Փաստ ինֆո

Մեր խորհրդարանը, ցավոք սրտի, պատմության մեջ մնալու է ոչ այնքան դրական հիշատակումներով, որովհետև մենք պարտության խորհրդանիշ դարձանք։ Այս մասին լրագրողների հետ զրույցում այսօր ասել է անկախ պատգամավոր Թագուհի Թովմասյանը.

«Քանի դեռ այս խորհրդարանը իրավաբանորեն գործում է, մենք պետք է հասցնենք ամենակարևոր հարցի պատասխանը այս խորհրդարանում տալ՝ ի՞նչ է լինելու Արցախի ապագան: Ես արդեն մի անգամ ԱԺ ամբիոնից դիմել եմ Նիկոլ Փաշինյանին և խնդրել, որ «Արցախ» նախաձեռնության կողմից հեղինակած Արցախի կարգավիճակի, դեոկուպացիայի մասին փաստաթղթին պատասխան տա, որպեսզի խորհրդարանը հասցնի ընդունել այն։ Մեր խորհրդարանը պետք է Արցախի ապագայի տեսլական գծի, որպեսզի պատմության մեջ չմնանք միայն որպես Արցախը հանձնած խորհրդարան, պետք է Արցախի ապագայի մասին մեր տեսլականը հստակ տանք»,-ասաց Թովմասյանը։

Անդրադառնալով նաև սահմաններին առկա խնդիրներին, պատգամավորը նշեց՝ մենք չունենք խրամատ, չունենք կահավորված առաջնագիծ, չունենք զինվորների գիշերակացի համար շատ պայմաններ․

«Երբ ԱԺ-ում այս խնդիրների մասին բարձրաձայնեցի, Նիկոլ Փաշինյանն ասաց, թե գաղտիք եմ բացահայտում: Ի՞նչ կա գաղտնիքի, եթե մի քանի մետր հեռավորության վրա հակառակորդը տեսնում է մեր առաջնագիծը: Առաջնագիծն այն կարևոր անվտանգային վիճակն է, որտեղից սկսվում է իմ հայրենիքը, իսկ հայրենիքը պետք է լինի անվտանգ և զարգացած, պետք է մեր ապագան կառուցենք մեր երկրում, բայց այդ առաջնագծով և այդ մթնոլորտում դժվարություններ և ռիսկեր եմ տեսնում»:

Թագուհի Թովմասյանն ընդգծեց նաև, որ այն իշխանությունը, որը մեզ տարել է պարտության, չի կարող մեզ նորից առաջնորդել․

«Մենք ունեցել ենք պարտություն, որի պատճառները չենք քննել, ու ինձ համար որևէ էական նշանակություն չունի՝ ինչ պատճառով, որովհետև ակնհայտ է, որ մենք ունենք և ունեինք անկարող և պատերազմ վարելու ընդունակություն չունեցող իշխանություն»,-նշեց Թագուհի Թովմասյանը։

Անդրադառնալով ընտրություններին՝ պատգամավորը նշեց, որ դեռ որոշում չունի, ո՞ր քաղաքական ուժի հետ է մասնակցելու ընտրություններին.

«Հասկանամ՝ ուզո՞ւմ եմ մնալ քաղաքականության մեջ, թե՝ ոչ, հետո կդիտարկեմ ինձ արված առաջարկներից որևէ մեկը»,-եզրափակեց Թագուհի Թովմասյանը:

Աղբյուր` Փաստինֆո