Փաստ ինֆո

Վերաքննիչ քրեական դատարանը՝ դատավոր Տիգրան Սահակյանի նախագահությամբ, հեռացել է խորհրդակցական սենյակ՝ «Հայաստան» դաշինքի պատգամավոր, Սիսիանի համայնքապետ Արթուր Սարգսյանի նկատմամբ կալանավորումը որպես խափանման միջոց ընտրելու որոշման դեմ բողոքի վերաբերյալ որոշում կայացնելու։ Այն կհրապարակվի վաղը՝ ժամը 12։00-ին։ Այս մասին «Փաստինֆո»-ի հետ զրույցում ասաց փաստաբան Էմին Խաչատրյանը։

Ինչպես արդեն տեղեկացրել ենք՝ հուլիսի 17-ին առաջին ատյանի ընդհանուր իրավասության դատարանը բավարարել է Արթուր Սարգսյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։

Փաստաբան Էմին Խաչատրյանը «Փաստինֆո»-ի հետ զրույցում հայտնեց, որ առաջին ատյանի դատարանը կալանավորման հիմքերից հաստատված էր համարել գործի քննությանը խոչընդոտելու ռիսկը։ Կալանավորման որոշման դեմ ներկայացված վերաքննիչ բողոքով վիճարկվել է թե՛ հիմնավոր կասկածի առկայությունը, թե՛ կալանավորման հիմքերը։ Մինչ բողոքի բուն քննությանն անցնելը պաշտպանության կողմը բարձրաձայնել է նաև բողոքի մակագրման գործընթացի վերաբերյալ մտահոգություններ։ Մասնավորապես, ինչպես արդեն հայտնել ենք, շուրջ երկու շաբաթ է, ինչ Վերաքննիչ քրեական, Վերաքննիչ քաղաքացիական, Վարչական և Սնանկության, ինչպես նաև՝ Երևանի ընդհանուր իրավասության դատարաններում գործերի մակագրումն իրականացվում է ոչ թե էլեկտրոնային մակագրման համակարգի, այլ՝ դատարանների նախագահների կողմից, ինչը կասկածի տակ է դնում հատկապես քաղաքականապես զգայուն քրեական գործերով բաշխման ընթացքի վերաբերյալ օբյեկտիվությունը՝ հաշվի առնելով դատարանների նախագահների գործոնը։ Հատկանշական է, որ Սիսիանի համայնքապետ, «Հայաստան» դաշինքի պատգամավոր Արթուր Սարգսյանին կալանավորելու որոշման դեմ բողոքը Վերաքննիչ քրեական դատարանի նախագահ Տիգրան Սահակյանի ձեռքով է մակագրվել՝ հենց իրեն, ինչի առնչությամբ էլ պաշտպանության կողմը դատավոր Տիգրան Սահակյանին ինքնաբացարկ հայտնելու միջնորդություն է ներկայացրել։ Պաշտպանի փոխանցմամբ՝ դատարանում բարձրացրել են մտահոգությունները՝ կապված մակագրման ընթացքի հետ, սակայն երաշխիքներ այդպես էլ չեն ստացել, իսկ ներկայացված ինքնաբացարկի միջնորդությունը մերժվել է։

Ինչ վերաբերում է առաջադրված մեղադրանքին, ապա փաստաբանը հայտնեց, որ Սարգսյանն իրեն մեղավոր չի ճանաչում՝ արձանագրելով, որ մեղադրանքի որոշման մեջ նկարագրվածն իր հետ որևէ կապ չունի։ Բացի այդ՝ իր նկատմամբ իրականացվող հետապնդումը Սարգսյանը քաղաքական է համարում՝ կասկածի տակ դնելով, որ վարույթն իրականացնող մարմինն ունակ է օբյեկտիվ, պատշաճ քննություն իրականացնեք, ինչի մասին է նաև վկայում Սարգսյանի ապօրինի ձերբակալությունը։ Փաստաբանը նշեց, որ, թեև Սարգսյանը քննիչի մեկ զանգով ներկայացել էր վարույթն իրականացնող մարմին, նրան անմիջապես ձերբակալել են, որոշ ժամանակ անց՝ մեղադրանք առաջադրել։

Արթուր Սարգսյանի դեմ միայն մեկ անձ է ցուցմունք տվել, որը, պարզվում է, քրեական գործի ելքով շահագրգիռ կողմ է և, ինչպես հայտնեց փաստաբանը, Սարգսյանի հետ ունեցել են վատ հարաբերություններ։ Փաստաբանն այս փուլում զերծ մնաց մանրամասնելուց, թե ով է Սարգսյանի դեմ ցուցմունք տված անձը՝ նախաքննության գաղտնիությունից ելնելով, սակայն նշեց, որ նրանց միջև առերեսում չի եղել։

Հիշեցնենք, որ Արթուր Սարգսյանը մեղադրվում է ՀՀ Քրեական օրենսգրքի 308-րդ հոդվածի երկրորդ մասի (պաշտոնեական լիազորությունները չարաշահելը) և 314-րդ հոդվածի առաջին մաս (պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելը, կեղծում, քերվածք կամ այլ թվական գրառումներ կամ փոփոխություններ կատարելը, ինչպես նաև կեղծ փաստաթղթեր կազմելը կամ հանձնելը) հատկանիշներով: Վարույթն իրականացնող մարմինը միջնորդություն է ներկայացրել դատարան՝ Արթուր Սարգսյանի նկատմամբ կալանավորումը որպես խափանման միջոց ընտրելու մասին, որը բավարարվել է։

Հեղինակ՝ Իզաբել Սահակյան

Աղբյուր` Փաստինֆո