Փաստ ինֆո

Ադրբեջանին հանձնելով ականապատ դաշտերի քարտեզները՝ Փաշինյանը հնարավորություն տվեց Բաքվին շատ արագ ականազերծել և վերաբնակեցնել Ակնայի տարածքը: Այս մասին «Փաստինֆո»-ի հետ զրույցում ասաց ռազմական փորձագետ Հայկ Նահապետյանը։

Նշենք, որ շաբաթ օրը Հայաստան վերադարձել է 15 ռազմագերի, որոնց ազատության դիմաց Հայաստանը Ադրբեջանին է հանձնել Ակնայի – Աղդամի ականապատ դաշտերի քարտեզները:

Նահապետյանը շեշտեց, որ, անշուշտ, նոր ռազմագերիների վերադարձի դիմաց նոր ականապատած դաշտերի քարտեզներ են հանձնվելու:

«Ադրբեջանը ստանում է հնարավորություն շատ արագ ականազերծել այդ տարածքները: Եթե այդ քարտեզները չլինեին, այդ ականազերծումը տարիներ կտևեր, այդ գործընթացը ենթադրում է հսկայական ծախսեր, և այդ ականազերծման ժամանակ միևնույն է կլինեին պայթյուններ և զոհեր: Այսպիսով պարզ է դառնում, որ տարիներ շարունակ ադրբեջանցիները հնարավորություն չէին ունենա վերաբնակեցման աշխատանքներ իրականացնել այդ տարածքներում: Նիկոլ Փաշինյանը ադրբեջանցիներին հնարավորություն է ընձեռում՝ արագ վերաբնակեցնել այդ տարածքները», - նշել է փորձագետն ու ընդգծել, որ Ակնան այն ուղղությունն է, որը Ադրբեջանը միշտ փորձելու է օգտագործել որպես հարվածային ուղղություն՝ ռազմական գործողություններ իրականացնելու համար:

«Երբ դու թշնամուն ընձեռում ես այդ տարածքում մարդուժի ու զինտեխնիկայի անարգել տեղաշարժի հնարավորություն, ապա դա իր մեջ ռազմական տեսանկյունից տարբեր ռիսկեր է պարունակում: Փաշինյանը Ադրբեջանին հնարավորություն է տալիս անհրաժեշտության դեպքում, այդ ուղղությամբ ևս Ստեփանակերտի վրա ռազմական գործողություններ իրականացնել», - ասաց Նահապետյանը:

Նա հիշեցրեց, որ նոյեմբերի 9-ին կնքված պայմանագրով, ռուս խաղաղապահ ուժերը Արցախում պետք է լինեն 5 տարի: Ընդ որում, այդ խաղաղապահ ուժերը չունեն միջազգային մանդատ:

«Այսինքն` անհրաժեշտության դեպքում, աշխարհաքաղաքական որոշ վայրիվերումների ընթացքում Ադրբեջանը և Թուրքիան կարող են պնդել, որպեսզի Ռուսաստանը Արցախից դուրս բերի իր խաղաղապահ ուժերը: Այսպիսի վտանգներ կան և այդ ռիսկերը առաջացան Արցախում մեր ապրող հայրենակիցների համար Փաշինյանի վարչակազմի և իր որոշմամբ: Այս տրամաբանությամբ ևս սպասվում է նոր ականապատ դաշտերի քարտեզների հանձնումը նոր ռազմագերիների դիմաց», - շեշտեց ռազմական փորձագետը:

Ինչ վերաբերվում է այն հարցին, որքանով էր համարժեք այս փոխանակումը, մեր հայորդիներին քաղաքական առեւտրի օբյեկտ դարձնելը՝ փորձագետը նկատեց, որ ոչ մի համարժեքության մասին խոսք անգամ գնալ չի կարող:

«Բանն այն է, որ 15 հայի վերադարձը մեր երկրի համար շատ կարևոր է: Սակայն, երբ դու թշնամուն տալիս ես հնարավորություն ականազերծել և օգտագործել այդ տարածքները, ապա Ադրբեջանի հարձակման դեպքում մեր զոհերը և վիրավորները, անգամ եթե մենք կարողանանք ջարդել թշնամուն, չափելի չեն լինի այն 15 մարդու հետ, որոնք վերադարձան: Չափելի չէ օգուտը, որը ստացավ Ադրբեջանը և այն վնասը, որը կրեցին Հայաստանը և Արցախը», - շեշտեց նա:

Նահապետյանը նաև ավելացրեց, որ հնարավոր էր ռազմագերիներին հետ բերել, և չհանձնել Ադրբեջանին ականապատ դաշտերի քարտեզները:

«Երկու տարբերակ կա, առաջինը` ռազմագերիների հարցով զբաղվում են տարբեր միջազգային կազմակերպություններ, այդ թվում նաև Կարմի Խաչի միջազգային կազմակերպությունը: Հայաստանի արտաքին գերատեսչության աշխատանքի ակտիվացումամբ միջազգային հարթակներում և օգտագործելով մեր ռազմավարական դաշնակից երկրի և մեր հարևան շահագրգիռ պետությունների հնարավորությունները, ճնշումներ էր պետք իրականացնել Ադրբեջանի վրա: Այսպիսով, մենք կկարողանայինք ակտիվացնել մեր ռազմագերիների վերադարձի հնարավորությունը: Դա դիվանագիտական և մարդասիրական ճանապարհն էր:

Երկրորդ տարբերակը` գերեվարել այն ադրբեջանցիներին, որոնք խախտելով ՀՀ պետական սահմանը առաջ են եկել Գեղարքունիքի և Սյունիքի տարածքում: Պետք էր գերեվարել այնքան մարդ, որքան այժմ գերեվարված է Ադրբեջանում և փոխարինել իրենց բոլորը բոլորի դիմաց սկզբունքին համաձայն», - շեշտել է Նահապետյանը:

Անի Մշեցյան

Աղբյուր` Փաստինֆո