Փաստ ինֆո

Հատուկ հրահանգ էր իջեցվել, որ Գեղամ Նազարյանին բերման ենթարկեն՝ «ասֆալտին փռելով» և գլուխը գետնին սեղմելով, սա ուղղակի աբսուրդ է: Դատարանի դիմաց լրագրողների հետ զրույցում ասաց «Հայաստան» դաշինքի անդամ, անկախ պատգամավոր Աննա Գրիգորյանը:

Նա հայտնեց, որ բերման են ենթարկվել նաև «Հայաստան» դաշինքի այլ անդամները, որոնք հետո ազատ են արձակվել.

«Քաղաքական ռեպրեսիաների շարքը շարունակվում է: Իշխանությունները հասկանում են, որ «Հայաստան» դաշինքն այն ուժն է, որը կարող է իրավիճակ փոխել երկրում և ամեն կերպ փորձում են լռեցնել ընդդիմությանը»,-ասաց պատգամավորը:

Աննա Գրիգորյանը նաև նկատեց, որ իշխանությունը կանխատեսում է հնարավոր նոր պատերազմ, միևնույն ժամանակ Սյունիքի համայնքապետերին բերման է ենթարկում.

«Գրեթե սինքրոն աշխատանք է տարվում Ադրբեջանի ղեկավարության և մեր ղեկավարության կողմից, սա ուղղակի անհասկանալի և անթույլատրելի է»,-ասաց պատգամավորը:

Անդրադառնալով նաև Սիսիանի համայնքապետի կալանավորման միջնորդության քննությանը՝ նա համոզմունք հայտնեց, որ դատարանը նրան կալանավորելու որոշում կկայացնի:

Պատգամավորի արձանագրմամբ՝ թշանմին կարիք չունի սադրանքների միջոցով գործող իշխանությանը ստիպել, որպեսզի տարածքային զիջումների գնան.

«Այսօր Կառավարությունում նստած մարդիկ ինքնակամ պատրաստ են նոր տարածքներ հանձնել»,-ասաց Աննա Գրիգորյանը:

Աղբյուր` Փաստինֆո