Փաստ ինֆո

Աշխարհի որևէ կետում նման պատերազմ դեռ չէր եղել: Այս մասին լրագրողների հետ զրույցում հայտարարել է իմքայլական պատգամավոր Արուսյակ Ջուլհակյանը՝ խոսելով Արցախյան վերջին պատերազմի մասին:

«Այդ պատերազմը ես իմ հոր տնից չեմ բերել, այդ պատերազմում ՀՀ-ն է հայտնվել ու հայտնվել է բավականին հստակ պատճառներով, որովհետև ժամանակին համարձակություն է ունեցել կանգնելու արցախյան եղբայրների կողքին, համարձակություն է ունեցել պնդելու, որ հայ ժողովուրդը կարող է ու պետք է պայքարի իր էքզիստենցիալ իրավունքների, կյանքի իրավունքի համար, որ պետք է պայքարի իր հողում խաղաղ ու արժանապատիվ ապրելու հնարավորության համար։ Դրա համար է ՀՀ-ն և Արցախը հայտնվել նման արհավիրքային հետևանք ունեցող պատերազմի կիզակետում»:

Ջուլհակյանը հավելել է, որ պատերազմն ավարտվել է բավականին ծանր պարտությամբ ու ծնկի է իջեցրել հայ ժողովրդին. «Պարզ է, որ մեր ժողովրդի մի մասը, ցավոք, ծանր ապրումներ ունի հիմա ու գուցե հարցեր ունի ապագայի հետ կապված»:

Պատգամավորը պնդում է, որ Հայաստանն ու Արցախն ունեն ապագա, հակառակ պնդումներին, որ իրենց կառավարման արդունքում է ՀՀ-ն պատերազմում հայտնվել։

«Մեր կառավարումը բնավ այդտեղ կապ չունի և դա իրենք շատ լավ գիտեն, մասնավորապես այն ուժերը, որոնք իրենց կառավարմամբ հասցրել են այն իրավիճակին, որ ունեցել ենք 2020 թվականին»։

Պատգամավորը անդրադարձավ նաև Սերժ Սարգսյանի հարցազրույցին, նշեց, որ այն դեռ չի դիտել, բայց ՀՀ երրորդ նախագահը պարտվել է մեկ սուբյեկտի՝ ՀՀ ժողովրդին։ Տարբեր գործիչներ, ըստ պատգամավորի, անտեսել են ժողովրդին, իսկ Սարգսյանը հայտնել էր, որ ավելի հզոր ուժերի է պարտվել։

«Դեռևս 2008 թվականին է Սերժ Սարգսյանը պարտվել, 2018 թվականին դա արդեն ամրագրվել է։ Եթե ունի տվյալներ, կարծում եմ պետք է հրապարակի, որովհետև եթե խոսում է դրսի ուժերի մասին, դա նշանակում է, որ ՀՀ անվտանգության հետ մենք գործ ունենք և կրկնակի դատապարտելի է, որ փաստորեն նա դրսի ուժերին իշխանություն է փոխանցե՞լ»։

Անդրադառնալով Սերժ Սարգսյանի այն տեքստին, թե ինքը սխալվել է, սակայն կրճատվել է հրաժարականի տեքստը, որով ցանկացել էր ասել, որ վստահ է, որ Փաշինյանը փորձելու է ամեն գնով իշխանություն վերցնել, պատգամավորը հիշեց «ժողովրդական խոսքը».

«Մի ժողովրդական խոսք կա՝ մի ծիծաղեցրեք իմ հողաթափերը։ Ես խնդրում եմ պարոն Սարգսյանին չծիծաղեցնել իմ հողաթափերը»։

Ջուլհակյանը նաև նշեց, որ կարևոր չէ, թե քանի ընտրությունների կմասնակցի ՀՀԿ-ն. «Այդ արժեհամակարգը մերժված է և դա չի կարող այլևս վերականգնվել մեր պետությունում, որովհետև ՀՀ ժողովուրդը արդեն ճաշակել է իշխանություն ունենալու բերկրանքը և արդեն զգում է այդ համը և չի կարող իշխանությունը հանձնել այն ուժերի, որ իր քվեն չեն արտահայտում»։

Աղբյուր` Փաստինֆո