Փաստ ինֆո

Վերաքննիչ քրեական դատարանում արդեն երկրորդ օրն է, ինչ մակագրման ծրագրային համակարգը չի աշխատում, մակագրումներն իրականացվում են դատարանի նախագահի հայեցողությամբ: Այս մասին «Փաստինֆո»-ն տեղեկացավ փաստաբան Հովհաննես Խուդոյանից:

Նշենք, որ ԱԱԾ աշխատակիցներն այսօր խուզարկություն են իրականացրել Վերաքննիչ քրեական դատարանի շենքում և, ըստ շրջանառվող լուրերի, առգրավել են անգամ գործերի մակագրման համակարգիչը:

Ի դեպ՝ նախկինում գործերը, բողոքները, միջնորդությունները մակագրվում էին դատարանների նախագահների կողմից, սակայն օրենքով սահմանված կարգով այժմ թե՛ առաջին ատյանի, թե՛ վերաքննիչ դատարաններում գործերի մակագրումն իրականացվում է էլեկտրոնային մակագրման համակարգի միջոցով, ինչը նվազագույնի է հասցնում գործերի բաշխման գործընթացում մարդկային գործոնը: Ըստ մամուլում շրջանառվող լուրերի՝ փորձ է արվում քաղաքական հնչեղություն ունեցող գործերը յուրային դատավորներին մակագրել, դրանց թվում են Սյունիքի մարզի համայնքապետերի և ԲԴԽ նախագահ (լիազորությունները կասեցված են) Ռուբեն Վարդազարյանի գործերով վերաքննիչ բողոքները:

Հատկանշական է, որ Վերաքննիչ քրեական դատարանի նորանշանակ նախագահ Տիգրան Սահակյանը բավականին մոտ հարաբերություններ ունի ԲԴԽ նախագահի պաշտոնակատար, ՀՀ նախկին զինդատախազ Գագիկ Ջհանգիրյանի հետ և համարվում է դատախազության կամքը դակող դատավորներից մեկը;

Ռուբեն Վարդազարյանի իրավունքների և օրինական շահերի խախտումն արձանագրող դատական ակտի դեմ դատախազության բողոքի մակագրումը նախատեսված էր այսօր, սակայն համակարգում առկա խնդիրների պատճառով այն տեղի չի ունեցել: Փաստաբան Հովհաննես Խուդոյանը, որը ներկա էր նախատեսված մակագրման գործընթացին, նշեց, որ իրենց նախապես չէին տեղեկացրել, որ մակագրման համակարգը չի աշխատում: Նրա դիտարկմամբ՝ օրենքը որոշակի կանոններ սահմանում է դատարանի նախագահի կողմից մակագրումը, սակայն դա պատահականության սկզբունք չի ենթադրում, պետք է գործերը հավասարաչափ բաշխվեն, ինչը չի խանգարում, որ կոնկրետ գործը մակագրվի ցանկացած դատավորի:

Փաստաբանը ձեռնպահ մնաց մեկնաբանել մակագրման ծրագրի խափանման դիտավորությունը, որը համընկել է մի շարք կարեւոր գործերով ներկայացված բողոքների քննության ժամկետների հետ, բայց տարօրինակ որակեց, որ ծրագրային խնդրի մասին նախապես չեն ծանուցել, հայտարարություն չի տարածվել, ինչը կասկածի տեղիք կարող է տալ, բայց չի կարող պնդել՝ պատահականություն է, թե ինչ որ նպատակ են հետապնդում:

Հեղինակ՝ Իզաբել Սահակյան

Աղբյուր` Փաստինֆո