավորման որոշումն ուսումնասիրելիս, երևում է, որ այն հիմքերը, որոնք արձանագրվել են, մասնավորապես, գործի քննությանը խոչընդոտելու հիմքը, որևէ փաստական տվյալից չի բխում։ Ավելին՝ ամբողջ շեշտը դրված էր նրա վրա, որ Աղվան Հովսեփյանը, լինելով նախկինում գլխավոր դատախազ, ՔԿ նախագահ, իր՝ նախկինում զբաղեցրած պաշտոնից բխող իր հեղինակությունը, կապերն օգտագործելով քննության համար կարող էր խոչընդոտներ ստեղծել, մինչդեռ, փաստաբանի դիտարկմամբ, միայն նախկինում կառավարման ոլորտում զբաղեցրած պաշտոնը և անձի դրական հեղինակությունը և կապերը չեն կարող մեկնաբանվել ի վնաս, եթե նախաքննության մարմինը չունի գոնե գեթ մեկ փաստական տվյալ, որ այդ պաշտոնից բխող կամ հեղինակությունը, կապերն օգտագործելով Աղվան Հովսեփյանը քննության համար որոշակի խոչընդոտներ ստեղծել է։ Հետևաբար, միայն բացասական առումով՝ այդ կանխավարկածով նախաքննական մարմինը և դատարանները չեն կարող առաջնորդվել՝ քննության համար խոչընդոտներ ստեղծելու հիմքն արձանագրելու տեսանկյունից։
«Աբսուրդի ենք արդեն հասել, որ նախկինում անձի զբաղեցրած պաշտոնը կամ դրական հեղինակությունն ի վնաս է մեկնաբանվում»,- նշեց Ալեքսանյանը։

Նշենք, որ պաշտպանության կողմը վերաքննիչ բողոք է ներկայացրել՝ վիճարկելով Աղվան Հովսեփյանին կալանավորելու և նրա ձերբակալությունն իրավաչափ ճանաչելու մասին դատարանի որոշումը։

Պաշտպան Ալեքսանյանը, անդրադառնալով ձերբակալման իրավաչափությանը, նշեց, որ որպես պատճառ նշված է՝ կալանավորման միջնորդության քննության համար դատարան ներկայացնելը (ՀՀ քրեական դատավարության օրենսգրքի նոր կարգավորումների համաձայն հեղ.)։ Վարույթն իրականացնող մարմինն ունի հայեցողական երկու իրավունք՝ կարող է ծանուցել՝ մեղադրանք առաջադրելու, ապա կալանավորման հարցի քննարկման համար դատարան ներկայանալու համար և ձերբակալել։

«Փաստացի ունենք քննիչի կողմից երկու հայեցողական իրավունք, որոնցից մեկը բարենպաստ է անձի համար, մյուսը՝ ձերբակալությունը՝ ոչ։ Մարդու իրավունքների տրամաբանությունից ելնելով՝ անձի նկատմամբ պետք է կիրառվի քրեական հետապնդման մարմինների իրավունքների այն հայեցողական տեսակը, որն ավելի բարենպաստ է, եթե վարույթն իրականացնող մարմինը չունի համապատասխան վտանգ և ռիսկ, որը պետք է ամրապնդված լինի որոշակի փաստական տվյալներով, որ այդ բարենպաստ իրավունքի իրագործումը չի ծառայի իր նպատակին »,- նշեց Ալեքսանյանը՝ հավելելով, որ Աղվան Հովսեփյանի պարագայում, որը գիտի, որ 2019թ իր նկատմամբ փաստացի հետապնդում էր իրականացվում և որևէ ոչ իրավաչափ գործողություն չի կատարել, ավելին՝ 2019թ հրավիրել են հարցաքննության՝ պատշաճ ներկայացել է, ապա ո՞ր փաստական տվյալն էր ստեղծում այն վտանգը և ռիսկի ենթադրությունը, որ այս դեպքում, Աղվան Հովսեփյանին նախաքննության մարմին հրավիրելու դեպքում կարող էր չներկայանալ։

Ալեքսանյանն ընդգծեց, որ Աղվան Հովսեփյանի ձերբակալությունն այնքանով էր ոչ իրավաչափ, որ վարույթն իրականացնող մարմինը չուներ որևէ փաստական տվյալով ամրապնդված ռիսկ և վտանգ այն տեսանկյունից, որ Աղվան Հովսեփյանը չէր ներկայանա, հետևաբար, այս գործողությունը եղել է ինքնանպատակ։

Ինչ վերաբերում է Աղվան Հովսեփյանի մասնակցությամբ քննչական գործողություններին, Ալեքսանյանը նշեց, որ հրաժարվել են ցուցմունք տալուց։ Փաստաբանի փոխանցմամբ՝ պաշտպանության կողմի դիրքորոշումն այնպիսին է, որ չեն պատրաստվում ցուցմունք տալ, սակայն դա ամենեւին չի նշանակում, որ չունեն փաստարկներ կամ կա որևէ մտավախություն, այլ դա բացառապես իրենց իրավունքն է՝ որոշել, թե դատավարության որ փուլում են ցանկանում ցուցմունք տալ կամ չտալ։

«Ներկա պահին գտնվում ենք ապացույցների ծանոթացման փուլում այնքանով, որքանով տրամադրվել է կալանքի միջնորդությանը կից և, այդ ամբողջը վերլուծելով, տեսնելով քննությանը ընթացքը, հնարավոր է նաև, որ դիրքորոշումն այդ մասով փոխվի, սակայն տվյալ դեպքում մեր կողմից ցուցմունք չտալը որևէ կերպ չի կարող մեկնաբանվել փաստարկների բացակայության հանգամանքով։ Մենք բոլոր հարցերի պատասխաններն էլ ունենք, ուղղակի կորոշենք, թե որ փուլում, կոնկրետ ինչ հանգամանքներում ՝ բոլոր հարցերի պատասխաններն էլ սպառիչ կտանք և բոլորը կհամոզվեն, որ այստեղ առհասարակ չկա գործ և հիմնավորված մեղադրանք » ,- նշեց Ալեքսանյանը։

Անդրադառնալով մամուլում շրջանառվող լուրերին, թե իշխանությունները պատրաստ են գործարքի գնալ, առաջարկել են վճարել քրեական գործով նախնական հաշվարկված գումարը վճարելու և պետական բյուջե վերադարձնելու դեպքում ազատ արձակել, արդյո՞ք նման առաջարկ ստացվել է՝ Ալեքսանյանն արձագանքեց՝ նշելով, որ Աղվան Հովսեփյանն իրեն նման տեղեկատվություն չի հաղորդել, հետևաբար, կարող է ասել, որ վերջինիս հետ որևէ մեկը նման խոսակցություն չի ունեցել, ավելին, Աղվան Հովսեփյանի տեսակը ճանաչելով, կարող է ասել, որ նրա սկզբունքներն այնպիսին են, որ ինքը երբեք չի անի մի բան՝ ինչ-որ բանի դիմաց։

«Դա միգուցե այլ մարդկանց տեսակին է բնորոշ, բայց ոչ Աղվան Հովսեփյանի»,- ընդգծեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո