Փաստ ինֆո

Ես սահմանին տիրող իրավիճակի լուծումը տեսնում եմ բանակցությունների ճանապարհով, բայց հաշվի առնելով մեր հարևանների կեցվածքը, չի բացառվում այնպիսի իրավիճակ ստեղծվի, որ ուժային միջոցով հարցը լուծվի: Այսօր լրագրողների հետ զրույցում ասել է «Իմ քայլը» խմբակցության պատգամավոր Հովիկ Աղազարյանը՝ անդրադառնալով Հայաստանի տարածք հակառակորդի ներխուժմանը:

Վերջինիս խոսքով՝ տեղի ունեցածը սահմանային միջադեպ է, որը չի կարելի բնութագրել որպես ռազմական գործողություն:

Հարցին՝ հնարավո՞ր է հայկական կողմը զիջումների գնա, Աղազարյանն ասաց. «Ոչ, ի՞նչ տարբերություն այդտեղ զիջումների կգնանք, թե՞ որևէ այլ տեղ զիջում անենք: Ադրբեջանի կողմից նախապայմաններ չեն դրվում, միակ կեցվածքը՝ որն ունի Ադրբեջանն այս պահին, դա այն է, որ՝ ըստ իրենց քարտեզների, դա համարվում է իրենց տարածքի մասը, բայց համադրելով մեր մոտ ունեցած քարտեզները, հստակեցված է , որ դա հայկական տարածք է»:

Անդրադառնալով Փաշինյանի հայտարարությանը, թե Հայաստանում գործում են Ադրբեջանի տեղեկատվական պայքարի գործակալներ, Հովիկ Աղազարյանն ասաց.

«Ես չեմ կարող մեկնաբանել վարչապետի այդ միտքը։ Քաղաքական իմաստով ես էլ կարող եմ գնահատական տալ: Գտնում եմ, որ մեր քաղաքացիների շարքում կան մարդիկ, որոնք միգուցե ոչ դիտավորյալ, բայց իրենց վարքագծով, իրենց պահվածքով անում են գրեթե նույնը, ինչ կանեին հատուկ գործակալները, իսկ այդտեղ հանցակազմ կա, թե չկա, դա իմ որոշելիքը չէ»,-ասաց պատգամավորը:

Հովիկ Աղազարյանը նաև նշեց, որ պատերազմի արդյունքները չի համարում պարտություն, այլ համարում է ցավալի իրողությունների արձանագրում։

«Մենք ունենք կորուստներ, որոնք շատ տարբերակներ կան վերականգնելու, իսկ Ադրբեջանի ջղաձիգ կեցվածքը վկայում է այն մասին, որ իրենք գոհ չեն պատերազմի արդյունքներից: Կարծում եմ Մինսկի խմբի շրջանակներում իրականացվող գործընթացների արդյունքում մենք լիարժեք հնարավորություն ունենք վերականգնել մեր կորուստները»,-ասաց պատգամավորը:

Աղբյուր` Փաստինֆո