Փաստ ինֆո

Իշխող խմբակցության ներկայացուցիչները կարող են անընդմեջ ասել, որ ամեն ինչում մեղավոր են երկրի նախկին նախագահները, համայնքապետերը, բայց արդյո՞ք դրանից իրավիճակը փոխվում է: Այս մասին լրագրողների հետ ճեպազրույցի ժամանակ ասաց անկախ պատգամավոր Աննա Գրիգորյանը:

Պատգամավորը նշեց, որ սյունեցիներն այսօր կանգնած են թշնամուն դեմ դիմաց, մարդիկ զրկվել են աշխատելու հնարավորությունից, կորցրել են՝ հողեր, տարածքներ:

«Ասել, որ մարդիկ դուրս էին եկել, որովհետև իրենց հրահանգել էին, դա կեղծ օրակարգ է: Ի վերջո իրենց քաղաքականության արդյունքում է, որ Սյունիքն անվտանգ չէ, ինչքան էլ, որ իշխանությունները հակառակը պնդեն:  Մենք պատգամավորներով պետք է մտածենք, ինչ է լինելու, եթե ճանապարհին դեպի Սյունիք մեքենայի հետ որևէ բան տեղի ունենա: Աբսուրդ է, երբ քո երկրի իշխանությունները չեն պատկերացնում ինչպես հոգալ քաղաքացիների անվտանգությունը։ Ես ինքս ամեն շաբաթ լինում են Սյունիքում, տեսնում են այնտեղի խնդիրները: Ես գնում եմ Գորիս-Կապան ճանապարհով, որը մասնակի գտնվում է Ադրբեջանի վերահսկողոթյան տակ: Եթե պատգամավորները ասում են, որ այնտեղ անվտանգ է, թող գնան և ապրեն այնտեղ»,-շեշտեց Գրիգորյանը:

Պատգամավորը հավելեց, որ տրամադրությունները իշխանությունների նկատմամբ ամբողջ Հայաստանում տարբեր են, անգամ մեկ մարզում կարող են լինել տարբեր տրամադրություններ: Սակայն այդ տրամադրություններից ելնելով չի կարելի ասել, որ այս մարդիկ լավն են, քանի որ մեզ են սատարում, իսկ այս մարդիկ վատն են, քանի որ նրանց ուղղորդել են:

«Ասում են, որ այնտեղ բոլոր սյունեցիներ չէին: Իսկ ինչ է, հեղափոխությանը ամբողջ հայ ժողովուրդն էր մասնակցու՞մ, էդպես չէ: Այնտեղ կազմակերպված խմբեր չեն եղել: Ես գիտեմ այնտեղի մարդկանց տրամադրությունները։ Եթե Նիկոլ Փաշինյանը կարողանար խնդիրներ լուծել, նա դա կաներ այն ժամանակ, երբ զիջում էին Կապան-Գորինս, Կապան-Ճակատեն ճանապարհները: Երբ մարդը որպես երկրի ղեկավար և իշխանական թիմը հարցերը ժամանակին չեն լուծել, հիմա գնալով մարզ ինչ են ակնկալում, ինչ հարցադրումներ իրեն պետք է տան: Շուռնուխցին ի՞նչ պետք է ասի, վերադարձրու իմ տունը: Այդ տունը արդեն զիջվել է թշնամուն»,- եզրափակեց պատգամավորը:

Աղբյուր` Փաստինֆո