Փաստ ինֆո

««Նախկին» ես համարում եմ նաև Նիկոլ Փաշինյանին։ Նա նույնպես արդեն անվերադարձ անցյալում է»,- EurAsia Daily-ի տված հարցազրույցում հայտարարել է ՀՀ ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը՝ անդրադառնալով «նախկինների» եւ ՀՀԿ-ի հետ դաշինք կազմելու հայտարարության վերաբերյալ հարցին։

«Ես հիմա եւս հայտարարում եմ, որ անցյալին վերադարձ չի լինելու։ Ի դեպ, «Նախկին» ես համարում եմ նաև Նիկոլ Փաշինյանին։ Նա նույնպես արդեն անվերադարձ անցյալում է։ Հայ ժողովրդին էական վնաս է հասցրել փաշինյանական ՝ «սև-սպիտակների», «նախկին-նորերի», «յուրայինների-օտարների» բաժանելու մոդելը։ Ի դեպ, հենց Փաշինյանի թիմում ամենապատասխանատու պաշտոններում շատ են «նախկինները», այն էլ այնպիսի ծառայողական ցուցակներով, որ «ավելի նախկին» չի լինում»,- ընդգծել է Ա.Վանեցյանը։

Նրա խոսքերով՝ Հայաստանի արժանապատիվ ապագայի սպառնալիքն այնքան ակնհայտ ու մեծ է, որ պարտավոր են, մի կողմ դնել նախապատերազմական տարաձայնություններն ու պիտակավորումները և պայքարել երկրի ու ժողովրդի ապագայի համար։

«Ի դեպ, ՀՀԿ ղեկավար, Հայաստանի Հանրապետության երրորդ նախագահ Սերժ Սարգսյանի հետ մենք առաջին անգամ ծանոթացանք հենց Արցախում ՝ 2020 թվականի սեպտեմբերին, պատերազմի առաջին օրերին։ Եվ այդ ժամանակվանից մենք ընկերություն ենք անում»,- ասել է Վանեցյանը։

Անդրադառնալով ճանապարհների ապաշրջափակմանը և դրանով լարվածության հնարավոր թուլացմանը՝ նա նշել է, որ հարցը բազմաշերտ է, իրավիճակը պետք է դիտարկել առնվազն երկու հարթությունում։

«Սկսեմ երկրորդից։ Բնական է, որ նախագծերը տարածաշրջանային և աշխարհաքաղաքական հսկայական նշանակություն ունեն։ Դրանք վերպետական նախաձեռնություններ են ՝ ուղղված բոլոր կողմերի համար դրական արդյունքների։ Սակայն դրանց հասնելու համար անհրաժեշտ է քաղաքական կամք և հմուտ ու նպատակասլաց թիմերի լիարժեք ներգրավում։ Ցավոք, պետք է նշեմ, որ առնվազն Հայաստանի պարագայում ՝ ի դեմս Փաշինյանի, գործ ունենք մի գործչի և թիմի հետ, ովքեր անիրազեկության պատճառով ի զորու չեն նախագծել և իրականացնել անգամ առանձին գյուղի զարգացման ծրագիր»։

Վանեցյանը հավելել է, որ գործող իշխանությունը չի կարող իր առջև դրված նման նախագծերը կյանքի կոչել։ Մյուս հարթությունն էլ տարածաշրջանային կայունության, վստահության և այլ հարցերին է վերաբերում Նա ընդգծել է, որ այստեղ առկա է ցավոտ և մինչ օրս չլուծված խնդիր, չնայած ծայրահեղ հրատապությանը։

«Հնարավոր չէ լրջորեն մտածել վստահության մասին, երբ լուծված չեն հումանիտար հարցերը, հատկապես այն դեպքում, երբ դրանց լուծման պարտավորություններն ամրագրված են եռակողմ համաձայնագրում»,- նշել է «Հայրենիք» կուսակցության նախագահն ու հավելել, որ հնարավոր չէ ստեղծել և ամրապնդել վստահությունը, երբ պահպանվում են թշնամական հռետորաբանությունն ու ուժի կիրառման սպառնալիքները։

Աղբյուր` Փաստինֆո