Փաստ ինֆո

Ռուսաստանը պատասխանել է մեր դավաճանական քայլին: Այս մասին «Փաստինֆո»-ի հետ զրույցում ասաց ռազմական փորձագետ Հայկ Նահապետյանը՝ անդրադառնալով այսօր ԵԽԽՎ լիագումար նիստում ՌԴ պատվիրակության քվեարկությանը:

Հիշեցնենք, որ հայ գերիների ու տեղահանված անձանց հարցը երեկ ներառվեց ԵԽԽՎ լիագումար նիստի օրակարգ: Հարցը օրակարգ ներառելուն դեմ էին քվեարկել Ադրբեջանի ու Թուրքիայի պատվիրակները, նաև Ռուսաստանի 5 պատգամավորներ, իսկ 7 պատգամավոր էլ ձեռնպահ են քվեարկել:

Նկատենք, որ քվեարկությունը վերաբերվել է ոչ թե առանձին գերիների հարցին, այլ ընդհանուր օրակարգային փաթեթին, որտեղ ընդգրկված է եղել Ալեքսեյ Նավալնու հարցը, ասել է թե փաթեթում ընդգրկված են եղել նաեւ հակառուսական նախագծեր, որոնց Հայաստանը կողմ է քվեարկել, քանի որ այդ նույն փաթեթի մեջ էր նաեւ հայ գերիների հարցը։

Ռուսական պատվիրակության քվեարկությունը Հայաստանում տարբեր քննարկումների և քննադատությունների առիթ հանդիսացավ:

Փորձագետը մեզ հետ զրույցում պարզաբանեց, որ ԵԽԽՎ օրակարգ պետք է մտներ մոտ 9 հարց, որից մտել է 4-ը, ամեն երկու հարցին մեկ քվեարկություն պետք է լիներ: Առաջին երկու հարցը, որը հրատապ կարգով է մտել, վերաբերվել է Նավալնու հարցին, որը լծակ է Ռուսաստանի դեմ, իսկ երկրորդը՝ Թուրքիայում մարդու իրավունքների խախտման հարցն է եղել, իսկ հայկական պատվիրակության չորս պատգամավոր այս երկու հարցերին կողմ են քվեարկել: Հաջորդ երկու հարցը, որոնք ընթացիկ են մտել քվեարկության, վերաբերվել է համավարակին և հայ ռազմագերիներին, որին ՌԴ պատվիրակներից 5-ը դեմ են քվեարկել, իսկ 7-ը՝ ձեռնպահ. «Ռուսաստանը պատասխանել է մեր դավաճանական քայլին: Նավալնու հարցը ԱՄՆ-ն որպես քարոզչական լուրջ գործիք օգտագործում է Ռուսաստանի դեմ, իսկ Հայաստանի պատվիրակությունը կողմ է քվեարկել, նրանցից երկուսը եղել են իմքայլական, մեկը՝ Էդմոն Մարուքյանն է, մյուսն էլ, տարօրինակ է, բայց ԲՀԿ պատգամավոր Նաիրա Զոհրաբյանը: Նրանք փաստորեն կողմ են քվեարկել մեր ռազմավարական դաշնակցի դեմ Արևմուտքի սանձազերծած քարոզչական պատերազմին, այնինչ մեր պատվիրակությունը կարող էր պահանջել, որ այդ երկու հարցերը համատեղ չդրվեն քվեարկության:Հայկական կողմը կարող էր պարզապես չմասնակցել քվեարկությանը հաշվի առնելով, որ վնաս է հասցնելու մեր ռազմավարական դաշնակցին»,-ասաց Նահապետյանը:

Փորձագետի խոսքով՝ ՀՀ իշխանությունները հրապարակավ հայտարարում են, որ Ռուսաստանը մեր դաշնակիցն է, անվտանգության երաշխավորն է, այնինչ գործնականում հակառակն են անում:

Հարցին՝ թե այս քայլերը և տարբեր պաշտոնյաների և պատգամավորների կողմից արված հակառուսական հայտարարություններն ինչպե՞ս կանդրադառնան հայ-ռուսական հարաբերությունների և հայ ռազմագերիների վերադարձի գործընթացի վրա, զրուցակիցն ասաց.

«Սա Ռուսաստանի դեմ դեմարշ էր, Հայաստանի իշխանություններն ամեն ինչ արեցին, որ գերիները չվերադառնան, ՀՀ իշխանությունները թքած ունեն, գերիները կվերադառնան, թե՝ ոչ, կարևորը իրենց հանձնարարությունները կատարեն և Ռուսաստանի դեմ գործնական քայլեր անելը: Իշխանությունները Ռուսաստանին դրդում են, որ այն դիրքորոշումը, որն ունի գերիների հետ կապված, հակառակ դիրքորոշումն ունենա: Սա սադրանք էր Ռուսաստանի նկատմամբ»,-ասաց Հայկ Նահապետյանը:

Դիտարկմանը՝ հնարավո՞ր է թուրք-ադրբեջանական տանդեմը, օգտվելով ստեղծված իրավիճակից, քայլեր ձեռնարկի Սյունիքի ուղղությամբ, փորձագետը նկատեց, որ այդ դեպքում Ռուսաստանի պատասխանը չի ուշանա.

«Ռուսաստանի համար Հարավային Կովկասը կենսական տարածք է, և այն կորցնելը կնշանակի, որ ՆԱՏՕ-ի զորքերը և ահաբեկիչները հայտնվելու են Հյուսիսային Կովկասի դարպասների մոտ, Ռուսաստանը դա շատ լավ է հասկանում:

Ռուսաստանը Թուրքիային ցույց է տվել, թե պայմանավորվածությունը խախտվելու դեպքում ինչ կլինի: Սիրիայի Իդլիբ նահանգում կար հստակ պայմանավորվածություն, որը մարտի 23-ին Թուրքիան խախտեց, և Ռուսաստանի պատասխանը, ռազմական առումով, կործանիչ դարձավ: Առաջին անգամ Ռուսաստանը օգտագործեց Իսկանդերի հրթիռները, ինչպես նաև ՍՈՒ 34 գրոհայիններ: Մեսիջը Թուրքիային նաև այն էր, որ եթե իր ռազմավարական դաշնակից երկրի նկատմամբ Թուրքիան ռազմական ագրեսիա անի, ապա ռազմական առումով պատասխանը չի ուշանա» ,-ասաց Հայկ Նահապետյանը:

Իսկ թե ինչպե՞ս է գնահատում տարածաշրջանային իրավիճակը՝ փորձագետն արձագանքեց, որ բավականին բարդ իրավիճակ է Հարավային կովկասում և պատերազմի վերսկսման հավանականությունը մեծ է.

«Հաղթած պետությունը, հաղթանակի պտուղները քաղելուն զուգահեռ, զորավարժություններ է անում, զորավարժություններ ինչի՞ համար են անում, որպեսզի պատրաստվեն պատերազմի, տարածաշրջանում պատերազմի վերսկսման վտանգ կա»,-ասաց փորձագետը:

Թե պատերազմի վտանգի առջև կանգնած պետությունում՝ ինչպե՞ս է գնահատում զինվորական ծառայության կրճատումը, զրուցակցի դիտարկմամբ՝ դա ծանր հետևանքներ է ունենալու.

«Թուրքիային և Ադրբեջանին Հայաստանը պետք է առանց Զինված ուժերի, որտեղ իր պահանջներն անվերապահորեն կատարվում են: Պատերազմող երկրում ոչ թե ծառայության ժամկետ են կրճատում, այլ՝ ավելացնում:

Ծառայությունը կրճատելու դեպքում զինծառայողը չի հասցնելու բավարար հմտություն ձեռք բերել՝ մարտական առաջադրանք կատարելու համար»,-ասաց Հայկ Նահապետյանը:

Աղբյուր` Փաստինֆո