Փաստ ինֆո

Ժողովրդից մկան նման գողացողները փորձում են Սյունիքը հակադրել Հայաստանին, իբր Սյունիքը և Հայաստանը տարբեր բաներ են: Այս մասին Սիսիանում քարոզարշավի ժամանակ հայտարարեց Նիկոլ Փաշինյանը.

«Նրանք անում են՝ բաժանիր, որ տիրես կարգախոսի ներքո, իրենց մի քանի կոպեկի համար: Մենք ասում ենք՝ ոչ, Հայաստանը միասնական է և միասնականությամբ է հզոր: Սյունիքը Հայաստան է այնքան, որքան Երևանը, Լոռին, Գյումրին, Տավուշը: Մենք կկտրենք Սյունիքը մնացյալ Հայաստանին հակադրելու փորձ անող ամեն մի ձեռք»,-ասաց նա:

Նիկոլ Փաշինյանը իր հետ Սյունիք էր տարել քարոզարշավի ընթացքում նվեր ստացած մուրճը և սպառնում էր, որ ընտրություններից հետո լինելու են զանգվածային աշխատանքից ազատումներ.

«Ձեր տված պողպատե մանդատով շատ տեղերից, ներառյալ Սյունիքից, այս մուրճով հանելու ենք ժանգոտած մեխերին, քաղաքապետարաններում ծվարած դուրսպրծուկներին, որովհետև Սյունիք նրանց համար հայրենիք չէ, այլ՝ մաքսային տերմինալ, դեպի օվշորային հաշիվները համալրող աղբյուր, ատկատներ անելու, ժողովրդի հաշվին իրենց ՍՊԸ-ների հաշիվները լցնելու միջոց: Այս մանդատով ջարդելու ենք նրանց բոլոր հաշիվները, ՍՊԸ-ները»,-ասաց Փաշինյանը:

Փաշինյանը հայտարարեց, որ հունիսի 17-ին, ժամը 20.00-ին ՔՊ-ն համապետական հանրահավաք է իրականացնելու Հանրապետության հրապարակում, իսկ հունիսի 18-ին «ուղիղ զրույց»՝ քաղաքացիների հետ.

«Սա անում ենք հատուկ, որ պարտված ուժը, որն արդեն գիտակցում է, որ ջախջախիչ պարտություն է կրելու, ուզում է ոստիկանության դուբինկաների տակ ընկնել, որպեսզի հետագայում ստվեր գցի ընտրությունների լեգիտիմության վրա: Այս հաշվարկը հաշվի առնելով՝ նրանց այդ հնարավորությունը չենք տալու»,-հայտարարեց Փաշինյանը:

Աղբյուր` Փաստինֆո