Փաստ ինֆո

Նրանք տարբեր ռանգի են, տարբեր մաշկի գույն ունեն, տարբեր է նրանց կրթական ցենզը, սակայն նրանցից ոչ մեկին չի կարելի համարել պրոֆեսիոնալ քանզի եթե անգամ այն առկա էր, իրենք հեշտորեն դարձրեցին փալաս՝ սատանայի ոտքերի տակ։ Իսկ վերջինս այն տրորեց ու տրորեց բազմապատիկ։

Սատանայի գլխավոր երկու փաստաբաններն, անշուշտ, ՀՀ գլխավոր դատախազ Արթուր Դավթյանը և ՀՔԾ պետ Սասուն Խաչատրյանն են, ովքեր վերջին երեք տարիներին իրավական ոլորտն ուղղակիորեն իշխանության ոտքի կոխան դարձրին։

Սույն երկու «կարկառուն» իրավապահների գործունեությունը մտածող, բանական հայ մարդուն այլևս ոչ մի հնարավորություն չի թողնում դիտարկելու նրանց ո՛չ իրավական՝ մասնագիտական, ո՛չ մարդկային՝ բարոյական ու ազգային տիրույթում, քանի որ նրանք իրենց դրսևորեցին որպես իշխանության «կամակատարներ»՝ այդպիսով գրելով իրենց մեղադրական եզրակացությունը։

Արցախյան երկրորդ պատերազմի բազմադրվագ քրոնիկոնը բոլորի աչքի առաջ է, որի արդյունքում կապիտուլյանտը ազգի թիկունքում կնքեց կապիտուլյացիոն պայմանագիրը՝ բացառապես ի մտի ունենալով ադրբեջանի և իր անձնական շահերը և իսպառ անտեսելով Արցախը, Հայաստանն ու հայությանը։ Հետո՝ լծվեց բանակի, ՀՀ ԶՈՒ կազմաքանդման գործին։

Այսօր հայկական զույգ պետությունների՝ Արցախի և Հայաստանի ոչնչացման վերջնական ծրագրին է լծվել սատանան՝ արդեն Արցախն ու Հայաստանը կիլոմետրերով է որպես նվիրատվություն հանձնում ադրբեջանին՝ բազմաթիվ գյուղեր, ջրային և էներգետիկ ռեսուրսներ, ստրատեգիական նշանակության մեր բոլոր բարձունքները։

Այս մասին ԱԺ ամբիոնից հայտարարելով նա վստահեցնում է, թե Հայաստանի շահերից բխող փաստաթուղթ է պատրաստվում ստորագրել։ Ընդ որում, փաստաթուղթ, որի բովանդակությանը իրենից զատ ոչ-ոք տեղյակ չէ։

Այս փաստը չնչին իսկ տարակուսանք չի առաջացնում նրա փաստաբանների մոտ։

Ինչու՞ է ՀՀ ժամանակավոր պաշտոնակատար մեկը միայն իրեն հայտնի բովանդակությամբ փաստաթուղթ պատրաստվում ստորագրել՝ հայ ազգի թիկունքում, ո՞վ է նրան լիազորել նման պատասխանատվություն ստանձնելու։ Արդյո՞ք որևէ պետության, թեկուզ՝ վարչապետի ժամանակավոր պաշտոնակատար, ընդ որում՝ կրկին ապօրինի, իրեն նման գործառույթ կարող է վերագրել, մանավանդ, երբ վերջինիս անվստահություն է հայտնել ԱԺ-ն։ Ի վերջո, միջազգային պայմանագիրը չի՛ կարող ստորագրվել չանցնելով ՍԴ և Ազգային Ժողովի միջով, և եթե խոսքը գնում է տարածքների մասին, ապա պե՛տք է լինի հանրաքվե:

Թե՞ արագի մեջ ալիևն իր ուզածն է պոկում Հայաստանից, ալիևի կամակատարն էլ՝ իր գործած հանցագործություններն է փորձում օրինականացնելով պարտակել՝ փաստաբանների օգնությամբ։

Իսկ Հայաստանը որբի գլուխ է։

Սատանայի փաստաբանները հայ մարդուն իր անկախ պետության մեջ տարագիր դարձնելու, հայ զինվորին հայկական բանակում խեղճացնելու և կոտրելու դրվագները տեսնելով, չե՞ն մտածում, որ Հայաստանի իշխանությունը սեփական ժողովրդի հանդեպ իր իսկ պետության մեջ ցեղասպանություն է իրականացնում, նրանք մեզ հետ կատարվող դավադրությունների և Ռուանդայի ցեղասպանության միջև աղերսներ չե՞ն տեսնում։

Սատանան իր սև գործն է անում, իսկ անձնական փաստաբանները լծված են նրա շահերի պաշտպանությանը։ Ընդ որում, իրենց այդ գործը նրանք կատարում են նախևառաջ իրենց անգործությամբ, քանզի եթե Հայաստանի ու հայության շահերը պաշտպանելու լինեին, անզեն աչքով իսկ տեսանելի՝ բազմաթիվ դրվագներով հանցագործություններ կան, որոնց համատեքստում հարուցված քրեական գործերը միանգամից ԱԺ մտնելու և կապիտուլյանտ-դավաճանին ձերբակալելու առիթ ու պատճառ են։

Որքան էլ ցավալի է, այսօր ուժային ասելով մենք այլևս չենք կարողանում դիտարկել, որ «ուժային» բառի տակ մեկտեղվածները հանուն պետության ու պետականության, հանուն Ազգի գործունեություն ծավալողներն են։

ՀՀ գլխավոր դատախազ Արթուր Դավթյան, ՀՔԾ պետ Սասուն Խաչատրյան՝ նրանք Հայաստանի Հանրապետության կործանման առաջին մեղավորներն են, քանզի կարո՛ղ են կասեցնել կործանումը, բայց չե՛ն կատարում օրենքով ու Սահմանադրությամբ իրենց վերապահված գործառույթը։

Եվ այդպիսով նրանք իրենց ընտրությունն են կատարում՝ լինել՝ Հայաստանի Հանրապետությա՞ն, թե՞ սատանայի փաստաբանները։

Նրանք ընտրել են սատանային։

Աղբյուր` Փաստինֆո