Փաստ ինֆո

Երևանի ընդհանուր իրավասության դատարանի դատավորներ Հայարփի Զարգարյանը, Հովիկ Շահնազարյանը եւ ՀՀվերաքննիչ քաղաքացիական դատարանի դատավոր Գոռ Թորոսյանը հեղինակել են «ՀՀ քաղաքացիական դատավարության օրենսգրքի իրավակիրառ պրակտիկան» ձեռնարկը, որը վերհանում է 2018 թվականից գործող քաղաքացիական դատավարության օրենսգրքի պրակտիկ խնդիրները, լուծումները և օրենսդրական փոփոխության առաջարկները։

Հեղինակների արձանագրմամբ՝  օրենքի թերությունների մասին իրավակիրառողը պետք է միշտ ասելու բան ունենա, մինչդեռ հաճախ օրենքներն ընդունվում են առանց դրանց պրակտիկ կիրառելիությունը ներկայիս իրողության պայմաններում փաստացի և լիարժեք պատկերացնելու։

«Այս աշխատությունը դատավորների խոսքն է՝ գործող օրենքի, իրավակիրառ պրակտիկայում դատավորների, փաստաբանների և իրավական հանրության այլ ներկայացուցիչների առջև ծառացած խնդիրների և դրանց լուծումները միասին գտնելու ուղղությունների մասին»,- «Փաստինֆո»-ի հետ զրույցում նշեցին  հեղինակները։

Ձեռնարկում  գրեթե բացակայում է տեսական մասը, բոլոր հարցերը ներկայացված են պրակտիկ տեսանկյունից, օրենսդրական հասկացությունները, որոնք վերլուծված են աշխատությունում, ունեն պրակտիկ կարևոր նշանակություն և այդ տեսանկյունից էլ անդրադարձ է կատարվել օրենսդրական եզրույթներին։

Մասնավորապես՝ տեղ են գտել  վերլուծություններ՝ ուղղված են դատական պրակտիկայի անհստակությունները և թերությունները շտկելուն, գործին մասնակցող անձանց և փատաբան-ներկայացուցիչների առջև ծագող դատավարական դժվարությունները հաղթահարելուն, որոնք ունեն ինչպես օրենսդրական, այնպես էլ՝ կիրառական հիմքեր։ 

Հեղինակները գտնում են, որ ձեռնարկում  վեր հանված  խնդիրներն առնվազն պատրաստի հիմք են դատնալու պրակտիկ փաստաբանների, դատավորների, դատախազների և թեմայով հետաքրքրվող այլ անձանց առջև դրանք քննարկման առարկա դարձնելու համար, որոշակի լուծումներ վեր հանելու, իսկ պրակտիկ լուծումներ չգտնելով՝ անդրադառնալու օրենսդրական փոփոխություններ կատարելու առաջարկներին՝ հետագայում դրանք կյանքի կոչելու և միանգամից բազմաթիվ խնդիրներ լուծելու ակնկալիքով։

Եթե դատական ակտերում դատավորների արտահայտած իրավական դիրքորոշումներն ունեն տարածման լոկալ նշանակություն՝ սահմանափակված լինելով գործին մասնակցող անձանց շրջանակով, և իրավակիրառ պրակտիկայի միատեսակություն և որոշակիություն չեն ապահովում, ապա այս աշխատանքում զետեղված են միայն պրակտիկ կիրառելիության տեսանկյունից խնդրահարույց նորմերի մեկնաբանությունները, լուծումներն ու դրանք փոփոխելու առաջարկները, որոնցից շատերը այժմ տեսանելի կարող են լինել նաև աշխատող յուրաքանչյուր իրավաբանի համար:

Աշխատանքի նպատակն է կանխարգելել իրավունքի հնարավոր չարաշահումները՝ նման դեպքերը բացահայտելով և դրանց դեմ օրինական և որոշակի լուծումներ առաջարկելով, ցույց տալու համար որ շատ հաճախ դատարանների նկատմամբ դժգոհություններն արհեստական բնույթ ունեն կրում, իսկ որոշ դեպքերում օրենսդրական թերի կամ խնրդահարույց կարգավորումներն են դրա պատճառները, ինչպես նաև՝ ապահովել դատավորների ներգրավվածությունը դատավարության ոլորտում առաջացող օրենսդրական խնդիրների լուծման գործընթացին, բարձրացնել ու ամրապնդել այս հարցում դատավորների դերն ու նշանակությունը, հեղինակությունն ու վստահությունը հասարակության առջև:

Արձանագրենք, որ ձեռնարկը գրվել է ոչ թե դրամաշնորհի շրջանակներում, այլ դատավորների նախաձեռնությամբ ու հրապարակվել սեփական միջոցներով։

 «ՀՀ քաղաքացիական դատավարության օրենսգրքի իրավակիրառ պրակտիկան» ձեռնարկի շնորհանդես-վաճառքն անցկացվելու է «Մոսկվայի տան»-ը (հասցե՝ ք. Երևան, Արգիշտի 7), ամսաթիվը՝ 2021 թվականի սեպտեմբերի 10-ին, ժամը՝ 19:00-ին:

Աղբյուր` Փաստինֆո