Փաստ ինֆո

Տեղ համայնքի Քարաշեն գյուղի բնակիչ Սեյրան Սարգսյանը պատերազմից հետո առողջական խնդիրներ է ձեռք բերել ու ֆինանսական դժվարությունների առաջ կանգնել. Չի կարողանում մարել վերցրած վարկերը։ Դպրոցում հսկիչ է աշխատում՝ 55 հազար դրամ աշխատավարձ ստանում, ինքն էլ տան միակ կերակրողն է։

Սեյրանը սեպտեմբերի 28-ն կամավոր մեկնել է մասնակցելու պատերազմին, եղել է Հորադիզում։ Հոկտեմբերի 6-ին նահանջի հրաման են ստացել եւ վերադարձի ճանապարհին ականի պայթյունից վիրավորներ ու զոհեր են ունեցել։ Ս.Սարգսյանը եւս տուժել է. Պայթյունի հետեւանքով բախվել է քարին ու վնասել երիկամներն ու ողնաշարը։

«Խփել ավտոն թռցրել է, երիկամներս են վնասվել, բժշկական թղթեր ունեմ։ Ուղարկել են Գորիսիս բժշկական կենտրոն։ Բուժում եմ ստացել, ձյուն էր, ոչ մի աշխատանք չեմ կատարել, աշխատանք չի եղել, զոռով երեք երեխան պահել եմ»,- «Փաստինֆո»-ին պատմել է Ս.Սարգսյանը

Դեպքից հետո Սեյրանը մոտ մեկ ամիս բուժում է ստացել։ Պետությունից որպես պատերազմի մասնակից ստացել է փոխհատուցում՝ 22.000 ՀՀ դրամ։

«Որպես պատերազմի մասնակից բռնել 22 հազար փող են տվել։ Ով, որ չի գնացել, նրանց ամենքին հարյուր քանի հազար փող են տվել, ես էլ գնացել եմ թուրքի ճակատին կռվել, ինձ էդքան փող են տվել»։

Նախքան պատերազմը Գորիսում գործող Արեգակ և Սեֆ վարկային կազմակերպություններից վարկ է վերցրել՝ կնոջ բուժման համար։ Սեյրանի զավակներն անչափահաս են, կինը ևս չի աշխատում՝ առողջական խնդիրների պատճառով։ Երկու տարի առաջ վերցրած վարկերի համար հիմա ամեն օր վճարում են պահանջում՝ սպառնալով առգրավել Սարգսյանների բնակարանը։

«Կինս 4 ամսական երեխային կորցրել է ու նեվրոզ տարել։ Երևանում բուժել են, անցած տարի մի կերպ աղջիկ ունեցանք։ Վարկը վերցրել ենք կնոջս բուժելու համար։ Աշխատել ենք՝ մի քիչ փակել։ Մի վարկից մնացել է 1,5 միլիոն, մյուսից՝ 1,3 հազար դրամ։ Ես ասել եմ՝ կաշխատենք կփակենք, ես ուրիշից փող չեմ ուզում։ Ամեն օր նամակներ են ուղարկում, թե գալու ենք բռնագանձենք։ Ի՞նչն են գալու բռնագանձեն, թող գան սահմանի տունս վերցնեն, ես էլ գամ Երևան ինձ համար ապրեմ»,- ասել է սահմանամերձ գյուղի բնակիչը։

Պատերազմի օրերին կազմակերպությունները պարտադրել են վարկի տոկոսները վճարել, ուշացումներ են եղել, ըստ Սեյրանի՝ արդարացի։ Հիմա 44 օրյա պատերազմից հետո էլ պարտքեր են կուտակվել։

«Երեք ամիս սառեցրել են, բայց տոկոսները վերցնում են։ Ասում են՝ պիտի տոկոսները բերեք փակեք։ Հոկտեմբեր, նոյեմբեր, դեկտեմբերի վճարումը պետք է անենք։ Ասում են պիտի մուծեք։ կամ պիտի գնամ ոտքս կտրած գամ, կամ պետք է մահանամ, որ վարկերս հեչ անեն։ Ես էլ խնդրում եմ, ասում եմ՝ ժամանակ տվեք, կաշխատեմ ես ձեր վարկը քիչ- քիչ կփակեմ, առողջությունս նորմալանում է»։

Սեյրանը խնդրում է, որ վարկային կազմակերպությունները ոչ թե ներեն, սառեցնեն վարկերը մինչև կարողանան վճարումներ անել։ Նրա պարտքերի պատճառով երաշխավորը ևս չի կարողանում հիմա վարկեր վերցնել։

«Երաշխավորս է տուժել, գնացել է, որ վարկ վերցնի անտոկոս՝ չեն տալիս, ասում են պետք է Սարգսյան Սեյրանը վճարում անի՝ 300 հազար դրամ, տոկոսների գումարը մարի, որպեսզի ձեզ էլ վարկ տանք։ Ես խնդրել եմ, ասել եմ, որ ձմեռա, ձյունա, աշխատանք չկա, 55 հազար դրամ աշխատավարձ եմ ստանում, երեք երեխա պահում, կաշխատեմ, կվճարեմ, առողջականս էլ այն չի եղել, բուժում եմ ստացել, տակ եմ տվել։ Հիմա մի քիչ լավ է առողջականս, ձյունը հալվում է, շինարարական աշխատանքները շուտով սկսվում են, կարող եմ աշխատել, վճարումները քիչ-քիչ անեմ։ Ինձ նոյեմբերի 20-ից կանչել են, թե պիտի բերես վճարումն անես»։

Քարաշենի վարչական ղեկավար Գառնիկ Շահնուբարյանը «Փաստինֆո»-ի հետ զրույցում հաստատեց, որ Սեյրանը պատերազմի մասնակից է և գտնվում է սոցիալապես շատ վատ վիճակում։
«Լավ չեն ապրում, աշխատանք չկա, առողջություն չկա, իրենց վիճակը ծանր է, ինքն էլ խոշորացված համայնք է, չենք կարողանում օգնել։

Ես գիտեմ, որ վարկ են վերցրել, աշխատանք էլ չկա, լավ աշխատող է, բայց անասուն չունի, հիմա էսօր իր համար դժվար է»։
Տեղ համայնքի Ղեկավար Ներսես Շադունցն էլ «Փաստինֆո»-ի հետ զրույցում նշեց, որ համայնքում նման խնդրի առաջ կանգնած են գրեթե բոլորը։

«Անասուններ են գնել, որ տանեն պահեն, պատերազմը սկսվել է, անասունները կես գնով վաճառել են, հիմա էդ վարկերի տակ ճռռում են, չգիտեն ոնց փակեն, ոչ էլ աշխատատեղ ունենք։ Այս համայնքում բոլորն այդ խնդիրն ունեն»։

Աղբյուր` Փաստինֆո