Փաստ ինֆո

«Մի տեղամասում «Հայաստան» դաշինքի քվեները 10-ից դարձել են 100, եթե նման պատկեր լինի մնացած 70 տեղամասերում, որտեղ վերահաշվարկ է իրականացվում, ապա ԿԸՀ-ն մի քանի որոշումներ ընդունելու իրավասություններ ունի»,- «Արմնյուզ»-ի եթերում հայտարարել է սահմանադրագետ Վարդան Պողոսյանը։

Մասնավորապես՝ որոշումներից մեկով ԿԸՀ-ն կարող է ընդհանրապես անվավեր ճանաչել ԱԺ ընտրությունների արդյունքները կամ վերաքվեարկություն կազմակերպելու որոշում կայացնել այն տեղամասերում, որտեղ տեղի են ունեցել այնպիսի խախտումներ, որոնք հնարավորություն չեն տալիս վերականգնել ընտրության իրական արդյունքները։

«Այսինքն, ԿԸՀ-ն ունի բազմաթիվ լծականեր ու իրավական հնարավորություններ ընտրությունների արդյունքների վերաբերյալ իր որոշումը կայացնելու, որոնք վերաբերում են ոչ միայն թվաբանական եզրակացությանը, այլև գնահատելու իրավիճակը, խախտումների բնույթը»,- մանրամասնել է սահմանադրագետը։

Անդրադառնալով նախնական արդյունքների հիման վրա՝ երեք քաղաքական ուժերի միջեւ մանդատների բաշխմանը՝ Վարդան Պողոսյանը հայտարարեց, եթե հիմք ընդունեն ԿԸՀ կողմից հրապարակված քվեարկության նախնական արդյունքները, ապա «Քաղաքացիական պայմանագիր» կուսակցությունը ստանում է 71 մանդատ, «Հայաստան»-ը՝ 27 մանդատ, «Պատիվ ունեմ»-ը՝ 7 մանդատ։

«Սա կազմում է ընդհանուր առմամբ 105 մանդատ։ Քանի որ այս երեք ուժերի միջև մանդատների բաշխման արդյունքում ՔՊ-ն ստանում է մանդատների 2/3-ից ավելին՝ մոտ 67 տոկոս, իսկ 2/3-ը 66.6 տոկոսն է, ապա ըստ Ընտրական օրենսգրքի 96-րդ հոդվածի 2-րդ մասի անհրաժեշտ է, որպեսզի քաղաքական փոքրամասնությունը, այսինքն այն ուժը, որը չի հաղթել ընտրություններում ներկայացվածություն ունենա Ազգային Ժողովում ոչ պակաս, քան մանդատների ընդահանուր թվի 1/3-ը։

Հետևաբար, նորից եմ կրկնում նախնական արդյունքների հիման վրա, «Հայաստան» դաշինիքին պետք է հատկացվի լրացուցիչ 2 մանդատ, մաթեմատիկորեն դա 1.5 է, բայց պետք է հատկացվի, որպեսզի «Հայաստան» և «Պատիվ ունեմ» դաշինքների մանդատների ընդհանուր թիվը պակաս չլինի 1/3-ից»,- ասել է Վարդան Պողոսյանը եւ ավելացրել, որ այս պարագայում «պակաս» բառը խիստ կարևոր է, քանի որ նման խորհրդարանում ՔՊ-ն կամ պետք է ունենա մանդատների ուղիղ 2/3-ը, այն նույնիսկ չպետք էլինի 0.1 տոկոսով մեծ, իսկ ընդդիմության պարագայում մանդատները պետք է կամ հավասար լինեն 1/3-ի կամ կարող է մի փոքր ավելի լինել։
Ավելին՝ այս դեպքում ՔՊ-ն խորհրդարանում չի ունենա ձայների 2/3-ը։

«Ելնում ենք 105-2 մանդատից, ապա այդ պարագայում 71 ձայնը մեկ մանդատով արդեն պակաս է ունենալու 2/3 մեծամասնություն։

Քվեարկության արդյունքում մաթեմատիկորեն հնարավոր է, որ մեծամասնությունն ունենա 2/3, փոքրամասնությունն ունենա ուղիղ 1/3, և նման իրավիճակ էր 2018 թվականի խորհրդարանական ընտրությունների արդյունքում։ Մենք դե յուրե ունենք 132 մանդատով խորհրդարան, որից 88-ը պատկանում էր ՔՊ-ին, 44-ը՝ ԲՀԿ-ին ու ԼՀԿ-ին։

Մաթեմատիկորեն 88-ը ուղիղ 132-ի 2/3-ն էր, 44-ը՝ 1/3-ը։ Հիմա 107-ի պարագայում, քանի որ այն չի կարող բաժանվել 3-ի բացարձակ թվերով, մնացորդ է լինում, ստացվում է, որ 71 մանդատը դեռևս չի հասնում 2/3-ի, իսկ եթե չի հասնում, դա նշանակում է, որ ՔՊ-ն ապագա խորհրդարանում չի կարողանա Սահմանադրություն փոխել, իմպիչմենտի գործառույթներ իրականացնել, բոլոր այն լիազորությունները, որոնց համար անհրաժեշտ է ձայների 2/3-ը, ՔՊ-ն չի կարող իրականացնել արդեն իսկ հիմա։ 71 մանդատի դեպքում արդեն իսկ չի կարող»,- ասաց Վարդան Պողոսյանը, որը հանդիսանում է գործող Սահամանադվրության համահեղինակներից մեկը։

Աղբյուր` Փաստինֆո