Փաստ ինֆո

«Թիթեռնիկ» մանկապարտեզը մայիսի 3-ից կդադարեցնի իր գործունեությունը՝ հիմնանորոգման պատճառաբանությամբ եւ ավելի քան 160 երեխայի ծնող հայտնվել է փաստի առաջ։

Վաղը՝ ապրիլի 30-ին, մանկապարտեզի ծնողները հավաքվելու են քաղաքապետարանի մոտ՝ իրենց դժգոհությունը հայտնելու։ «Թիթեռնիկ» մանկապարտեզ հաճախող երկու երեխաների մայր ` Սոնա Խալաթյանը «Փաստինֆո»-ին տեղեկացրեց, որ ակնկալում են հանդիպում ունենալ քաղաքապետարանի աշխատակիցների հետ, որպեսզի զբաղվեն խնդրով, եւ երեխաները չմնան առանց նախադպրոցական կրթության:

Նրա փոխանցմամբ՝ ապրիլի 27-ին իրենց տեղեկացրել են, որ մանկապարտեզը սույն թվականի մայիսի 3-ից կանգնում է հիմնահատակ վերանորոգման։ Այսինքն` մանկապարտեզը փակում է դռները 18 ամսով։ Որի արդյունքում ավելի քան 160 երեխա մնում է առանց նախադպրոցական կրթության։ Ու չի ներկայացվել որեւէ առաջարկ երեխաների համար, քան «գնացեք դուք Ձեր գլխի ճարը տեսեք, 18 ամիս»։

Խալաթյանն ասաց, որ իրենք խնդրի լուծման երկու տարբերակ ունեն. «Առաջինը, որպեսզի մանկապարտեզի աշխատակազմին իրենց գույքով այլ տարածք տրամադրվի, մինչև կավարտվի վերանորոգումը: Կամ՝ երեխաներին բաշխեն Արաբկիրի տարածքում գտնվող մանկապարտեզներում:

«Խնդիրն այն է, որ մեզ շատ ուշ են նախազգուշացրել, մայիսի 3-ը երկուշաբթի օր է, այսինքն` մենք օր չունենք: Վաղը պետք է գնանք և ներկայացնենք մեր բողոքը, իսկ հետո կտեսնենք, թե ինչ որոշում կլինի: Ուղղակի, ցավոք, մանկապարտեզի ղեկավարությունն էլ է այս մասին ուշ իմացել: Մենք ուզում ենք զրուցել քաղաքապետարանի այս գծով պատասխանատուի հետ, քանի որ թաղապետարանում մեզ ասացին, որ ոչինչով օգնել չեն կարող: Տեսնենք քաղաքապետարանում մեզ ինչ լուծում կառաջարկեն»,- շեշտեց ծնողը:

Ըստ նրա՝ նման խնդրի առաջ կանգնել է նաև թիվ 23 մանկապարտեզը: «Մենք որոշեցինք իրենց էլ տեղյակ պահենք վաղվա միջոցառման մասին, եթե իրենք էլ մեզ միանան, շատ ավելի լավ: Հակառակ դեպքում, մենք կպայքարենք մեր ուժերով»,- եզրափակեց ծնողը:

Աղբյուր` Փաստինֆո