Փաստ ինֆո

Դաժանաբար ծեծի ենթարկված փոխգնդապետ Արա Մխիթարյանի գործով մեղադրյալ եղբայրները փորձում են պատասխանատվության սլաքներն ուղղել Մխիթարյանի ընկերների ուղղությամբ։

Ինչպես արդեն հայտնել ենք, Արա Մխիթարյանին դաժանաբար ծեծի ենթարկելու գործից անջատված մասը՝ մեղադրյալ Հարություն Գրիգորյանի վերաբերյալ, այժմ գտնվում է Արարատի և Վայոց Ձորի մարզերի ընդհանուր իրավասության դատարանի դատավոր Հարություն Պետրոսյանի վարույթում՝ ապացույցների հետազոտման փուլում։ Այսօր կայացած դատական նիստի ընթացքում հարցաքննվել են որպես վկա դատակոչված անձինք, այդ թվում՝ քրեական գործի առանձնացված մասով մեղադրյալ Զավեն Գրիգորյանը։ Վերջինս դատարանում՝ սույն վարույթի շրջանակներում հարցաքննվեց վկայի կարգավիճակով, սակայն ամբաստանյալի իրավունքներով՝ նկատի ունենալով, որ ունի մեղադրյալի կարգավիճակ։ Զավեն Գրիգորյանը սույն գործով ամբաստանյալ Հարություն Գրիգորյանի եղբայրն է, որն, ըստ մեղադրանքի, եղբոր՝ Զավեն Գրիգորյանի և մի խումբ անձանց հետ, ձեռքերով, ոտքերով և գործով դեռևս չպարզված առարկայով բազմաթիվ հարվածներ են հասցրել Արա Մխիթարյանի գլխին' նրա առողջությանը դիտավորությամբ պատճառելով կյանքին վտանգ սպառնացող ծանր վնաս։

«Փաստինֆո»-ի թղթակցի հաղորդմամբ՝ Զավեն Գրիգորյանն այսօրվա դատական նիստում պատմեց, որ դեպքի օրը՝ գիշերը, տանը քնած է եղել, երբ եղբայրը զանգել և կանչել է իրեն, իսկ եղբոր ձայնից զգացել է, որ ինչ-որ բան այն չէ։ Նրա փոխանցմամբ՝ երբ հասել է դեպքի վայր միջադեպն արդեն ավարտվել էր, փոխգնդապետն ընկած էր աստիճանների մոտ, իսկ շտապօգնության մեքենան դեռ չէր եկել։

Ըստ Զավեն Գրիգորյանի՝ փոխգնդապետի հետ գտնվող սպաներին, որոնք ներկա են եղել դեպքին, ասել է, որ զանգեն շտապօգնություն՝ պնդելով, թե մինչ այդ շտապօգնություն չէին կանչել։ Ընդ որում՝ ըստ Գրիգորյանի ցուցմունքի, ինքը երկու անգամ է հորդորել փոխգնդապետի ընկերներին, որ զանգեն շտապօգնություն՝ փորձելով մտայնություն ձեւավորել, թե ընկերները չեն ցանկացել ժամանակին ապահովել բուժօգնության ցուցաբերումը։

«Տուժողի ընկերներից մեկին երկու անգամ ասել եմ՝ կանչեն, մեկ անգամ ասեց՝ չեմ կանչել, երկրորդ անգամ հարցրեց՝ շտապօգնություն ինչ համարով են կանչում, ես էլ պատասխանեցի՝ 1.03, ինչպես Հայաստանի բոլոր քաղաքներում։ Դրանից հետո իմացել եմ, որ էլի չի կանչել»,- նշեց ամբաստանյալի եղբայրը՝ հավելելով, թե ինքը միջադեպին ներկա չի եղել։

Զավեն Գրիգորյանի ցուցմունքից հետո դատարանը որոշեց հետազոտել գործում առկա գրավոր ապացույցները, սակայն պաշտպանության կողմը միջնորդությամբ հանդես եկավ՝ ամբաստանյալ Հարություն Գրիգորյանի նկատմամբ ընտրված խափանման միջոց կալանավորումը գրավով փոխարինելու մասին։ Պաշտպան Լևոն Սահակյանը նշեց, որ Գրիգորյանին անազատության մեջ պահելը չի բխում գործի նյութերից, ՄԻԵԿ-ի մի շարք հոդվածներից։ Ըստ փաստաբանի՝ բացակայում է հիմնավոր կասկածը, գործում առկա բոլոր ապացույցներով փաստվել է, որ Հարություն Գրիգորյանից բացի Արա Մխիթարյանի հետ որևէ անձ չի եղել, իսկ ինչ վերաբերում է Զավեն Գրիգորյանի կողմից Արա Մխիթարյանին հարվածելու մասին ցուցմունքները, ըստ փաստաբանի, եղել են կեղծ։ Փաստաբանը գտնում է, որ քրեական գործով չկա գեթ մեկ փաստական հանգամանք, որով կարելի է գալ եզրահանգման, որ Գրիգորյանը կարող է խոչընդոտել գործի քննությանը՝ գտնվելով ազատության մեջ, իսկ գործով բոլոր վկաներն արդեն հարցաքննվել են դատարանում, այդ թվում՝ այն անձինք, որոնք ցուցմունք են տվել Գրիգորյանի դեմ։ Բացի այդ՝ պաշտպանը գտնում է, որ Գրիգորյանի մեղադրանքը պետք է վերաորակվի։ Հատկանշական է, որ պաշտպանության կողմը բարձրաձայնել է նաև տուժող կողմին աջակցելու հարցը՝ նշելով, որ Գրիգորյանն ամենաշահագրգիռ մարդն է Մխիթարյանի ապաքինման հարցում։

Փոխգնդապետ Արա Մխիթարյանի հայրը նշեց, որ իր որդու արյունը գումարով չի փոխելու, ոչինչ չի մոռանալու։ Մեղադրող դատախազ Մամիկոն Մարտիրոսյանն էլ առարկություններ ներկայացրեց՝ նշելով, որ գրավը կամ այլ խափանման միջոցը չի կարող ապահովել պատշաճ վարքագիծը, ուստի, միջնորդությունը ենթակա է մերժման։

Կողմերի դիրքորոշումը լսելուց հետո դատարանը մերժեց պաշտպանի միջնորդությունը։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում եւ արդեն շուրջ երկու տարի է, ինչ գտնվում է կոմայի մեջ։ Մամուլի տեղեկություններով, հարազատների պնդմամբ՝ փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ Տրդատ Սարգսյանը, որը հենց այս աղմուկի հետեւանքով հայտարարեց մարզպետի պաշտոնից հրաժարական տալու մասին։

Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները, այդուհանդերձ նախկին մարզպետին մեղադրանք չի առաջադրվել։ Քրեական գործով մեղադրանք էր առաջադրվել երկու անձի, որոնցից մեկի վերաբերյալ դրվագն անջատվել է և այժմ գտնվում է դատավոր Հարություն Պետրոսյանի վարույթում։

Հեղինակ՝ Իզաբել Սահակյան

Աղբյուր` Փաստինֆո