Փաստ ինֆո

Նախընտրական փուլի ընթացքում հանրության համար առավել պարզորոշ դարձած հիմնական ֆավորիտ և մրցակից ուժերը՝ ՀՀ 2-րդ նախագահի գլխավորած «Հայաստան» դաշինքը և նիկոլ փաշինյանի ղեկավարած «Քաղաքացիական պայմանագիր» կուսակցությունն են, որոնք լուրջ ներկայություն կունենան առաջիկա արտահերթ ընտրությունների արդյունքում ձևավորված խորհրդարանում։ Մյուս քաղաքական ուժերի համատեքստում հստակ է, որ ձևավորվելիք խորհրդարանի մաս է կազմելու նաև «Պատիվ ունեմ» դաշինքը ։

Քաղաքական ուժերի նախընտրական հանդիպումներին՝ հայ հանրության ներկայությունը և այս կամ այն ուժին ներկայացվող պահանջները, ինչ-որ տեղ վկայում են այն վստահության մասին, որ ժողովուրդն ունի այս կամ այն ուժի հանդեպ։ Եթե սրան ավելացնենք քաղաքական ուժերին բնութագրող որակական շեշտադրումները /անվտանգային խնդիրների լուծում, բանակի վերակազմակերպում, զբաղվածության խնդիր և այլն/, և իրականացված սոցհարցումները, ըստ էության, կկարողանանք ձևավորել մի պատկեր, ուր երևակվում են նաև խորհրդարանում ստեղծվելիք դաշինքները, քանի որ այդ ամենի արդյունքում՝ արդեն տեսանելի է՝ որևէ ուժ միայնակ չի կարողանալու մեծամասնություն կազմել։

Բնականաբար, ազգային-պահպանողական ուժերի կոնսոլիդացիան ինչպես նախընտրական, այնպես էլ՝ հետընտրական զարգացումների համատեքստում անհրաժեշտ և ցանկալի գործոն է։ Ակնհայտ է, որ այս առումով «Հայաստան» և «Պատիվ ունեմ» դաշինքները կարևոր ճանապարհ ունեն միասին անցնելու։

Հետաքրքիր է, թե որո՞նք են օրենսդիր մարմնի խճանկարը ձևավորող մնացյալ քաղաքական ուժերը և որքանո՞վ կարող են վերջիններս օրենսդիր մարմնի անդամ դառնալ։

Դեռևս ՀՀ վարչապետի ժ/պ համարվող փաշինյանը այսօր մուրճը ձեռքին, ոստիկանների օղակում, տանովի ընտրողներով շրջագայելով մարզից մարզ և հանդիպելով կիսադատարկ դահլիճների ու հրապարակների՝ շատ լավ գիտակցում է, որ կապիտուլյացիոն պատերազմից հետո «իր» ժողովրդի մի զգալի հատվածին կորցրել է, ուստի բնականորեն լծվել է իրենից այլևս հիասթափված իր նախկին ընտրողների ձայները չփոշիացնելու և ի նպաստ իրեն օգտագործելու խնդիրը լուծելուն։

Այս առումով է ընտրված ՀՀ վարչապետ Վազգեն Սարգսյանի եղբայր Արամ Զավենիչը, որն արդեն տևական ժամանակ՝ իր բոլոր նախընտրական հանդիպումների և հարցազրույցների մեխն է դարձրել փաշինյանին 60-70 տոկոսանոց քվե վերագրելը։ Անշուշտ, սա այն դեպքն է, որ կարելի է ասել՝ «հավը երազում կորեկ է տեսնում»։

Ամեն դեպքում, Արամ Սարգսյանին է «չագուչ-նիկոլն» օգտագործում ապագա խորհրդարանում վերարտադրվելու և իր հետ դաշնակից որպես հանդես գալու համար՝ այդպիսով նաև ընտրությունները փորձելով տանել 2-րդ փուլ։ Թերևս, գիտակցում է, որ իր հետ դաշինք կազմելուց ի սկզբանե հրաժարված ՀՀ առաջին նախագահ Լևոն Տեր-Պետրոսյանի գլխավորած ՀԱԿ-ի շանսերը թույլ են խորհրդարան անցնելու համար, ուստի որոշել է ստեղծել իր անձնական դաշնակիցը։ Սակայն այսօր դժվար է ասել, թե վերջինիս որքանո՞վ կհաջողվի կատարել փաշինյանի պատվերը, որն, իրականում ունի նաև գաղափարական մաս՝ Շուշիում Վազգեն Սարգսյանի արձանը թողնելուց հետո այսպիսով նրան ևս մեկ հնարավորություն կտրվի դավաճանել եղբորը․․․

Մնացած քաղաքական ուժերին, այս ընտրություններում, ընդ որում, նաև՝ Ծառուկյանի ԲՀԿ-ին, իրականում վերապահված է շոգեքարշի վերջին վագոնների դերը։ ԲՀԿ-ի՝ ԱԺ-ում ներկայացված լինելն այսօր կանխատեսել դժվար է, իսկ մյուսների հետ կապված մեկ բան է հստակ՝ նրանց տոկոսները կբաշխվեն հերթականությամբ։

Աղբյուր` Փաստինֆո