Փաստ ինֆո

Արմեն Չարչյանի վիճակը վատ է։ Իհարկե բժիշկ չեմ, բայց արտաքին տեսքը գնահատելով՝ կարող եմ ասել, որ շատ վատ է։ Լրագրողների հետ զրույցի ժամանակ այս մասին ասաց ԱԺ «Հայաստան» խմբակցության պատգամավոր Վահե Հակոբյանը։

Նշենք, որ «Հայաստան» խմբակցության պատգամավորներն այցելել էին հիվանդանոց՝ տեսակցելու Արմեն Չարչյանին, ում վիճակը երեկ կտրուկ վատացել էր և քրեակատարողականից տեղափոխել էին բժշկական կենտրոն։

«Այնտեղ բժիշկ չկար, բացի քրեակատարողական հիմնարկի աշխատակիցներից, որոնց թիվը շատ էր։ Նրանք մեզ ուղեցկեցին, ներկա էին սենյակում։ Այսօր ուրիշ մարդ չտեսանք։ Ինչքան հասկանում եմ՝ կարդինալ միջոցների են դիմել, որ շաքարի մակարդակն իջեցնեն»,-նշեց պատգամավորը։

Վահե Հակոբյանը նկատեց՝ Արմեն Չարչյանի հիվանդասենյակում շատ շոգ է և անիջապես արև է ընկնում նրա վրա. «Հիմա կազմակերպում ենք, որ օդափոխիչ սարք բերենք։ Հիվանդանոցում ասում են, որ ունեն, բայց եթե ունեն ինչու՞ տեղադրված չէ։ Հիմա նվեր կտանք հիվանդանոցին՝ խնդրելով, որ դա լինի Արմեն Չարչյանի հիվանդասենյակում»,-նշեց պատգամավորը։

Վերջինս հավելեց՝ Արմեն Չարչյանի տրամադրությունը լավ է, մարտական է տրամադրված։

Հարցին՝ որքա՞ն ժամանակ Արմեն Չարչյանը կմնա հիվանդանոցում, Վահե Հակոբյանն ասաց, որ կախված է նրա առողջական վիճակից։

«Համոզված եմ, որ հենց մի քիչ կայունանա նրա վիճակը, անմիջապես քրեակատարողական հիմնարկ կտեղափոխեն»,-ասաց Վահե Հակոբյանը։

Աղբյուր` Փաստինֆո