Փաստ ինֆո

Այս ընտրությունների քարոզարշավը անշուշտ տարբերվում է բոլոր նախորդ ընտրություններից, որոնք անցկացվել են Հայաստանում: Առաջին հերթին նրանով, որ այս անգամ 26 քաղաքական ուժ է մասնակցում ընտրություններին, նախկինում նման բան չի եղել: Այս մասին «Փաստինֆո»-ի հետ զրույցում ասաց սոցիոլոգ Գևորգ Պողոսյանը:

Երկրորդ առանձնահատկությունն, ըստ նրա, այն է, որ քարոզարշավի համար ժամանակը շատ կարճ է՝ ընդամենը երկու շաբաթ, մինչդեռ հերթական ընտրությունների դեպքում քաղաքական ուժերին քարոզարշավի համար տրվում էր մոտ մեկ ամիս:

«Բանն այն է, որ այն կուսակցությունները, որոնք նոր են և ընտրողը չի ճանաչում, ժամանակ չունեն իրենց լավ ներկայացնել: Ես դեռ չեմ խոսում այն մասին, որ երկրում ձևավորվել է շատ լարված իրավիճակ, հետպատերազմյան իրավիճակ: Բացի այդ, պայքարը հիմնականում ծավալվում է երկու ուժերի՝ «Քաղաքացիական պայմանագիր» կուսակցության և «Հայաստան» դաշինքը: Սա երկու հարադիր բևեռներ են, քանի որ նրանք ովքեր կքվեարկեն, օրինակ «Հայաստան» դաշինքին, երբեք չեն քվեարկելու ՔՊ-ի օգտին և հակառակը», - շեշտել է սոցիոլոգը:

Մյուս առանձնահատկությունը լարվածությունն է, որի նախադեպը նախկինում երբեք չի եղել։

«Բանը հասնում է իրար հանդեպ վիրավորանքների, ատելության մթնոլորտի գեներացմանը: Դա բերում է նրան, որ ընտրողները, որոնց առանց այն էլ մոտավորապես 50% հակված չեն ընտրություններին մասնակցելու, ընդհանրապես չեն ցանկանա տանից դուրս գալ: Մենք ունեցել ենք 8 խորհրդարանական ընտրություններ, որոնք ապահովել են 50-58% մասնակցություն: Ամենամեծ մասնակցությունը եղել է 2012 թվականին` 62%: Որպես կանոն, ընտրողին ավելի շատ հետաքրքրում էին նախագահական ընտրությունները: Այս տարի շատերը հակված չեն մասնակցել ընտրություններին”, - ասաց նա:

Անդրադառնալով՝ քաղաքական ուժերի վարկանիշներին՝ սոցիոլոգը նկատեց, որ նկատվում է Քոչարյանի դաշինքի վարկանիշի աճի միտում։

«Կարծում եմ ակնհայտ է, ոչ մի կուսակցություն 50% ավել ձայն չի հավաքի, այդ թվում այս երկու բևեռները: Հետևաբար, կարծում եմ խորհրդարանի ներսում կստեղծվեն կոալիցիոն դաշինքներ: Իհարկե, պետք է գիտակցել, որ քաղաքում և գյուղում նախասիրություններն այս կամ այն քաղաքական ուժերի հանդեպ միշտ տարբերվել են: Երևանը ամենաքաղաքականացված էլեկտորատը ունի, քանի որ մարդիկ ավելի տեղեկացված են, կուսակցությունները գործում են հիմնականում մայրաքաղաքում:

Երևանում Քոչարյանի վարկանիշը աճում է և հնարավոր է շարունակի աճել: Իսկ գյուղերում հակառակ պատկերն է, այնտեղ միշտ քաղաքականորեն ավելի պասիվ են, երկու գլխավոր պատճառով` առաջինը գյուղի բնակիչները ինֆորմացված չեն, իրենց հասանելի չեն բոլոր հեռուստաալիքները: Իրենք հիմնականում նայում են Հ1-ը, «Արմենիան» և «Շանթը»: Մնացած բոլոր ալիքները, որոնք շատ կարևոր ինֆորմացիա են տալիս այդ մարդկանց հասանելի չեն: Երկրորդը` գյուղի բնակիչները կախված են տեղի ադմինիստրացիայից: Այդ դեպքում նա, ում ձեռքում է ադմինիստրատիվ ռեսուրսը, ավելի շատ ազդեցություն ունի գյուղի բնակչության վրա, իշխանությունները միշտ գյուղի բնակիչներին օգտագործել են լրացուցիչ ձայներ ստանալու համար: Դա շատ լուրջ ռեսուրս է, և եթե իշխանությունները այն ճիշտ օգտագործեն կկարողանան ստանալ մինչև 15-18% լրացուցիչ ձայներ են», - ասաց Պողոսյանը:

Նա ընդգծեց, որ ընտրությունների երկրորդ փուլը բացառել չի կարելի: «Հնարավոր է, որ Ազգային Ժողով անցած չորս կամ հինգ քաղաքական ուժերը չեն կարողանա միավորվել, կազմել մեծամասնություն և ընտրել վարչապետին և ձևավորել կառավարություն: Այդ դեպքում մենք գնալու ենք երկրորդ փուլին: Երկրորդ փուլում հնարավոր են անսպասելի միավորումներ, քանի որ բոլոր քաղաքական ուժերը հետևություններ կանեն և կարող են միավորվել, իրենց նպատակին հասնելու համար: Սակայն, որքան շուտ մենք դուրս գանք այս ճգնաժամից, այնքան լավ»,- եզրափակեց Պողոսյանը:

Հեղինակ՝ Անի Մշեցյան

Աղբյուր` Փաստինֆո