Փաստ ինֆո

ՀՀ նախագահ Արմեն Սարգսյանի հետ հանդիպման ժամանակ Շուռնուխի բնակիչները ներկայացրել են իրենց անհանգստացնող խնդիրները, մասնավորապես խոսել անվտանգային գոտի ունենալու մասին։

«Փաստինֆո»-ի հետ զրույցում Շուռնուխի գյուղապետ Հակոբ Արշակյանը հույս հայտնեց, որ վերջնական սահմանազատումը կիրականացնեն և գյուղացիների ու ադրբեջանցիների միջև ներկայիս հեռավորությունը կմեծացնեն. «Գոնե անվտանգության գոտի լինի։ Մարդու իրավունքների պաշտպանը պահանջում է, որ 10 կմ հեռավորություն լինի։ Ես էլ ասում եմ, որ 5 կմ-ին էլ ենք համաձայն, մենակ գյուղից դուրս գան ու մեր երեխեքը նրանց երեսը գյուղում չտեսնեն»,-նշեց գյուղապետը։

Հակոբ Արշակյանի խոսքով ադրբեջանցիները գյուղի փողոցի ներքևի հատվածում են, գյուղացիները՝ վերևի հատվածում. «Իրենց ուզած ձևով սահմանազատում են արել GPS-ով, բայց մեր քարտեզով նրանք գյուղ չպետք է մտնեին, գյուղի ներքևի ձորով պետք է սահմանն անցներ»,-ասաց Հակոբ Արշակյանը։

Հարցին՝ վերադարձրեցին արդյոք որոշ ժամանակ առաջ գյուղացուց գողացած 13 կովերը, գյուղապետն ասաց, որ այդպես էլ ոչ մի նորություն չստացան. «Քանի դեռ եղանակները բարենպաստ են, տեսախցիկները ֆիքսում են ամեն ինչ։ Մառախուղային եղանակին էր նման բան եղել։ Մառախուղի ժամանակ մարդ էլ են գողանում»,-ասաց գյուղապետը։

Վերջինս նշեց, որ այս ընթացքում գյուղացիները վաճառել են իրենց անասունների մի մասին։ Դեռ հաշվարկ չեն կատարել, թե քանի գլուխ անասուն են վաճառել. «Հիմա արդեն երեք հոգու փոխարեն 5-7 հոգով ենք տանում անտառի մեջ արածացնելու, բայց դե այնտեղ էլ ինչ կա։ Այդպես ենք անում, որ սահմանը չանցնեն»,-ասաց Հակոբ Արշակյանը։

Աղբյուր` Փաստինֆո