Փաստ ինֆո

Վերաքննիչ քրեական դատարանի դատավոր Արշակ Վարդանյանը հարցաքննվել և տուժող ճանաչվել՝ «Դոգ» մականունով հայտնի Վարդան Ղուկասյանի կողմից իրեն զրպարտելու, արդարադատության իրականացմանը խոչընդոտելու դեպքի առթիվ հարուցված քրեական գործի շրջանակներում։ Այս մասին «Փաստինֆո»-ի հետ զրույցում հայտնեց ՔԿ մամուլի խոսնակ Վարդան Թադևոսյանը։

Ինչպես արդեն տեղեկացրել ենք՝ Վերաքննիչ քրեական դատարանի դատավոր Արշակ Վարդանյանը հանցագործության մասին հաղորդում էր ներկայացրել ՀՀ գլխավոր դատախազին՝ «Դոգ»-ի կողմից հնչեցված զրպարտությունների վերաբերյալ։

Նյութերի նախապատրաստման ընթացքում պարզել էր, որ Ղուկասյանը տեղեկանալով, որ Մանախ մականունով հայտնի Արթուր Այվազյանին կալանավորելու որոշման դեմ բողոքը մակագրվել է Վերաքննիչ քրեական դատարանի դատավոր Արշակ Վարդանյանին, պատսպարված լինելով արտերկրում և կարծելով, որ կարող է անպատիժ մնալ, դատավորների և նրա ընտանիքի անդամների հասցեին հնչեցրել է սպառնալիքներ, հայհոյանքների ներքո պահանջել է կայացնել դատական ակտ, որի արդյունքում կալանքի տակ գտնվող Այվազյանը կհայտնվի ազատության մեջ, ավելին՝ նույնիսկ նման որոշում կայացնելու համար։ Այլ խոսքով՝ Վարդան Ղուկասյանը հրապարակավ սպառնալիքներ և հայհոյանքներ հնչեցնելով ուղղակիորեն միջամտել է տվյալ գործի քննությանը՝ փորձելով դրդել՝ կայացնելու իր ակնկալած որոշումը: Բացի այդ` զրպարտել է դատավորին` նրան մեղադրելով իր գործով, իբր, ապօրինի դատական ակտ կայացնելու մեջ:

Դատավորի կողմից ներկայացված հանցագործության մասին հաղորդման հիման վրա ՀՀ ոստիկանության 6-րդ վարչությունում հարուցվել է քրեական գործ՝ ՀՀ քրեական օրենսգրքի 332-րդ հոդվածի 1-ին մասի և 344-րդ հոդվածի 2-րդ մասի հատկանիշներով՝ արդարադատության իրականացմանը և քննությանը խոչընդոտելու և դատավորին զրպարտելու հատկանիշներով: Քրեական գործով նախաքննությունն իրականացվում է ՔԿ Երևան քաղաքի Շենգավիթ վարչական շրջանի քննչական շրջանի քննչական բաժնում։

Նշենք, որ «Դոգ» մականունով հայտնի Վարդան Ղուկասյանը 2015թ հուլիսի 23-ին դատապարտվել էր 4 տարվա ազատազրկման՝ շորթման եղանակով ուրիշի գույքի հափշտակման համար։ Մասնավորապես, ըստ քրեական գործի նյութերի, Ղուկասյանը մարմնավաճառությամբ զբաղվող կնոջից գումար շորթելու դիտավորությամբ հանձնարարել է իր մտերիմներից մեկին՝ տեսանյութեր նկարահանել հյուրանոցային համալիրներից մեկի մոտ պարբերաբար մարմնավաճառությանը զբաղվող կանանց վերաբերյալ։ Կնոջ մասնակցությամբ տեսանյութի նկարահանումից հետո կնոջից պահանջել են խոշոր չափերով գումար՝ սպառնալով, որ հակառակ դեպքում տեսանյութերը կտարածեն համացանցում։ Ընդ որում, դատաքննությունն իրականացվել է արագացված ընթացակարգով, հետևաբար, Վարդան Ղուկասյանն ինքն է դատարանում ընդունել իրեն մեղսագրվող մեղադրանքները։ Դատարանի կողմից կայացված վճիռը չի բեկանվել և մտել է օրինական ուժի մեջ։

Հեղինակ՝ Իզաբել Սահակյան

Աղբյուր` Փաստինֆո