Փաստ ինֆո

Նման իրավիճակներ պետք է այլևս չառաջանան։ ԱԺ-ում լրագրողների հետ զրույցի ժամանակ ասաց «Քաղաքացիական պայմանագիր» խմբակցության պատգամավոր Արմեն Խաչատրյանը՝ անդրադառնալով խորհրդարանում տեղի ունեցած միջադեպին։

Դիտարկմանը, որ կանանց են քաշքշում, և նրանք վնասվածքներ են ստանում, Արմեն Խաչատրյանն ասաց. «Պետք է հաշվի առնել այն հանգամանքը, որ ձեր նշած կինը չի ենթարկվել պետական ծառայողի օրինական պահանջին։ Եթե պահանջին չեն ենթարկվում, աշխատում է հարկադրանքի մեթոդը։ Սա ընդունված պրակտիկա է և օրենքով է կարգավորված։ Տվյալ դեպքում պետական պահպանության ծառայության աշխատակցի գործողություններն իրավաչափ եմ գնահատում»,-ասաց պատգամավորը։

Անդրադառնալով նիստերի դահլիճում հնչող հայհոյանքներին, Արմեն Խաչատրյանն ասաց, որ իրենց խմբակցությունից որևէ մեկը չի հայհոյել։ Պատգամավորը հորդորեց տեսանյութերում ուշադիր ուսումնասիրել, թե հայհոյանքները որտեղից էին։

«Մեր խմբակցությունն այս միջադեպին չի խառնվել, և այն տեղի է ունեցել ՊՊԾ-ի և այն պատգամավորների միջև, որոնց նկատմամբ որոշում էր կայացվել հեռացնել դահլիճից»,-նշեց պատգամավորը։

Հարցին՝ ինչու՞ այսքան զորք սահմանին չեն կենտրոնացնում, այդ թվում Գեղարքունիքում, Սյունիքում, այլ ԱԺ-ում են կուտակում զորքին, Արմեն Խաչատրյանը նշեց, որ կարելի է բոլորին հավաքել ու տանել Սև լիճ.

«Սև լճում առկա են այնքան զինվորներ ու պաշտոնյաներ, որքան անհրաժեշտ են։ Այնտեղ գտնվում են այն մարդիկ, որոնք իրենց գործառութային պարտականություններից ելնելով գտնվում են այնտեղ։ ՊՊԾ-ն պետք է գտնվի իր տեղում, բժիշկը պետք է գտնվի իր տեղում»,-ասաց պատգամավորը։

Աղբյուր` Փաստինֆո