Փաստ ինֆո

Խորհրդարանում պատգամավոր Թագուհի Թովմասյանը վարչապետ Նիկոլ Փաշինյանից հետաքրքրվեց պատերազմը վարելու մասին մեկնաբանությունների և թերութունների մասին։ Մասնավորապես այն, որ վարչապետի հրամանով է տեղի ունեցել զորակոչի դադարը՝ այն պայմաններում, երբ մարտակոչով էր հանդես գալիս։

Պատգամավորը հիշեցրեց, որ «Մարտունի 3» զորամասի 7-րդ վաշտի զինվորների ծնողները Փաշինյանի հետ հանդիպման ժամանակ բարձրաձայնել են, որ պատերազմում կազմակերպչական մի շարք թերություններ են եղել և երեխաներին Հադրութ են տեղափոխել այն հանձնելուց երկու օր անց։ Պատգամավորը հայտնեց, որ հարցերը շատ են՝ դրանցից մեկն էլ զինծառայողների աշխատավարձերի խնդիրն է։

Նիկոլ Փաշինյանը պատասխանեց, որ զորահավաքը դադարեցնելու մասին հայտարարությունը անել մարտակոչից հետո՝ պարզապես անհեթեթություն է։

«Պատկերացնո՞ւմ եք մի իրավիճակ՝ ուղիղ եթերում մարտակոչով հանդես ես գալիս, հետո հենց ուղիղ եթերը դադարում է, գնում ես, հեռախոսը վերցնում՝ ասում ես՝ դադարեցրեք։ Այսինքն՝ այդ հայտարարությունը անհեթեթ է, և այդ հայտարարության հեղինակը մեծ պրոբլեմ ունի։ Գիտե՞ք որն է այդ պրոբլեմը, երբ նա բարձրաստիճան զինվորական լինելով՝ փորձում էր հանձնել 7-րդ պաշտպանական շրջանը, ես այս դահլիճում ներկա մի շարք մարդկանց ներկայությամբ կայացրել եմ որոշում, որի արդյունքում 7-րդ պաշտպանական շրջանը մինչև այսօր հայկական զինված ուժերի տրամադրության տակ է։ Եվ ասեմ, որ պատերազմի ընթացքում դա միակ ռազմականին մոտ որոշումն է եղել, որը ես կայացրել եմ։ Եվ այդ մարդը, որը կիսահիստերիկ վիճակում օր ու մեջ հարցազրույց է տալիս և գեներալ-գնդապետի ուսադիրներով իր հիմնական օպոնենտ է համարում կնոջը, դուք գիտեք՝ ում կնոջը, էդ մարդը, կարծում եմ, ընդհանրապես բազմաթիվ խնդիրներ ու բարդույթներ ունի։ Եվ ինքը դեռ շատ հարցերի պետք է պատասխան տա»,- ասաց Փաշինյանը։

Վարչապետը կատարյալ անհեթեթություն որակեց նաև խոսակցությունները, թե Լելե Թեփե բարձունքի գրոհի հեղինակն ինքն է։

«Հիմա էլ ասում են՝  թե Սերժ Սարգսյանը Լելե Թեփեն հանձնել է,  ես որոշում եմ կայացրել, ասել եմ՝ գնացեք գրավեք և այդ համատեքստում 700 զոհ է եղել՝ կատարյալ անհեթեթություն։ Այդ օպերացիայի առաջարկի հեղինակը եղել է գեներալ, այդ առաջարկը ընդունելի է համարել գեներալ, այդ առաջարկը կյանքի կոչելու հնարավորության գնահատումը իրականացրել է գեներալ և որոշումը կայացրել է գեներալ և, ընդ որում այնպիսի գեներալներ»։

Փաշինյանը տեղեկացրեց, որ խոսակցությունների մի հատվածին ներկա է եղել, մոդերացիա արել և սեփական կարծիք չի հայտնել։ Իսկ պատերազմի բոլոր դրվագները պետք է քննվեն ու պետք է լինի օբյեկտիվ քննություն։ «Մարտունի 3» զորամասի 7-րդ վաշտի դեպքով կա ձերբակալված, որին, սակայն, մի քանի օր առաջ բաց են թողել՝ իր համար անհայտ պատճառներով:

«Ձեր ասած դրվագով մենք ունեցել ենք կալանավորված անձ, բայց անձը դատարանի կողմից ազատ է արձակվել։ Այդ մարդուն պետք է անվանել 7-րդ պաշտպանական շրջանի արծիվ, թե ոնց էր հազարի տակ ուզում փախներ, բոլորին փախցնել այնտեղից, չնայած արծիվները չեն վազում, ջայլամներն են ավելի շատ վազում»,- եզրափակեց Փաշինյանը։

Աղբյուր` Փաստինֆո