Փաստ ինֆո

Պատերազմի արդյունքում վիրավորում ստացած մեր տղաների մի մասն այսօր արտասահմանում բուժում ստանալու անհրաժեշտություն ունի, մեր ռազմագերիները նույնպես առողջական խնդիրներ ունեն: Այս դեպքում պատգամավորական ծախսերն ավելացնելու փոխարեն եկեք այդ գումարն ուղղենք մեր վիրավոր տղաների բուժմանը, որպեսզի նրանց տեղափոխեն եվրոպական առաջատար կլինիկաներ, այնտեղ նրանց բուժենք: Այս մասին լրագրողների հետ զրույցում ասաց պատգամավոր Նաիրա Զոհրաբյանը:

«Այսօր մեր բզկտված տնտեսությամբ, բզկտված Հայաստանով և Արցախով այնքան առաջանհերթ խնդիրներ ունենք, որ պատգամավորին լրավճար տալը և պատգամավորական ծախսը բարձրացնելը համարում եմ անբարոյականություն»,-ասաց Զոհրաբյանը:

Նա ընդգծեց, որ երբ կլուծվեն հետպատերազմյա շրջանում առաջացած մի շարք խնդիրներ, դրանից հետո նոր միայն կարելի է մտածել բարձրաստիճան պաշտոնյաների աշխատավարձի մասին, որպեսզի կոռուպցիոն ռիսկերը նվազեն.

«Բայց այսօր դա պետք է լինի մեր 100-րդ խնդիրը, ոչ թե առաջնային խնդիր, որի համար հրավիրվել է հրատապ նիստ և փորձում են մեր ձեռքով հաջորդ խորհրդարանի պատգամավորների լրավճարի հարցը լուծել»,-ասաց պատգամավորը:

Նրա դիտարկմամբ՝ պատգամավորները փորձում են խուսափել «պարգևավճար» բառից և այս նախագծով փորձում են պարգևավճարն օրենքով ամրակայել.

«Այն գումարները, որ յուրաքանչյուր պատգամավոր լրացուցիչ 250.000 դրամ իր աշխատավարձին գումարած պետք է ստանա, այդ գումարները եթե մեկտեղվեն, մենք կկարողնանք շատ առաջնային և կարևոր խնդիրներ լուծել»,-ասաց Նաիրա Զոհրաբյանը:

Աղբյուր` Փաստինֆո