Փաստ ինֆո

Գերեվարված զինծառայողների հարազատները մեծ ուրախությամբ են ընդունել Փաստաբանների պալատի նախաձեռնությունը՝ Ադրբեջանում գտնվող հայ ռազմագերիներին իրավաբանական օգնություն տրամադրելու վերաբերյալ։ «Փաստինֆո»-ի հետ զրույցում հայտնել է գերեվարված զինծառայողի եղբայր Տիգրան Ամբարդարյանը։

Ինչպես արդեն տեղեկացրել ենք՝ գերեվարված մի շարք հայորդիների, նրանց թվում՝ հայաստանցիների, սփյուռքահայերի, Բաքվում մտացածին մեղադրանքներ են առաջադրել՝ ահաբեկչության համար ու սկսել դատական գործընթաց։ Փաստաբանների պալատը երեկ հայտարարեց, որ որոշել են դիմել Հայաստանի Հանրապետության իրավասու մարմիններին, Ադրբեջանի իրավասու մարմիններին, Ադրբեջանի փաստաբանների միությանը, ինչպես նաև միջազգային այլ կառույցներին՝ հայ ռազմագերիներին Հայաստանի Հանրապետության փաստաբանների միջոցով իրավաբանական օգնություն ցույց տալն ապահովելու, ՀՀ փաստաբանների մուտքը Ադրբեջան թույլատրելու և նրանց անվտանգությունը երաշխավորելու հարցերով:

Կառավարությունից դեռեւս արձագանք չկա, սակայն տղաների գերեվարումից 7-8 ամիս անց որոշել են ստեղծել հանձնաժողով։ Ընդ որում՝ նման քայլի գնացել են այն բանից հետո, երբ գերեվարվածների հարազատները անժամկետ նստացույց հայտարարեցին կառավարության մոտ։

Գերեվարված Մելս Ամբարդարյան եղբայրը՝ Տիգրան Ամբարդարյանը տեղեկացրել է, որ երեկ իրենց հետ հանդիպել են կառավարության ներկայացուցիչները՝ համաձայնելով ստեղծել ժամանակավոր հանձնաժողով, որը անընդհատ անմիջական կապ պետք է ունենա գերիների հարազատների հետ։ Վերջինս հայտնեց՝ տեղեկություն չունի՝ ովքեր են լինելու հանձնաժողովի կազմում, ո՞վ է նախագահելու։
Կառավարությունում ունեցած հանդիպումը Ամբարդարյանը բավարար է գնահատում։ «Եթե, իհարկե, իրենց պարտականությունները, խոստումները կատարեն»։

Գերեվարված շիրակցիների հարազատները պահանջել են, որ կառավարությունը մշտական և անմիջական կապ ունենա գերիների հարազատների հետ։

«Պետք է մեկը միշտ լինի Գյումրիում, ամեն օր հանդիպի ծնողներին, հաշվետվություն տա կատարած աշխատանքի համար և խնդիրները կատարի։ Պետք է մի քիչ էլ ըմբռնմամբ մոտենանք մի շարք հարցերի՝ ամեն ինչին եսասիրությամբ չնայենք», - ասաց նա։

Նրա փոխանցմամբ՝ իրենց համար կարեւոր է, որ իրենց հետ մշտական կապ ապահովող կառավարության ներկայացուցիչը չունենա քաղաքական հայացքներ։

«Էական է, որ նա կառավարության հետ կապ ունենա, բայց ոչ քաղաքական ուղղվածություն ունեցող մարդ լինի»,- ասել է Տիգրանը։
Ավելի վաղ հայտնել էինք, որ Շիրակից գերի ընկած որոշ տղաների հարազատները հունիսի 23-ի ուշ երեկոյան կառավարության մոտ նստացույց էին հայտարարել՝ վարչապետի պաշտոնակատար Նիկոլ Փաշինյանի հետ փակ հանդիպումից հետո, քանի որ արդյունքներն իրենց չէին բավարարել։

Հարազատները հայտարարել էին, որ կառավարության մոտ սկսված նստացույցն անժամկետ է՝ հայ ռազմագերիների նկատմամբ Բաքվում իրականացվող ապօրինի դատավարությունների կասեցման եւ գերիների անհապաղ վերադարձի պահանջով, իսկ հունիսի 24-ին հայտարարվեց նստացույցը դադարեցնելու մասին, քանի որ կառավարչության ներկայացուցիչները համաձայնել էին ընդառաջ քայլեր կատարել եւ ընդունել գերիների հարազատների ներկայացրած որոշ պայմաններ։

Աղբյուր` Փաստինֆո