Փաստ ինֆո

Հայ ազգային կոնգրեսի անդամներն այս պահին հանդիպում են Արցախյան պատերազմի մասնակիցների հետ։

Հանդիպման մեկնարկին ՀԱԿ փոխնախագահ Լևոն Զուրաբյանն ասաց, որ այս ընտրությունը հատուկ գործողություն է պետականության փրկության ուղղությամբ։

«Այս ընտրություններն իրականում արդյունք են պատերազմի։ Այն ազգերն են ուժեղ, որոնք կարողանում են իրենց զինվորին անհրաժեշտ պատիվը մատուցել, որոնք կարողանում են պետական հոգատարություն ցուցաբերել զինվորի, այն մարդու նկատմամբ, որն ամեն ինչ թողած գնացել և իր կյանքը վտանգի տակ է դրել, որ հայրենիքն ապրի»,-նշեց Լևոն Զուրաբյանը։

ՀԱԿ փոխնախագահի խոսքով պետությունը չպետք է լինի այնպիսին, ինչպիսին այսօր է։ Նա անդրադարձավ այսօր ադրբեջանցիների կողմից գերեվարվածին, նշելով․ «Տպավորություն է՝ մեր պետությունը, այսօրվա իշխանություններն ուղղակի հայտնվել են անօգնականության ճահճի մեջ։ Եթե խոսում ենք պետական հոգատարության մասին, առաջին հերթին պետք է ունենանք պետություն, բայց մոտեցել ենք այն շեմին, որ պետականությունը վնասված է։ Չեմ կարծում, որ դա բացառապես պատերազմի այս արդյունքների հետևանք է։ Իրականում մեր պետության թուլացումը կարելի էր ակնկալել այն մտածելակերպից, որ որդեգրել էին մեր իշխանությունները»,-ասաց ՀԱԿ փոխնախագահը։

Աղբյուր` Փաստինֆո