Փաստ ինֆո

Ազգային Ժողովում զույգ ընդդիմադիր պատգամավորական ֆրակցիաների ներկայացուցիչները ճակատամարտ են տալիս իշխանական՝ իմքայլական մեծամասնության դեմ՝ յուրաքանչյուր հարցում դեմ առնելով ուսապարկային մեծամասնության բութ պատին։

Իսկ հարցերը բազմաթիվ են՝ Արցախի հանձնաժողով ստեղծելուց մինչև ադրբեջանի բանտերում անմարդկային կտտանքների ենթարկվող հայ ռազմագերիների՝ շուտով տարին բոլորող խնդիր, առողջական լրջագույն խնդիրներ ունեցող հայտնի բժշկի հանդեպ՝ վրեժխնդիր-անմարդկային վերաբերմունքից Սյունիքի մարզում տեր ու տնօրինություն անող ադրբեջան, որ արդեն ուղեկալներ է դրել Հայաստան-Իրան, միջպետական ճանապարհի՝ Կապան-Գորիս հատվածում և ապօրինի գումարներ է գանձում իրանցիներից․․․Նաև՝ անկախության տարիների նվաճումները տոտալ ժխտող պահի իշխամություն, որ ժխտելով հանդերձ՝ անկախության օրվան նվիրված «գունագեղ ու մեծամասշտաբ» շոու է ուզում պարտադրել՝ այդպիսով իր մեղքերի բեռը փորձելով բարդել նաև ժողովրդի վրա։

Այս բոլոր հարցերում ուսապարկերի բութ պատը միաձայն է՝ փաշինյանական կենտրոնից ստացած հրահանգին համահունչ։ «Ոչ մի շեղում» դեռ չի եղել․․․Ընդդիմությունն իրենն է ասում, իշխանությունն՝ իրենը։ Թե ու՞մ շահն է սպասարկում ներկա իշխանությունը՝ ամենաճշգրիտ պատասխանը Սյունիքի Գորիս-Կապան ճանապարհին կատարվող խայտառակությունը տալիս է, դրանից ավելի է՞լ ի՞նչ պիտի լինի, որ պոռթկում լինի․․․

Այս ամենի խորապատկերում՝ ուշագրավ էր Երևանի ավագանու այսօրվա նիստը, որի հարցերից մեկը վերաբերվում էր «Երևանում աղբյուր-հուշակոթող տեղադրելու վերաբերյալ համաձայնություն տալուն։

Հարցի էությունն ու գաղափարաբանությունը, որ ներկայացրեց Երևանի քաղաքապետի խորհրդական Կամո Արեյանը, փաստում էր մեկ բան, այն, որ ցեղասպանության ժխտողականության գաղափարախոսներին, թուրքիայի հետ այս համատեքստում քիրվայություն անողներին, հայերի ցեղասպանությունն իրականացրած թուրքիայի մերժողականությունը որպես «դրական ազդակներ» ներկայացնող թուրք ներող-սիրողների ժամանակը սուղ է․․․

Քաղաքային իշխանությունը, ուր հիմնականում իմքայլականներ են, միաձայն կողմ քվեարկեց՝ համաձայնություն տալով Երևանի Օղակաձև զբոսայգու՝ Ալեք Մանուկյան փողոցի և Տ. Պետրոսյանի անվան շախմատի տան ետնամասին հարող կանաչապատ տարածքի կենտրոնական մասում Ազգային արժանապատվության ասպետներին /իմա՝ «Նեմեսիս» գործողության ասպետներին/՝ նվիրված աղբյուր-հուշակոթող տեղադրելու համար։ Խորհրդանշական հուշակոթողի /այն կլինի կոմպոզիցիոն գործ/ տեղադրման միջնորդությունը ներկայացվել է Հայոց ցեղասպանության վրիժառուների ժառանգների կողմից, հանգամանալի քննարկվել մասնագետների շրջանում։

Արեյանը հատուկ շեշտելով թվարկեց երևանյան բանուկ, կրթամշակութային այդ հատվածի՝ առանցքային շենքերն ու հուշարձանները՝ Երևանի պետական համալսարան, Ռադիոտուն, Լևոն Շանթի անվան դպրոց, Շախմատի տուն, Չարենցի հուշարձան․․․ Մի տեսակ ակամայից հիշում ես Չարենցի «Երկիր Նաիրին»՝ Բերդը, Վարդանի կամուրջը, Առաքելոց վանքը․․․

ԵՊՀ, Ռադիոտուն՝ թավշյա իշխանության համար նշանային այս շենքերը գուցե վերջիններիս համար կրկին ճակատագրակա՞ն են լինելու․․․․․․

«Նեմեսիսի» ասպետներին նվիրված հուշակոթողի տեղադրմանը՝ Երևանի ավագանու միաձայն կողմ լինելը հուսադրող է։ Երևանի քաղաքաՊետությու՞ն․․․

Ի լուր և ի տես աշխարհի՝ Հայոց ցեղասպանության կազմակերպիչների նկատմամբ արդարադատություն իրականացրած հերոսների հուշակոթողն ինքնին ասելիք է։ Մեծ, կարևոր ասելիք, որ անհետաձգելի անելիք, գործ է ենթադրում․․․

Հեղինակ՝ Ա․Ե․

Աղբյուր` Փաստինֆո