Փաստ ինֆո

Ազգային ժողովը քննարկում է ՀՀ կառավարության ծրագիրը: ՀՀ վարչապետ Նիկոլ Փաշինյանն իր ելույթում նշեց, որ տարածաշրջանային կայուն միջավայրի ձևավորումը և տարածաշրջանային ենթակառուցվածքների ապաշրջափակումը դիտվում է որպես ՀՀ անվտանգության ապահովման կարևոր գործոն։

«Տարածաշրջանի խաղաղությունը և կայունությունը մեր երկարատև ռազմավարությունն է։ Սահմանակից երկրների հետ հարաբերությունների խորացումը կամ կարգավորումը կառավարության արտաքին քաղաքականության կարևոր ուղղություններից է լինելու։ Թշնամության խորացումը սպառնալիք է տարածաշրջանի կայունության և անվտանգության համար։ Թշնամության հաղթահարումը կարող է դառնալ տարածաշրջանային արտաքին քաղաքական օրակարգի առանցք»։

Փաշինյանը նշեց, որ այս ասելիքը բազմաթիվ քննադատությունների է ենթարկվել ու վստահ է, որ էլի կենթարկվի, բայց ակնկալում է, որ քննադատությունների հեղինակները պատասխանեն կարևոր հարցի՝ «Ի՞նչ ենք մենք ուզում անել մեր տարածաշրջանային այն հարաբերությունների հետ, որում ահռելի թշնամական կոնտեքստ ու նույնիսկ պոտենցիալ կա»։

Փաշինյանը նշում է՝ խոսքը որևէ բան մոռանալու, ուրանալու և բարեկամանալու մասին չէ։ Խոսքը նրա մասին է, թե ինչ են անելու թշնամանքի մթնոլորտի հետ։ Բարդագույն հարցը ունի մի շարք քաղաքական, պատմական, բարոյական ենթատեքստեր ու հակասություններ։

«Առաջարկում եմ ինքներս մեզ նայել կողքից։ Մեր տարածաշրջանի մյուս պետությունները իրար նկատմամբ թշնամական զգացումներ չունեն։ ԻԻՀ-ն, Թուրքիան, Վրաստանը, Ադրբեջանը իրար գործընկեր ու բարեկամ են համարում։ Մենք բարեկամ ենք Իրանի և Վրաստանի հետ, բայց փաստը, որ մենք մեր տարածաշրջանում թշնամության օբեկտ ու սուբյեկտ ենք, անխուսափելիորեն ազդեցություն են ունենում տարածաշրջանում բարեկամ երկրների հետ մեր հարաբերությունների վրա։ Սա մեր օրակարգի խնդիրն է»,- ասաց Փաշինյանը՝ վստահեցնելով, որ խնդիրը պետք է լինի օրակարգում, առնվազն որպես հանրային դիսկուսի նյութ, ուստի պետք է լռեն գորգոռոցները ու հայհոյանքը, խոսի փաստարկը և վերլուծությունը։ Վարչապետը համարում է, որ սա ազգային անվտանգության խնդիրն է, օրակարգի հետ առնչվում են բոլորը։

Աղբյուր` Փաստինֆո