Փաստ ինֆո

Ալիևի պոռոտախոսությունը և բացառիկ ցինիզմն անմիջական կապ ունեն նրա հոգեվիճակի հետ։ Կարծում եմ՝ ինքն արդեն հոգեխանգարումներ ունի։ Այս մասին լրագրողների հետ զրույցի ժամանակ ասաց ԱԺ «Իմ քայլը» խմբակցության պատգամավոր Արմեն Խաչատրյանը։

Անդրադառնալով Ալիևի այն արտահայտությանը, որ Զանգեզուրը պատմական ադրբեջանական տարածք է եղել, պատգամավորն ասաց. «Ալիևը թող ասի, թե իր պապը կամ ապուպապը որ երկրի քաղաքացի կամ բնակիչ են եղել։ Հաստատ այդ հարցին չի կարող պատասխանել, որովհետև իր ղեկավարած պետությունն այդքան պատմություն չունի, որ անունը դնեին Ադրբեջան»,-ասաց պատգամավորը։

Դիտարկմանը, որ Մեղրիի քաղաքապետը ասել է՝ պատգամավորը Մեղրի չի այցելել, հետևաբար ինչպես կարող է ասել, որ Սյունիքն անվտանգ է, Արմեն Խաչատրյանը նշեց՝ Սյունիք շատ հաճախ է այցելում և իր ներկա-բացակա դնողը Մեղրիի քաղաքապետը չէ. «Մշտապես լինում եմ Սյունիքում։ Լինում է, որ աշխատանքից հետո եմ գնում գիշերով եմ հասնում կամ առավոտ շուտ եմ գնում։ Ժամն ի՞նչ կապ ունի, ես Սյունիքում մշտապես եմ լինում, առաջիկա օրերին նորից գնալու եմ։ Սյունիքի անվտանգության հետ կապված կարող եք ավելի գիտական մոտեցում ցուցաբերել, կարող եք լինել Սյունիքում, ուսումնասիրել, վերլուծել՝ Սյունիքն այս պահի դրությամբ անվտանգ է, թե ոչ»,-ասաց Արմեն Խաչատրյանը՝ հավելելով, որ Սյունիքում խնդիրները բազմաթիվ են, քանի որ այն դարձել է անմիջական սահման, որի հետ կապված մեծ աշխատանք պետք է կատարվի։

«Այդ աշխատանքները հեռու են վերջնական լինելուց։ Դեռևս շատ աշխատանք կա անելու՝ սկսած տեսահսկման համակարգերի տեղադրումից, փշալարեր, համապատասխան հենակետերի ավելացումներ։ Այս աշխատանքները պետք է իրականացվեն լիակատար անվտանգություն ապահովելու համար։ Պատերազմից հետո խոսել, որ ամեն ինչ շատ լավ և անվտանգ է, սակայն եթե ուզում եք հասկանալ՝ Սյունիքոմ վտանգավորության ինչ աստիճան կա, հորդորում եմ գնալ այնտեղ»,-ասաց պատգամավորը։

Դիտարկմանը, որ ադրբեջանցիները բնակիչների ավտոմեքենաների վրա քարեր են նետում, գյուղացիների կովերն են գողանում ու չեն վերադարձնում, Արմեն Խաչատրյանն ասաց. «Կովերի փաստով ուսումնասիրություններ են արվում և որպեսզի նման դեպքեր այլևս չլինեն, այնտեղ շատ մեծ աշխատանք է իրականացվելու»։

Աղբյուր` Փաստինֆո