Փաստ ինֆո

Առաջիկա 5 տարվա ընթացքում պետք է Հանրապետությունում կառուցենք, հիմնանորոգենք առնվազն 500 մանկապարտեզ։ ԱԺ-ում կառավարության ծրագիրը ներկայացնելիս ասաց ՀՀ վարչապետ Նիկոլ Փաշինյանը։

«Եկեք պայմանավորվենք, որ երբ ասում ենք՝ պետք է մանկապարտեզ նորոգվի, սա նշանակում է՝ նորոգումից հետո երեխան այդ տարածքում օգտագործած գույք չպետք է տեսնի։ Նախկին գույքը, որ մեր ձեռքի տակ է, աճուրդով վաճառքի է հանվում և ում հետաքրքիր է այդ գույքը, թող առնի։ Մենք նպատակադրվել ենք մինչև 2026-ը նախադպրոցական հաստատություններում ընդգրկված 3-6 տարեկան երեխաների թիվը հասցնել 85 տոկոսի»,-ասաց Նիկոլ Փաշինյանը։

Վարչապետը նշեց, որ կառավարության նախագիծն ունի քաղաքական, տնտեսական, քաղաքակրթական նշանակություն։ Նիկոլ Փաշինյանը նկատեց՝ մանկապարտեզները պետք է ֆինանսավորվեն ՏԻՄ-ի կողմից, և այսօր մանկապարտեզների շինարարության ծրագիր են իրականացնում պայմանով, որ կառուցելուց հետո տեղական ինքնակառավարման մարմինները պետք է ապահովեն դրանց սպասարկումը։

«Լավ շենքը դեռևս չի նշանակում լավ մանկապարտեզ։ ՀՀ-ում ունենք նույնիսկ անսպասելի խնդիրներ։ Օրինակ բարերարը լավ նպատակով որևէ գյուղական կամ քաղաքային բնակավայրում ստեղծել է մանկապարտեզ, բայց այսօր Հանրապետությունում տասնյակից ավել այդպիսի մանկապարտեզներ կան, որոնց դռները փակ են, որովհետև շենքը կառուցել են, գույքով հագեցրել, բացումն արվել է, 1 ամիս աշխատել է, որից հետո հարց է ծագել, թե աշխատավարձերն ով է տալու, հոսանքի գումարն ով է վճարելու։ Հիմա մենք ասում ենք՝ ՏԻՄ-երը պետք է ապահովեն այդ մանկապարտեզների հետագա աշխատանքը»,-ասաց Նիկոլ Փաշինյանը։

Աղբյուր` Փաստինֆո