Փաստ ինֆո

ԱՄՆ-ն ակտիվ ներգրավվածություն է սկսել ունենալ մեր տարածաշրջանում։ Նա փորձում է վերադառնալ արտաքին քաղաքական դաշտ, քանի որ Թրամփի նախագահության տարիներին որոշակիորեն դուրս էր մնացել այդ գործընթացներից։ «Փաստինֆո»-ի հետ զրույցի ժամանակ այս մասին ասաց միջազգայնագետ Սուրեն Սարգսյանը՝ անդրադառնալով Սալիվան-Փաշինյան հեռախոսազրույցին։

Դիտարկմանը, որ ԱՄՆ-ն այլևս չի օգտագործում «վիճելի տարածք» եզրույթը, Սուրեն Սարգսյանը նկատեց՝ ԱՄՆ-ի ակտիվության ֆոնը պետք է ապահովեն նաև պաշտոնական հայտարարությունները և դիրքորոշումների ներկայացումը։

«Պետքարտուղարության այդ անհաջող ձևակերպումից հետո (վիճելի տարածքներ), փորձ արվեց նախագահի անվտանգության հարցերով խորհրդականի մակարդակով խմբագրել նախկինում արված դիրքորոշումը։ Եթե այսուհետ նման ձևակերպումներ չլինեն, կարող ենք համարել, որ իրավիճակը շտկվել է և այլևս այդ տեսակ հայտարարություններ Վաշինգտոնից չեն լինի»,-նշեց Սուրեն Սարգսյանը։

Անդրադառնալով հարցին, թե ինչով են պայմանավորված Ադրբեջանի սանձարձակ գործողությունները և արդյոք չի վախենում գերտերությունից, Սուրեն Սարգսյանը նկատեց՝ բնականաբար այնքան չի վախենում, որքան մեր իշխանություններն են վախենում։ Պարզապես Ադրբեջանի մեջքին ամուր կանգնած է Թուրքիան և ճնշումների հիմնական մասը Թուրքիան իր վրա է վերցնում. «Այն ճնշումները, որոնք կարող են ազդել Ադրբեջանի վրա, Թուրքիայի միջոցով գոնե դրանց ինչ-որ մասը չեզոքացվում է։ Թուրքիան բոլոր ուղղություններով աջակցություն է տրամադրում Ադրբեջանին և ակնհայտ է, որ թուրքական գործոնը նույնպես լուրջ ազդեցություն է ունենալու նաև Ալիևի վարքագծի վրա»,-նշեց միջազգայնագետը։

Վերջինս նշեց, որ ադրբեջանցիների կողմից ՀՀ պետական սահմանը հատելու վերաբերյալ արձագանքներ եղել են Ֆրանսիայից և ԱՄՆ-ից։ Սուրեն Սարգսյանի կարծիքով մոտ օրերս գնահատական կհնչեցնի նաև Ռուսաստանը, քանի որ չի կարող անմասն մնալ. «Այս գործընթացը դեռևս կշարունակվի, մասնավորապես եթե Ֆրանսիան ասում է, որ խնդիրը տանելու է ՄԱԿ-ի անվտանգության խորհուրդ»,-նշեց Սուրեն Սարգսյանը՝ հավելելով, որ այս ամենի նպատակն Ադրբեջանի նկատմամբ ճնշումներ կիրառելն է, որոնց միայն մի մասը Թուրքիան կարող է չեզոքացնել։ Թե ինչ ազդեցություն այդ ճնշումները կարող են ունենալ, ժամանակը ցույց կտա։

Աղբյուր` Փաստինֆո