Փաստ ինֆո

Վերաքննիչ քրեական դատարանում՝ դատավոր Ալեքսանդր Ազարյանի նախագահությամբ, այսօր լարված մթնոլորտում է ընթացել «Սասնա Ծռեր»-ն գործով բողոքների քննությունը. Ամբաստանյալներից մի քանիսը բացահայտ անհարգալից վերաբերմունք էին ցուցաբերում դատավորների նկատմամբ։

«Փաստինֆո»-ի հաղորդմամբ՝ Վերաքննիչ քրեական դատարանում «Սասնա ծռեր 1» գործով դատավճռի դեմ ներկայացված բողոքները քննվում են ամենաբարձր վարկանիշ ունեցող դատավորների կազմով՝ Ալեքսանդր Ազարյանի նախագահությամբ։ Դատարանի կազմում են նաեւ դատավորներ Մխիթար Պապոյանը, Սերգեյ Մարաբյանը։ Նախագահող դատավորը, օրենքով սահմանված կարգով, պարզաբանել է, որ դատավարության մասնակիցները կարող են ինքնաբացարկի միջնորդություն ներկայացնել ինչպես նախագահող դատավորի, առանձին դատավորների, այնպես էլ՝ դատարանի ամբողջ կազմի դեմ, և, թեև թե՛ պաշտպանության կողմի փաստաբանները, թե մեղադրող կողմը ինքնաբացարկի հիմքեր չեն տեսել, ամբաստանյալներից մեկը տեղից հայտարարեց, թե դատավորներից երկուսին ճանաչում է։

«Քանի որ դատավորները հանդիսացել են նախկին ռեժիմի հանցակից, կամակատարներ, դատել են բազում անմեղ քաղաքացիների, ազատազրկման են դատապարտել և հանդիսանում են շահագրգիռ կողմ, ինքնաբացարկ հայտնեք, եթե նորմալ դատավոր լինի, կզբաղվի էս գործով»,- հայտարարեց ամբաստանյալ, «Սասնա ծռեր» խմբավորման անդամ Արեգ Կյուրեղյանը՝ դիմելով Դատարանին։

Նախագահող դատավոր Ալեքսանդր Ազարյանն էլ արձագանքեց՝ հորդորելով ամբաստանյալին կոռեկտ պահել. «Ի՞նչ է նշանակում նորմալ դատավոր լինի, կասկածու՞մ ես դատարանի նորմալության վրա»։

Կյուրեղյանն էլ արձագանքեց, թե պարզ չի՞ արտահայտվել, ամեն ինչ արտահայտվել է շատ պարզ է և շատ կոռեկտ, դատարանը կարող է իր մասին դրսում ցանկացածից հարցնել և իմանալ, թե ինչ են ասում իր մասին։ Դատարանն էլ հորդորեց ամբաստանյալին՝ հայտարարություններ կատարելիս խորհրդակցել և համաձայնեցնել պաշտպանի հետ, ինքնաբացարկի միջնորդությունը ձևակերպել իրավաբանորեն, թե ՀՀ քրեական դատավարության օրենսգրքով սահմանված որ հիմքերով Դատարանը պետք է ինքնաբացարկ հայտնի։ Արեգ Կյուրեղյանն էլ պնդեց, թե դատարանը հանդիսանում է իրենց մյուս կողմի՝ մեղադրանքի կողմի հետ շահագրգիռ կողմ և դատավարությունն անաչառ անցկացնել չի կարող։ Կյուրեղյանի պաշտպանը հայտնեց, որ միջնորդությունն իր հետ համաձայնեցված չի եղել, ինքը տեղեկացված չի եղել ինքնաբացարկի միջնորդությունից և պետք է քննարկի իր պաշտպանյալի հետ։ Ամբաստանյալ Էդվարդ Գրիգորյանն էլ հայտնեց, որ բոլոր ամբաստանյալներն ունեն ինքնաբացարկի միջնորդություն։ Ամբաստանյալ Գրիգորյանը շարունակեց ներկայացնել միջնորդությունը՝ նշելով, թե օրենքները, որոնց հղում է կատարում դատարանը, ընդունվել է նախկին ռեժիմի օրոք և դատավորը ևս դատավոր է դարձել նախկին հանցավոր ռեժիմի օրոք, հետևաբար՝ հանդիսանում է այդ ռեժիմի մաս։ Ամբաստանյալներից մեկն էլ որոշեց դատարանի համար «միջնորդությունը» օտար լեզով՝ ռուսերենով, ապա հեգնեց. Հիմա հասկացա՞ք, թե՞ դատարանը իրավաբանական լեզվից բացի այլ լեզու չի՞ հասկանում։

Դատավոր Մխիթար Պապոյանն էլ նախազգուշացրեց ոչ կոռեկտ վարքագիծ դրսեւորող ամբաստանյալներին՝ նշելով, որ եթե շարունակվի դատարանի նկատմամբ նման վերաբերմունքը, ապա նրանց հանդեպ կկիրառվեն սանկցիաներ։

«Ձեզ հորդորում ենք, արդար դատաքննության սկզբունքն ապահովելու տեսանկյունից ճիշտ կլինի, որ ձեզ պահեք կոռեկտ և մասնակցեք դատաքննությանը։ Սա ընդամենը հորդոր, այլապես՝ օրենքի շրջանակներում դատարանը կիրականացնի իր լիազորությունները»,- նշեց դատավոր Մխիթար Պապոյանը՝ հավելելով, որ ցանկացածը կարող է ինքնաբացարկի միջնորդություն ներկայացնել, որի վերաբերյալ որոշում կայացվում է խորհրդակցական սենյակում, սակայն միջնորդությունը պետք է ներկայացվի իրավական հիմնավորմամբ։

Ամբաստանյալներից մեկն էլ նախ նշեց, որ իրենք ապստամբ են, ոչ թե՝ ամբաստանյալ։ Բացի դա՝ ամբաստանյալը նշեց, որ իրենք մարդկայնորեն են խոսում և չեն դիտարկում որպես դատավորներ։

«Ձեր երկրի ղեկավարը հայտարարել է, որ դատավորները վնգստացողներ են։ Դրա համար մենք մարդկայնորեն ենք խոսում, դուք մեզ համար դատավոր չեք, ընդամենը պետության հաշվին ապրող մարդիկ եք»,- հայտարարել է նա՝ հավելելով, թե ՀՀ սահմաններից ներս արդեն թուրքն է ապրում և այժմ դատարանում են, որ բացատրեն դա։ Դատավոր Սերգեյ Մարաբյանն էլ արձագանքեց՝ չեն կարող բացատրել։

Գործով ներգրավված պաշտպաններ Գրիգորյանը, Փոստանջյանը և Ծառուկյանը նշեցին, որ բացարձակ վստահություն ունեն սույն կազմի հետ։

Մինչ պաշտպանները դիրքորոշում էին հայտնում, ամբաստանյալներից մեկը շարունակեց թիրախավորել դատարանին., ինչի համար ենթարկվեց դատական սանկցիայի և 32 ժամով հեռացվեց դատարանից՝ դատավորներին վիրավորելու համար։

Հիշեցնենք, որ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, հունիսի 24-ին հրապարակել է «Սասնա ծռեր» գործով դատավճիռը, համաձայն որի՝ Արայիկ Խանդոյանի նկատմամբ քրեական հետապնդումը դադարեցվել է՝ մահվան հիմքով, Պավել Մանուկյանը մեղավոր է ճանաչվել՝ դատապարտվելով ազատազրկման՝ 7 տարի 8 ամիս ժամկետով, Վարուժան Ավետիսյանը՝ 7 տարի 4 ամիս, Մխիթար Ավետիսյանը 7, 5, Էդվարդ Գրիգորյանը՝ ՝6,5 տարի, Գագիկ Եղիազարյանը՝ 7 տարի 5 ամիս, Արեգ Կյուրեղյանը՝ 7 տարի 1 ամիս, Սեդրակ Նազարյանը՝ 8 տարի 2 ամիս ժամկետով։Նշենք, որ երկու ոստիկանի՝ Յուրի Տեփանոսյանի և Արթուր Վանոյանի սպանության մեջ մեղադրվող Սմբատ Բարսեղյանը, որի համար դատախազը պահանջել էր ցմահ ազատազրկում, դատապարտվել է ազատազրկման՝ 25 տարի ժամկետով, իսկ Արմեն Բիլյանը, որին մեղսագրվում էր ոստիկանության ծառայող գագիկ Մկրտչյանի սպանությունը, դատապարտվել է ազատազրկման՝ 4 տարի 11 ամիս ժամկետով։ Դատարանը, մասնավորապես, հիմնավորված չի համարել Բիլյանին սպանության համար առաջադրված մեղադրանքը եւ արդարացրել է նրան այդ մասով՝ հռչակելով վերջինիս անմեղությունը նրա մասնակցությունն ապացուցված չլինելու հիմքով։

Բիլյանը մեղավոր է ճանաչվել ՀՀ ՔՕ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 177-րդ հոդվածի 3-րդ մասի 1-ին և 2-րդ կետերով նախատեսված հանցագործությունների կատարման մեջ՝ կազմակերպված խմբի կողմից զենք-զինամթերք պահելու, կրելու, կազմակերպված խմբի կողմից պատանդ վերցնելու, կազմակերպված խմբի կողմից հրազեն շորթելու, կազմակերպված խմբի կողմից առանձնապես խոշոր չափերով գողություն կատարելու համար ։ Ավելին՝ Բիլյանի նկատմամբ ընտրված խափանման միջոց կալանավորումը փոխարինվել էր չհեռանալու մասին ստորագրությամբ՝ մինչև դատավճռի օրինական ուժի մեջ մտնելը, վերջինս ազատ էր արձակվել հենց դատական նիստերի դահլիճից։

Հեղինակ՝ Իզաբել Սահակյան

Աղբյուր` Փաստինֆո