Փաստ ինֆո

Նոյեմբերի 9-ից անցել է 10 ամիս, մեր տղաների ճակատագիրն այդպես էլ մնում է օդում կախված։ Չենք կարող ապրել այնպես, ասես ոչինչ չի պատահել, չենք կարող ձևացնել, թե այս խնդիրն օրակարգային չէ։ Ինչ է արվում՝ մեր ռազմագերիներին օր առաջ վերադարձնելու համար և խնդրում եմ չասեք, որ տղաները մեզ կներեն, եթե երկու ամիս էլ ավել մնան։ Այդ երկու ամիսն այլևս երկու ամիս չէ, չեն ների, իսկ այն պայմաններում, ինչ պայմաններում նրանք պահվում են՝ նույնիսկ մեկ օր ավել չեն կարող գտնվել։ Այս մասին ԱԺ նիստին ասաց «Հայաստան» խմբակցության պատգամավոր Էլինար Վարդանյանը՝ դիմելով Նիկոլ Փաշինյանին։

Էլինար Վարդանյանը հիշեցրեց օրեր առաջ ՄԻՊ-ի և իրավապաշտպանների կողմից հրապարակած զեկույցը՝ հիմնված լուրջ փաստահավաք աշխատանքի վրա, որոնք ցույց էին տալիս, թե ինչ անմարդկային և ստորացուցիչ պայմաններում են պահվել և պահվում մեր ռազմագերիները։

«Որքան էլ հորդորեք այս դահլիճում չներկայացնել, չնկարագրել այդ խոշտանգումները, որոնց ենթարկվել և ենթարկվում են մեր գերիները, դրանից իրականությունը չի փոխվի։ ՄԻՊ-ը հրապարակել է զեկույց, որը հրապարակային է եղել և բոլորը հնարավորություն ունեին ծանոթանալու այն դաժան իրականությանը, որում գտնվում են մեր ռազմագերիները» ,- նշեց Վարդանյանը՝ հավելելով, որ իրավապաշտպանների կողմից հրապարակվել են թվեր, համաձայն որի՝ Ադրբեջանի կողմից գերեվարված 38 անձ արտադատական գնդակահարությունների են ենթարկվել, ևս 30-ի վերաբերյալ տվյալներ են հավաքվում, նրանց տեսել են, լուսանկարահանել կամ տեսանկարահանել գերության մեջ, բայց նրանց գտնվելու վայրի մասին որևէ տեղեկություն չկա, նրանք ենթարկվել են հարկադիր անհետացման կամ սպանվել։

Նիկոլ Փաշինյանը հայտարարեց, թե տեղեկությունները, որոնք հիշատակվում են, առաջին հերթին հավաքագրվել են պետական մարմինների կողմից՝ ՄԻԵԴ-ում ՀՀ ներկայացուցչի, Դատախազության, ԱԱԾ-ի, ՊՆ-ի կողմից և գուցե դրանց վերաբերյալ մամուլի ասուլիսներ չեն տրվում, բայց ամենօրյա աշխատանքներ են տարվում։

Ինչ վերաբերում է անհայտ կորած զինվորների խնդիրներին, Փաշինյանը հայտարարեց, թե հենց կարգավիճակի անունը բխում է նրանից, որ անձի գտնվելու վայրը և ճակատագիրը պարզելու հետ կապված կան բարդություններ և սա ամենևին նոր երևույթ չէ ՀՀ-ի համար։ Նրա խոսքով՝ այսօրվա դրությամբ՝ այս պահի դրությամբ անհայտ է 243 հոգու գտնվելու վայրը։

«Արցախյան առաջին պատերազմից հետո 200-ին մոտ մարդ ունենք, որոնց գտնվելու վայրը մինչև այսօր չի պարզվել, նրանք շարունակում են համարվել անհայտ կորած»,- նշեց Փաշինյանը՝ հավելելով, թե ինչ հնարավոր է, արվում է։

Էլինար Վարդանյանը պարզաբանեց, որ խոսքը ոչ թե անհետ կորածների մասին է, այլ՝ բռնի անհետացածների մասին, ում տեսել են բանտերում, ինչից հետո նրանց վերաբերյալ որևէ տեղեկատվություն չկա, ենթարկվել են հարկադիր անհետացման և չի բացառվում, որ սպանվել են։

«Ես խոսում եմ այսօրվա խնդրի մասին, Դուք ասում եք՝ Արցախյան առաջին պատերազմի ժամանակ 200 անհետ կորածներ են եղել։ Շատ վատ է, որ եղել են, բայց ես ասում եմ այն բանի մասին, ինչի համար պատասխանատու եք Դուք՝ Ձեր իշխանությունը»,- նշեց Վարդանյանը։

Աղբյուր` Փաստինֆո