Փաստ ինֆո

Աշխարհաքաղաքական առումով՝ երկրորդ բևեռի կայացման քաղաքական գործընթաց է գնում: Եթե մինչ այս կար ռազմական և տնտեսական գործընթաց, հիմա քաղաքական վեկտորն է գնում: «Փաստինֆո»-ի հետ զրույցում ասաց ռազմական փորձագետ Հայկ Նահապետյանը՝ անդրադառնալով Ռուսաստանի և Բելառուսի՝ մեկ ընդհանուր խորհրդարան ստեղծելու գաղափարին:

Հիշեցնենք, որ Ռուսաստանի և Բելառուսի նախագահները համատեղ ասուլիսի ընթացքում հայտարարել են, որ Ռուսաստանն ու Բելառուսն ապագայում կարող են դաշնային խորհրդարան ունենալ:

Փորձագետի խոսքով՝ այս երկու երկրներն արդեն իսկ տարբեր ոլորտներում՝ տնտեսական, անվտանգային, ռազմական, համագործակցում են և ունեն համաձայնագրեր, հիմա գործընթացը գնում է քաղաքական ուղղությամբ, որի հենքն օրենքներն են՝ միասնական մեկ խորհրդարան ստեղծելու գործընթացը:

Հայկ Նահապետյանի դիտարկմամբ՝ այս ձևավորվելիք խորհրդարանի գործառույթը լինելու է տվյալ պետության մեջ մտնող ժողովուրդների արժեհամակարգի, ավանդույթների կրոնական հավատալիքների վրա հիմված օրենքներ մշակումը:

«Հետխորհրդային բոլոր հանրապետություններում Սահմանադրությունը և դրանից բխող օրենքները 1991թ-ից տրվել են Արևմուտքի կողմից, հիմա ՌԴ-ն Բելառուսի հետ ստեղծում է մեկ մարմին, որով ինքը իրավական առումով վերականգնում է իր ինքնիշխանությունը:Իրավական առումով՝ հետխորհրդային հանրապետություններն ինքնիշխան չեն, մեզ օրենքները, միջազգային կոնվենցիաները պարտադրվում են: Այս նոր կառույցը, ըստ իս, ստեղծելու է օրենքներ, որը հիմնվում է տվյալ պետության մեջ մտնող ժողովուրդների արժեհամակարգի, աշխարհաճանաչողության, ավանդույթների կրոնական հավատալիքների վրա:Ռուսաստանն ու Բելառուսն ասում են, որ վերջ է դրվելու դրսից իրենց պարտադրված օրենքների ընդունման՝ 1991թ-ից սկսված գործընթացը և կարծում եմ, ցանկացած երկիր, որն իրավական առումով ձգտում է վերականգնել իր ինքնիշխանությունը, պետք է այդ նոր միության անդամակցելու հայտ ներկայացնի»,-ասաց Նահապետյանը:

Իսկ թե Հայաստանին, որը նաև Ռուսաստանի ռազմավարական դաշնակիցն է, որքանո՞վ ձեռնտու կլինի ստեղծված աշխարհաքաղաքական իրավիճակում անդամակցել այս նոր ստեղծվելիք միությունը, փորձագետն ասաց.

«Հայաստանը գտնվում է աշխարհաքաղաքական տարբեր ուժերի բախման կիզակետում, որտեղ ազդեցության գերակայության համար ՌԴ-ին Թուրքիան ձեռնոց է նետել, վերջինս նաև ՆԱՏՕ-ի անդամ երկիր է և սպասարկում է ՆԱՏՕ-ի անդամ երկրների շահերը:

Հիմա մենք ընտրության հնարավորություն ունենք՝ չեզոքացնել Թուրքիայից մեզ եկող բոլոր մարտահրավերները՝ մեզ հոգեհարազատ, մեր արժեքների մեջ մտնող պետությունների հետ համագործակցությամբ:Մենք նաև պատմական փորձ ունենք՝ թշանամու դեմ համատեղ պայքարելու: Հայաստանը պետք է ընտրություն կատարի՝ Թուրքիայի՞ն է գերակայություն տալու, թե շատ թելերով կապված ՌԴ-ին, մենք այս ընտրության ճանապարհին ենք, բայց այդ ընտրությունը ժողովուրդը չի կատարելու, այլ՝ իշխանությունը»,-ասաց Հայկ Նահապետյանը:

Վերջինիս դիտարկմամաբ՝ Արցախի համար նույնպես շահեկան կլինի այս ստեղծվելիք միության կազմի մեջ մտնելը, այն առումով , որ այնտեղ բնակվող հայերի անվտանգությունը կապահովի և հայաթափման վտանգ չի լինի.

«Արցախի նման ևս մի քանի սուբյեկտներ կան, որտեղ չլուծված խնդիրներ կան, մասնավորապես՝ Վրաստան-Ռուսաստան հարաբերություններում կան կնճիռներ՝ ՀարվայինՕսեթիա և Աբխազիա, Հայաստան-Ադրբեջան հարաբերություններում կա կնճիռ՝ Արցախը, բայց այստեղ հարաբերությունների լավացման համար ջանքեր է գործադրում երրորդ կողմը՝ Ռուսաստանը, էլի շատ խնդրահարույց տարածքներ կան, հետևաբար այն պետույթունները, որտեղ կան տարածքային, էթնիկ, կրոնական վիճելի խնդիրներ , կարծում եմ, այդ պետությունները պետք է առաջին ստատուսով նոր միության մեջ մտնեն՝ Արցախը նույնպես, կարծում եմ, որ հենց սա է, որ անհանգստացնում է Ադրբեջանին: Այսօր մեզ համար գերակա խնդիր է, որ Արցախում հայ մնա, ուստի սա մեզ համար լավագույն տարբերակն է, հակառակ դեպքում՝ այնտեղ վաղ, թե ուշ հայաթափման գործընթաց է գնալու»,-ասաց Հայկ Նահապետյանը

Աղբյուր` Փաստինֆո