Փաստ ինֆո

Օրեր առաջ ԱՄՆ նախագահ Ջո Բայդենը պաշտոնապես ճանաչեց Հայոց ցեղասպանությունը՝ այդ եզրույթը երկու անգամ օգտագործելով իր ապրիլքսանչորսյան ուղերձում: «Ամեն տարի այս օրը մենք հիշում ենք նրանց, ովքեր զոհվեցին Օսմանյան ժամանակաշրջանի Հայոց ցեղասպանության ժամանակ, և պարտավորվում ենք կանխել նման չարագործությունների կրկնությունը», - հայտարարեց Բայդենը՝ այդպիսով դառնալով Ամերիկայի առաջին նախագահը, որը 1915 թվականին մեկուկես միլիոն հայերի սպանություններն անվանեց Ցեղասպանություն։

Նույն ժամանակ՝ արցախյան երկրորդ՝ 44 օր տևած պատերազմից վեց ամիս անց՝ հայ գերիների մասին օտար մամուլում տարածված տեղեկությունը գուժում է, որ ադրբեջան կոչվող պետությունը 19 հայ գերիների խոշտանգելով սպանել է։ Ազգությամբ հայ լինելու համար են նրանց բարբարոսաբար սպանել ազերիթյուրքերը։ Բայց մի քանի օր առաջ Հայոց ցեղասպանությունը ճանաչած ԱՄՆ-ը այս փաստերը լսում է․․․ և քար լռություն է պահպանում։ Ավելին, զենք է վաճառում ադրբեջանին, որ ավելի դաժանորեն իրականացնի իր ոճրագործությունները։
Իսկ այս ամենի ֆոնին որքան էլ ՝ տհաճ լինի, ականջ սղոցող և աչքերդ ու հոգիդ վիրավորող՝ լսում ես ՀՀ վարչապետի ժ/պ համարվող անձի հիստերիկ բղավոցը նախկինների՝ իր սիրած թեմայով ու մտածում՝ մի՞թե այս մարդը այն երկրի ղեկավարն է, որի քաղաքացիներին գերեվարած ադրբեջան կոչվող երկիրը նրանց խոշտանգումների ենթարկելով սպանում է հայ լինելու համար։
ԱՄՆ-ը՝ ԱՄՆ, բայց որ այս տեղեկությունը ակնհայտ ուշադրության պակաս ունեցավ նաև Հայաստանի Հանրապետությունում․․․ Ավելի կարևորվեց ժ/պ-ի շոուն, առաջիկա արտահերթ ընտրությունների թեման, ընտրացուցակները․․․թեպետ ՄԻԵԴ-ում մեր ներկայացուցիչներն ահազանգում էին․․․

Այս համատեքստում իշխանությունների մեթոդոլոգիան շատ պարզորոշ է․ հենց հայ գերիներին, ադրբեջանցիների անօրինություններին վերաբերող տեղեկատվություն է տարածվում, միանգամից որպես հակաքայլ ժ/պ-ն դեղին ու ամբոխահաճո՝ իր սիրած կոռուպցիոն ժանրի հերթական տեսարանն է խաղում։

Ի դեպ, ԱԺ հարցուպատասխանի օրվա իր «բադենբադենային» հոխորտանքը շատերին հիշեցրել էր Չինաստանում իր և կնոջ բադային հրճվանքը։ Ընդ որում, հետաքրքիրն այն է, որ սույն բադակերը, որ երկու տարի առաջ ցնցված էր չինական հյուրասիրությունից, հիմա չինական նվեր վակցինան հումորի առարկա է դարձնում։ Այստեղ են ասել՝ ուտող -ուրացող։ Սա՝ միջանկյալ։

Իրականում՝ պարտության սիմվոլ դավաճանի՝ բադենբադենային կրքեր հրահրելու փորձերը այլևս ուշադրության չեն արժանանում, քանի որ նորմալ մարդիկ, այդ թվում նաև՝ իրեն հավատացած ու փոշմանած շատերը խորապես հասկացել են՝ նախկինները որքան էլ սխալներ են ունեցել, դրանք կաթիլ են իր բերած՝ ծով ավերածությունների դեմ։ Ասացեք խնդրեմ, բարբարոս թշնամու որջում հարյուրավոր գերիներ, այդ թվում՝ կանայք, ունենալով և նրանց հարցը լուծելու կարողություն չունեցող անձը խոսելու իրավունք ունի՞, որ դեռ մի բան էլ մեղադրանքներ հնչեցնելու համարձակություն ունենա։

6 հազարից ավելի զոհաբերված երիտասարդ կյանքեր, 10 հազար հաշմանդամներ, բազմաթիվ անհետ կորածներ և մինչ օրս կոնկրետ թիվը անհայտ պահվող գերեվարված զինվորներ և քաղաքացիական անձինք։ Նրանց բոլորի արյան ու ճակատագրի համար մեղավորն ու պատասխանատուն ինքն է։ Ըստ էության, նա ոչ միայն ծրագրված պատերազմում ծրագրված պարտության սիմվոլն է, այլև՝ 21-րդ դարում թուրքադրբեջանական տանդեմի կողմից սանձազերծված ցեղասպանության։

Նրա մեկ ստորագրությամբ ունեցանք թշնամուն անկռիվ հանձնած հող ու հայրենիք։ ՈՒնեցանք մշակութային եղեռն, որը շարունակվում է, որը տեղի է ունենում ամեն օր։

Աղբյուր` Փաստինֆո