Փաստ ինֆո

Արտահերթ խորհրդարանական ընտրությունների քարոզարշավի ժամանակ առերևույթ ընտրակաշառք բաժանելու վերաբերյալ քրեական գործով մեղադրյալ, «Բարգավաճ Հայաստան» կուսակցության պատգամավորի թեկնածու Արամայիս Ապրոյանը մեղադրանքը չի ընդունում։ Այս մասին «Փաստինֆո»-ի հետ զրույցում ասաց փաստաբան Էմին Խաչատրյանը։

Ինչպես արդեն տեղեկացրել ենք՝ արտահերթ խորհրդարանական ընտրությունների նախընտրական քարոզարշավի ընթացքում առերևույթ ընտրակաշառք բաժանելու վերաբերյալ քրեական գործով ձերբակալվել է «Բարգավաճ Հայաստան» կուսակցության պատգամավորի թեկնածու Արամայիս Ապրոյանը։ Նրան ձերբակալելու մասին որոշման դեմ բողոք է ներկայացվել դատարան, սակայն մինչ դատարանը կքններ նրա ձերբակալման իրավաչափության հարցը, վարույթ իրականացնող մարմինը մեղադրանք է առաջադրել Արամայիս Ապրոյանին։

«Պարոն Ապրոյանը մեղադրանքի շուրջ հայտնել է, որ ինքը երբևէ որևէ մեկին ընտրակաշառք չի տվել, չի բաժանել, որևէ մեկին հրահանգ չի տվել»,- նշեց փաստաբանը՝ հավելելով, որ ամենայն հավանականությամբ կալանավորման միջնորդություն կներկայացվի դատարան, որը ամենայն հավանականությամբ, կքննարկվի ձերբակալելու որոշման դեմ բողոքի հետ միասին։

Իսկ թե ինչ Ապացույցներ կան մեղադրանքի հիմքում կամ ընդհանրապես կան, թե ոչ, առերես հարցաքննություններ տեղի ունեցել են, թե ոչ՝ փաստաբանը ձեռնպահ մնաց մանրամասնել՝ արձանագրելով. «օպերատիվ տվյալները, որոնք ըստ վարույթ իրականացնող մարմնի՝ ձեռք են բերվել, պետք է մանրակրկիտ ստուգման ենթարկվեն։ Եթե դրանց հիման վրա ձեռք բերվեն ապացույցներ՝ այլ բան, եթե ոչ՝ իրենց ոչնչով չեմ կարող օգնել»։

Այդուհանդերձ, փաստաբանը նշեց, որ խնդիրներ է տեսնում՝ քրեական հետապնդումը սկսելու փուլից մինչև հիմա՝ դատավարական տեսանկյունից՝ պատգամավորի թեկնածուի կարգավիճակից բխող և այլն, սակայն ավելի մանրամասն այդ ամենի մասին կխոսի առաջիկայում։

Հիշեցնենք, որ հունիսի 9-ին ՀՀ գլխավոր դատախազությունը հաղորդագրություն տարածեց՝ նշելով, որ նույն օրը ՀՀ ոստիկանության Գեղարքունիքի մարզային վարչության Գավառի բաժնում օպերատիվ տեղեկություններ են ստացվել այն մասին, որ հունիսի 20-ին կայանալիք ԱԺ արտահերթ ընտրություններին մասնակցող կուսակցություններից մեկի ներկայացուցիչների կողմից Գավառի տարածաշրջանի ընտրողներին բնամթերային տեսքով կաշառք է տրվել՝ նշված կուսակցության օգտին կողմ քվեարկելու համար: ՀՀ ոստիկանության Գեղարքունիքի մարզային վարչության Գավառի բաժնում դեպքի առթիվ հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 1-ին մասով և նույն հոդվածի 4-րդ մասի 1-ին և 2-րդ կետերով նախատեսված հանցագործության հատկանիշներով։ Քրեական գործի շրջանակներում ի սկզբանե ձերբակալվել էր երկու անձ, այդ թվում՝ Արամայիս Ապրոյանը։ Քրեական գործով ևս 6 անձի նկատմամբ կիրառվել է նույն խափանման միջոցը։

Քրեական գործի շրջանակներում մեղադրանք է առաջադրվել Արամայիս Ապրոյանին՝ ՀՀ քրեական օրենսգրքի 154.2-րդ հոդվածի 4-րդ մասի 1-ին և 2-րդ կետերով նախատեսված այն հանցավոր արարքի կատարման համար, որ վերջինս Գավառի տարածաշրջանի ընտրողներին սննդամթերքի տեսքով կաշառք է տվել նշված կուսակցության օգտին կողմ քվեարկելու համար: Ըստ առաջադրված մեղադրանքի` Ա. Ա.-ն, ընդգրկված լինելով կուսակցության պատգամավորի թեկնածուների ցուցակում և համակարգելով Գավառի տարածքային գրասենյակի աշխատանքները, նույն գրասենյակի քարտուղար Ս. Զ.-ի հետ, համաձայն նախապես կազմված ցուցակի, 2021թ. հունիսի 9-ին ՀՀ Գեղարքունիքի մարզի Գավառի տարածաշրջանի մի շարք ընտրողների տվել է 7000-ական ՀՀ դրամ արժողությամբ սննդամթերքի տեսքով կաշառք` 2021թ. հունիսի 20-ին նշանակված ՀՀ ԱԺ արտահերթ ընտրություններին կուսակցության օգտին կողմ քվեարկելու համար:

Նախաքննական մարմինը Ապրոյանին կալանավորելու մասին միջնորդություն է ներկայացրել դատարան։

Հեղինակ՝ Իզաբել Սահակյան

Աղբյուր` Փաստինֆո