Փաստ ինֆո

Հայաստանում չկա իշխանություն, ինչից բոլորն օգտվում են, այդ թվում կրիմինալը, - անդրադառնալով միմյանց հաջորդող սպանություններին «Փաստինֆո»-ի եթերում հայտարարել է քաղաքական վերլուծաբան Արմեն Բաղդասարյանը եւ ավելացրել, որ նախկինում եւս եղել են սպանություններ, բայց ոչ քաղաքի կենտրոնում։

Ինչպես արդեն տեղեկացրել ենք՝ քրեական հեղինակությունների միջեւ հարաբերությունների պարզաբանումները տեղափոխվել են մայրաքաղաքի կենտրոնական փողոցներ, եթե օրեր առաջ Արմավիրում սպանվել էր քրեական հեղինակություն համարվող Դոն Պիպոյի, նույն ինքը Արթուր Ասատրյանի եղբայրը, ապա հունիսի 2-ին հենց Աբովյան փողոցում հրազենի գործադրմամբ փորձել են սպանել քյավառցի Ռաֆոյին, սակայն սպանվել է վարորդը։

«Սա վկայում է, որ պետական ինստիտուտները թույլ են գործում կամ ընդհանրապես անտարբեր են։ Ուժային կառույցները, ոստիկանությունը զբաղվում են ոչ այն գործով, որով պետք է զբաղվեն»,- ասել է Արմեն Բաղդասարյանն ու ընդգծել, որ այս իշխանությունները կոմպետենտ չեն որեւէ ոլորտում, կոմպետենտ չեն ոչ միայն մասնագիտորեն, այլ նաեւ չունեն բարոյահոգեբանական արժեհամակարգ։ Նրա դիտարկմամբ՝ այլ գնահատական դժվար է տալ մեր զինվորների մարմինների նկատմամբ Աբովյանի դիահերձարանում դրսեւորված անհարգալից վերաբերմունքին՝ պարկերով մարմինները նկուղում պահելու փաստին։
«Տպավորություն ունեմ, որ նրանց համար բացարձակ միեւնույն է, նրանց հետաքրքիր է միայն իրենց վարկանիշը եւ քաղաքական ապագան»,- ասել է վերլուծաբանն ու արձանագրել, որ այս իշխանություններն ընդհանրապես առաջնորդվում են քաղաքական շահերով եւ ոչ թե մարդկային, բարոյական արժեքներով։ Ավելին՝ նրա կարծիքով հենց այս իշխանությունների շահերից է բխում մեկը մյուսին հաջորդող սկանդալային իրադարձությունները

Մենք այսօր քննարկում ենք ամեն օր ստացվող խայտառակ նորությունները, իսկ իշխանություններին դա ձեռնտու է, որովհետև իրենք ամեն նոր սկանդալով մոռացության են մատնում նախկինը։ Արցախի օրինակն ակնհայտ է՝ մենք կորցրեցինք Հադրութ, Շուշի, աղմուկ բարձրացավ, հետո գերիների մասին սկսեցինք խոսել, բայց այս աղմուկն էլ մոռացվեց, երբ մտան ՀՀ տարածք եւ այդպես շարունակ, ասել է քաղաքական վերլուծաբան Արմեն Բաղդասարյանը։ Նրա խոսքով իշխանությունն ամեն ինչ անում է, որ ընտրությունները տեղի ունեն էմոցիոնալ ֆոնի վրա, ճղճղալով, մյուսներին հայհոյելով, նրանք այդ հարթությունում անպարտելի են, դեմագոգիա, պոպուլիզմ և այլն, իսկ լուրջ քաղաքական ծրագրային բանավեճի մեջ նրանք պարզապես մտնել չեն կարող, քանզի երեք տարի ձախողել են և ասելու բան չունեն։ «Անբովանդակ բանավեճում Նիկոլ Փաշինյանը բոլորի ատամները կջախջախի, բայց դա չի լինի բանավեճ, այլ լեզվակռիվ»։

Լրագրողի դիտարկմանը, որ այդ արժեհամակարգի կրող ուժն ասում է կա ապագա եւ որն է լինելու մեր ընտրությունը, դա է լինելու մեր ապագան՝ բանախոսը հույս է հայտնել, որ այս իշխանությունները չեն կարողանա վերարտադրվել։

«Վստահ չեմ, որ հունիսի 20-ին ընտրություններ տեղի կունենա, բայց եթե դրանք տեղի ունենան, ԱԺ-ում կլինեն Քոչարյանի ղեկավարած դաշինքը, «Պատիվ ունեմ» դաշինքը, ԲՀԿ-ն, հույս ունեմ նաև ՀԱԿ-ը, ինչպես նաև մոտ 15%-ով ՔՊ-ն»,- ասել է բանախոսը։

Նրա համոզմամբ՝ Փաշինյանը ընտրություններում պարտվելու է, բայց ինքնակամ չի զիջելու իշխանությունը, և չի բացառվում հետընտրական բախումներ և ձերբակալություններ։

Մանրամասները՝ տեսանյութում։

Աղբյուր` Փաստինֆո